ກະຊວງ ຖວທ ແລະ ບໍລິສັດ ລາວເພ້ວຽງຈັນ ຮ່ວມມືພັດທະນາວຽກງານ ຖວທ ໃຫ້ເປັນທັນສະໄໝ
ພິທີເຊັນບົດບັນທຶກຄວາມເຂົ້າໃຈ (MOU) ກ່ຽວກັບໂຄງການປັບປຸງ ແລະ ພັດທະນາລະບົບຖານຂໍ້ມູນຂອງ ຖວທ ໃຫ້ເປັນທັນສະໄໝໄດ້ຈັດຂຶ້ນໃນວັນທີ 12 ສິງຫານີ້ ລະຫວ່າງທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງ ຖວທ ແລະ ທ່ານ ພູໄຊສະນະ ໄຊສົມບັດ ປະທານບໍລິສັດ ລາວເພ້ວຽງຈັນ ຈຳກັດຜູ້ດຽວ, ໂດຍມີທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍພາກສ່ວນກ່ຽວຂ້ອງ ຂອງທັງສອງຝ່າຍເຂົ້າຮ່ວມເປັນສັກຂີພິຍານ.
ໃນບົດບັນທຶກດັ່ງກ່າວລະບຸວ່າ: ບໍລິສັດລາວເພ້ວຽງຈັນຈະໄດ້ສຶກສາຄວາມເປັນໄປໄດ້ໃນການສ້າງໂຄງດັ່ງກ່າວໃຫ້ສອດຄ່ອງກັບສະພາບແວດລ້ອມຕົວຈິງ ແລະ ທຸກການໃຊ້ຈ່າຍທີ່ເກີດຂຶ້ນໃນໄລຍະສຳຫລວດ, ອອກແບບແມ່ນບໍລິສັດລາວເພ້ຈະເປັນຜູ້ຮັບຜິດຊອບ.
ສຳລັບກະຊວງ ຖວທ ຈະໄດ້ສ້າງຂໍ້ຕົກລົງ, ແຕ່ງຕັ້ງຄະນະຮັບຜິດຊອບ ແລະ ຜູ້ປະສານງານໂຄງການ ແລະ ອຳນວຍຄວາມສະດວກໃນການເຂົ້າເຖິງຂໍ້ມູນຂ່າວສານທີ່ຈຳເປັນ ແລະ ກ່ຽວຂ້ອງກັບການພັດທະນາລະບົບຖານຂໍ້ມູນຂ່າວສານ, ຕິດຕາມກວດກາ ແລະ ຊຸກຍູ້ພາກສ່ວນທີ່ກ່ຽວຂ້ອງ, ໃຫ້ການສະໜັບສະໜູນຮ່ວມມືກັບບໍລິສັດ ແລະ ລາຍງານຄວາມຄືບໜ້າໃຫ້ແກ່ການນຳກະຊວງເປັນແຕ່ລະໄລຍະ.
ບົດບັນທຶກຄວາມເຂົ້າໃຈສະບັບນີ້, ມີກຳນົດ 1 ປີ ແຕ່ວັນທີ 12 ສິງຫາ 2020 ເຖິງວັນທີ 12 ສິງຫາ 2021, ຖ້າການຈັດຕັ້ງປະຕິບັດໂຄງການບໍ່ມີຄວາມຄືບໜ້າ ແມ່ນຈະຖືກຍົກເລີກໂດຍອັດຕະໂນມັດ.
