New Normal ໃນການຊຳລະ ສະສາງ ແລະ ການເກັບລາຍຮັບຜ່ານລະບົບໂທລະສັບມືຖື

ໃນວັນທີ 3 ສິງຫາ 2020, ໄດ້ມີກອງປະຊຸມ ເພື່ອຕິດຕາມຄວາມຄືບໜ້າການຈັດຕັ້ງປະຕິບັດວຽກງານຂອງ ຄະນະສະເພາະກິດ ການຫັນເປັນທັນສະໄໝ ໃນການຊຳລະສະສາງ ແລະ ການເກັບລາຍຮັບເຂົ້າງົບປະມານ ຜ່ານລະບົບໂທລະສັບມືຖື ໂດຍການເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີ ກະຊວງການເງິນ, ມີ ທ່ານ ທັນສະໄໝ ກົມມະສິດ ລັດຖະມົນຕີ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ແລະ ບັນດາ ຄະນະສະເພາະກິດດັ່ງກ່າວ ເຂົ້າຮ່ວມ.

ການຊຳລະສະສາງແບບດີຈີຕອນ ຫລື ການຊຳລະສະສາງຜ່ານລະບົບໂທລະສັບມືຖື ເປັນປັດໄຈໜຶ່ງທີ່ສຳຄັນ ໃນການສົ່ງເສີມ ແລະ ອຳນວຍຄວາມສະດວກໃຫ້ແກ່ພໍ່ແມ່ປະຊາຊົນ ໃນສະພາບການລະບາດຂອງພະຍາດໂຄວິດ-19 ແລະ ການນໍາໃຊ້ຊີວິດໃນຍຸກ New Normal ນີ້. ນອກຈາກນັ້ນ, ຍັງຈະເປັນເຄື່ອງມືໜຶ່ງ ທີ່ສາມາດຊ່ວຍໃຫ້ລັດຖະບານເກັບລາຍຮັບເຂົ້າງົບປະມານ ໄດ້ຢ່າງມີປະສິດຕິພາບ ອີກດ້ວຍ.

ກອງປະຊຸມດັ່ງກ່າວ, ຜູ້ເຂົ້າຮ່ວມໄດ້ຮັບຟັງການລາຍງານຄວາມຄືບໜ້າ ຕໍ່ກັບວຽກງານການສ້າງແຜນແມ່ບົດເສດຖະກິດດີຈີຕອນຂອງ ສປປ ລາວ, ແຜນແມ່ບົດການຫັນໄປສູ່ການຊຳລະສະສາງແບບດີຈີຕອນ, ເຊິ່ງບັນດາແຜນເຫລົ່ານີ້ ຈະເປັນບ່ອນອີງທີ່ສຳຄັນ ໃນການຈັດຕັ້ງປະຕິບັດການຫັນເປັນທັນສະໄໝໃນການຊຳລະສະສາງ ແລະ ເກັບລາຍຮັບເຂົ້າງົບປະມານ ຜ່ານລະບົບໂທລະສັບມືຖື. ພ້ອມນີ້, ຍັງໄດ້ຮັບຟັງລາຍງານຄວາມພ້ອມ ທາງດ້ານເຕັກນິກ ເພື່ອເຊື່ອມຕໍ່ພື້ນຖານໂຄງລ່າງຂອງ ທະນາຄານ, ກະຊວງການເງິນ ແລະ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ເພື່ອຫັນການຊຳລະສະສາງ ໃຫ້ເປັນທັນສະໄໝ.

ນອກຈາກນີ້, ກອງປະຊຸມ ຍັງໄດ້ມີການແລກປ່ຽນຄຳຄິດຄຳເຫັນຢ່າງກົງໄປກົງມາ ແນໃສ່ໃຫ້ສາມາດຈັດຕັ້ງປະຕິບັດວຽກງານດັ່ງກ່າວ ໃຫ້ໄດ້ຮັບປະສິດຕິພາບ ແລະ ປະສິດຕິຜົນສູງສຸດ.