ມາກ ຊັກເຄີເບິກ ລວຍແສນລ້ານໂດລາ ຂຶ້ນແທ່ນມະຫາເສດຖີອັນດັບ 3 ຂອງໂລກ
ມາກ ຊັກເຄີເບິກ ກາຍເປັນ 1 ໃນ 3 ມະຫາເສດຖີໂລກ ທີ່ມີຊັບສິນ 100.000 ລ້ານໂດລາສະຫະລັດ.
ສຳນັກຂ່າວ Bloomberg ເປີດເຜີຍການຈັດອັນດັບມະຫາເສດຖີ (Bloomberg Billionaires Index) ຫລ້າສຸດພົບວ່າ: ມາກ ຊັກເຄີເບິກ ຜູ້ສ້າງຕັ້ງເຟສບຸກ ມີຊັບສິນເພີ່ມຂຶ້ນມາ 100.000 ລ້ານໂດລາສະຫະລັດແລ້ວ ຫລັງຈາກມູນຄ່າຫຸ້ນເຟສບຸກເພີ່ມຂຶ້ນ 6,5% ໃນວັນທີ 6 ສິງຫາຜ່ານມາຕາມເວລາທ້ອງຖິ່ນ ຈາກການເປີດຕົວແອັບພລິເຄຊັນ Reels ສຳລັບໂພສວິດີໂອສັ້ນໆຄືກັບ TikTok.
ເໝາະກັບໄລຍະ COVID-1 ລະບາດ ເຮັດໃຫ້ມີຜູ້ໃຊ້ເຟສບຸກເພີ່ມຂຶ້ນ ໂດຍເຟສບຸກເປີດເຜີຍວ່າ: ປັດຈຸບັນມີຜູ້ໃຊ້ເຟສບຸກ, ວອດແອັບ ແລະ ອິນສະຕາແກຣມລວມທັງໝົດ 3.000 ລ້ານບັນຊີ ເຮັດໃຫ້ເຟສບຸກມີລາຍໄດ້ເພີ່ມຂຶ້ນ.
ຖ້ານັບແຕ່ຕົ້ນປີຜ່ານມາ ມູນຄ່າຫຸ້ນຂອງເຟສບຸກເພີ່ມຂຶ້ນເຖິງ 30% ສົ່ງຜົນໃຫ້ ຊັກເຄີເບິກ ມີຊັບສິນເພີ່ມຂຶ້ນ 22.000 ລ້ານໂດລາສະຫະລັດ ຈາກຫຸ້ນ 13% ໃນບໍລິສັດ.
ທັງນີ້ ມະຫາເສດຖີທົ່ວໂລກທີ່ມີຊັບສິນຢ່າງໜ້ອຍ 100.000 ລ້ານໂດລາສະຫະລັດ (centibillionaire) ນອກຈາກ ຊັກເຄີເບິກ ແລ້ວ ມີອີກພຽງ 2 ຄົນເທົ່ານັ້ນ ໄດ້ແກ່ ເຈຟ ເບໂຊສ ແຫ່ງ Amazon ແລະ ບິລ ເກດ ຈາກ Microsoft.
