ນະຄອນຫຼວງພະບາງ ຈັດຊ່ວງເຮືອ ຄອບສາຍນ້ຳຮັກສາຮີດຄອງປະເພນີ

ວັນທີ່ 18 ສີງຫານີ້ ນະຄອນ ຫຼວງພະບາງ ໄດ້ຈັດການຊ່ວງເຮືອ ເພື່ອຄອບສາຍນໍ້າ ແລະ ສະຖານທີ່ສັກສິດ ໂອກາດບຸນຫໍ່ເຂົ້າປະດັບດີນ ປະຈຳປີ ພສ 2563 ຮັບປະກັນບໍ່ໃຫ້ມີການລະບາດ ຂອງພະຍາດໂຄວິດ-19 ໂດຍມີການນຳຂອງແຂວງ-ນະຄອນ ແລະມວນຊົນເຂົ້າຮ່ວມຈຳນວນໜື່ງ. ທ່ານ ຈັນສຸກ ພັນໂດລັກ ເຈົ້ານະຄອນ ຫຼວງພະບາງ ມີຄຳເຫັນຕໍ່ພິທີວ່າ: ເປັນປະຈຳທຸກປີ ພໍຮອດມື້ແຮມ 14 ຄໍ່າເດືອນ 9 ທີ່ຊາວຫຼວງພະບາງ ເມືອງມໍລະດົກໂລກ ໄດ້ພພ້ອມກັນເຮັດບຸນໃສ່ບາດ ທັງຈັດໃຫ້ມີການຊ່ວງເຮືອປະເພນີ ເນື່ອງໃນໂອກາດບຸນຫໍ່ເຂົ້າປະດັບດີນ, ອັນເປັນປາງບຸນໜື່ງ ທີ່ໄດ້ ສືບທອດກັນມາແຕ່ດືກດຳບັນ ແລະຍັງຄົງຮັກສາໄດ້ ຮີດຄອງປະເພນີ ທີ່ເປັນເອກະລັກອັນດັ່ງເດີມ

ສະເພາະປີນີ້ ຍ້ອນສະພາບຂອງພພາກພື້ນ ແລະໃນໂລກ ລວມທັງປະເທດລາວໄດ້ປະສົບກັບ ສະພາບການລະບາດ ຂອງພະຍາດໂຄວິດ-19 ອົງການປົກຄອງນະຄອນ ຫຼວງພະບາງ ຈື່ງຈັດໃຫ້ມີການປະກອບພິທີທາງສາສະໜາ ຕາມຮີດຄອງປະເພນີດັ່ງເດີີມ ເພື່ອບໍ່ໃຫ້ມີມວນຊົນເຂົ້າຮ່ວມເປັນຈຳນວນຫຼາຍ ຮັບປະກັນບໍ່ໃຫ້ມີການລະບາດຂອງພະຍາດໂຄວິດ-19 ແຕ່ຕ້ອງປະຕິບັດຮີດຄອງໃຫ້ຄົບ

ການຊ່ວງເຮືອໃນປີນີ້ ອົງການປົກຄອງນະຄອນ ໄດ້ຈັດແບບກະທັດຮັດ ໂດຍອານຸຍາດໃຫ້ ເຮືອຊ່ວງເຂົ້າຮ່ວມຊ່ວງທັງໝົດ 4 ລຳ ມາຈາກບ້ານຫາດຮ່ຽນ 1 ລຳ, ບ້ານຊຽງທອງ-ຄີລີ 1 ລຳ, ວັດໃໝ່ສຸວັນນະພູູມມະຣາມ 1 ລຳ ແລະບ້ານສັງຄະໂລກ 1 ລຳ, ໃນນັ້ນເລີ້ມຈາກ ເຮືອນາງດຳນາງດ່ອນ ອັນເປັນເຮືອຕາມຮີດຄອງປະເພນີ ຈາກນັ້ນ ໄດ້ຈັດການຊ່ວງແບບພົບກັນໝົດ ລວມທັງໝົດ 7 ລ່ອງ, ຕອນທ້າຍ ໄດ້ມີການມອບເງີນລາງວັນຊຸກຍູ້ເຮືອຊ່ວງທີ່ເຂົ້າຮ່ວມ ຕື່ມອີກ.

ໂດຍ: ອາພຸດເດດ ບຸບຜາ