ສອງໄລຍະປະຫວັດສາດໃຕ້ການນຳພາຂອງພັກ

ໂດຍ: ກ້ອງສ່ອງ ອິດສະຫລະ

ດັ່ງທີ່ຮັບຮູ້ ແລະ ເຂົ້າໃຈນຳກັນວ່າ: ພັກປະຊາຊົນ ປະຕິວັດລາວ ແມ່ນມີຕົ້ນກຳເນີດມາຈາກ ພັກກອມມູນິດອິນດູຈີນ ເຊິ່ງເວລານັ້ນ ພາຍຫລັງຂະບວນການປະຕິວັດຕໍ່ສູ້ຕ້ານຈັກກະພັດມາຮຸກຮານໄດ້ມີບາດກ້າວຂະຫຍາຍຕົວຢ່າງກວ້າງ ຂວາງ ຈຶ່ງໄດ້ແຍກພັກກອມມູນິດອິນດູຈີນອອກເປັນສາມພັກ ຄືພັກກອມມູນິດຫວຽດນາມ, ພັກປະຊາຊົນກຳປູເຈຍ ແລະ ພັກປະຊາຊົນ ປະຕິວັດລາວ ໃນປັດຈຸບັນ.

ພາຍຫລັງໄດ້ແຍກພັກເປັນຂອງໃຜມັນຢ່າງສົມບູນແບບແລ້ວ, ບັນດາສະຫາຍທີ່ເປັນແກນນຳຂອງພັກກໍໄດ້ວາງ ແນວທາງ ແລະ ກຳນົດເປົ້າໝາຍການປະຕິວັດຂອງຕົນອອກຢ່າງຈະແຈ້ງ ແລະ ມີຄວາມຮັບຜິດຊອບສູງຕໍ່ພາລະກຳ ປະຫວັດສາດຂອງພັກ ແລະ ຂອງການປະຕິວັດ.

ຕາມເຮົາຄິດ, ໄລຍະປະຫວັດສາດພາຍໃຕ້ການນຳພາຂອງພັກເຮົາແມ່ນມີສອງໄລຍະ ຄືໄລຍະທີໜຶ່ງແມ່ນນຳພາ ການຕໍ່ສູ້ເພື່ອປົດປ່ອຍປະເທດຊາດອອກຈາກແອກຄອບຄອງຂອງຈັກກະພັດ. ໄລຍະທີສອງແມ່ນນຳພາປົກປັກຮັກສາ ແລະ ສ້າງສາປະເທດຊາດ.

ໃນສອງໄລຍະນີ້, ຖ້າພວກເຮົາພ້ອມກັນມາວິເຄາະເຈາະເລິກມັນກໍມີລັກສະນະຈຸດພິເສດທີ່ຕັ້ງ ແລະ ຂໍ້ສະດວກຫຍຸ້ງ ຍາກແຕກຕ່າງກັນໄປ, ແຕ່ເນື່ອງດ້ວຍຄວາມເກັ່ງກ້າສາມາດ, ຄວາມສະຫລາດຄ່ອງແຄ້ວ ຈຶ່ງມີຜົນສຳເລັດເປັນກ້າວໆ ແລະ ໄດ້ຮັບໄຊຊະນະມາຮອດປັດຈຸບັນ.

ໄລຍະນຳພາການຕໍ່ສູ້ປະຕິວັດ ເພື່ອປົດປ່ອຍປະເທດຊາດອອກຈາກແອກຄອບຄອງຂອງຈັກກະພັດຕ່າງດ້າວນັ້ນ, ຖື ວ່າພວກເຮົາພາກັນຕີເສິກລ້ວນໆ ໃນນີ້ກໍມີການຕີເສິກທາງດ້ານການເມືອງ ແລະ ການທະຫານໄປພ້ອມໆກັນ. ດ້ານ ການເມືອງກໍນັບແຕ່ໃຊ້ຮູບການໄກ່ເກ່ຍເຈລະຈາ ທັງຍາດແຍ່ງການສະໜັບສະໜູນຊ່ວຍເຫລືອຈາກສາກົນ ແລະ ອົງ ການຈັດຕັ້ງທີ່ກ້າວໜ້າໃນໂລກ. ສ່ວນຢູ່ພາຍໃນປະເທດກໍມີວິທີການປຸກລະດົມຂົນຂວາຍຍາດແຍ່ງເອົາກຳລັງແຮງສັງ  ລວມຂອງມະຫາຊົນພາຍໃນປະເທດໄດ້ຢ່າງກວ້າງຂວາງ ແລະ ເປັນຂະບວນຟົດຟື້ນ. ສ່ວນວ່າໃນດ້ານການທະຫານກໍ ໄດ້ເປີດບັ້ນຮົບທັງຕີຕ້ານ, ທັງຍາດແຍ່ງຍຶດເອົາພື້ນທີ່ຂອບເຂດຂອງການປະຕິວັດຈົນສາມາດກວມເອົາສອງສ່ວນສາມ ຂອງປະເທດ.

ໃນສອງໄລຍະທີ່ໄດ້ຍົກມານັ້ນ, ເບິ່ງຄືວ່າທຸກສິ່ງທຸກຢ່າງມັນເປັນໃຈອິດສະລະກັບເປັນໃຈແນວລາວສ້າງຊາດ,  ເປັນຫຍັງຈຶ່ງວ່າແນວນັ້ນ ? ຍ້ອນວ່າຕີເສິກຢູ່ບ່ອນໃດກໍມີແຕ່ຍາດເອົາໄຊຊະນະມາຢູ່ໃນກຳມື. ຕາມເຮົາວ່າ ອັນນີ້ມັນກໍ ບໍ່ມີຫຍັງແປກປະຫລາດ, ແຕ່ມັນເປັນຍ້ອນພວກເຮົາມີແນວທາງອັນເປັນທຳຖືກຕ້ອງສອດຄ່ອງ ແລະ ເພື່ອຄວາມສຸກ ຄວາມຈະເລີນຂອງບ້ານເມືອງເປັນທີ່ຕັ້ງ.

ມາຮອດປີ 1975 ພວກເຮົາກໍສາມາດປົດປ່ອຍປະເທດໄດ້ຢ່າງສົມບູນ, ລົ້ມລ້າງລະບອບລາຊາທິປະໄຕ ນັບທັງ ອຳນາດການປົກຄອງເກົ່າທີ່ຫລ້າຫລັງແລ້ວປະກາດຊື່ຂອງປະເທດໃໝ່ ຄືສາທາລະນະລັດ ປະຊາທິປະໄຕ ປະຊາຊົນ ລາວ. ນັບແຕ່ມື້ນັ້ນມາເຖິງປັດຈຸບັນເປັນເວລາ 40 ກວ່າປີແຫ່ງການປົກປັກຮັກສາ ແລະ ສ້າງສາປະເທດຊາດບວກ  ກັບໄລຍະແຫ່ງການຕໍ່ສູ້ປະຕິວັດກໍເປັນເວລາ 60 ກວ່າປີ, ພັກເຮົາໄດ້ຍືນຍົງຄົງຕົວເຂັ້ມແຂງ ແລະ ພວມກ້າວເດີນໄປ ຕາມເສັ້ນທາງອັນສະຫວ່າງສະໄຫວແຫ່ງຍຸກສະໄໝ. ສອງໄລຍະປະຫວັດສາດພາຍໃຕ້ການນຳພາຂອງພັກໄດ້ແກະກ່ອງປະຫວັດສາດພິສູດຕົນເອງວ່າພວກເຮົາຍັງແຂງແກ່ນເໝືອນເຫລັກກ້າ, ຍັງເປັນອັດສະວິນແຫ່ງຍຸກສະໄໝຢ່າງ  ໝັ້ນຄົງຖາວອນ.