ອຸດົມໄຊ ຈະສຸມໃສ່ພັດທະນາເສດຖະກິດ-ສັງຄົມ ຕາມທິດ 4 ໃຈກາງ 3 ຕະຫລາດ
ປັດຈຸບັນ ແຂວງອຸດົມໄຊ ມີທ່າແຮງຫລາຍດ້ານ ຜັກດັນເຮັດໃຫ້ເສດຖະກິດຂອງແຂວງ ມີການຂະຫຍາຍຕົວຢ່າງຕໍ່ເນື່ອງ ເປັນຕົ້ນ ດ້ານກະສິກຳ, ອຸດສາຫະກຳ ແລະ ການບໍລິການ, ເຊິ່ງໃນຕໍ່ໜ້າ ແຂວງອຸດົມໄຊ ຈະສຸມໃສ່ພັດທະນາເສດຖະກິດ-ສັງຄົມ ຕາມທ່າແຮງຢ່າງເຕັມສ່ວນ ເພື່ອພັດ ທະນາແຂວງອຸດົມໄຊ ຕາມທິດ 4 ໃຈກາງ ແລະ 3 ຕະຫລາດ ຄື: ໃຈກາງທາງດ້ານປ້ອງກັນຊາດ-ປ້ອງກັນຄວາມສະຫງົບ, ໃຈກາງທາງດ້ານເສດຖະກິດ, ໃຈກາງທາງດ້ານວັດທະນະທຳ-ສັງຄົມ ແລະ ໃຈກາງທາງດ້ານການບໍລິການ-ການທ່ອງທ່ຽວ, ຕິດພັນກັບການປົກປັກຮັກສາສິ່ງແວດລ້ອມ, ສົ່ງເສີມການຜະລິດເປັນສິນຄ້າທີ່ມີເງື່ອນໄຂ ແລະ ທ່າແຮງ, ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນໃຫ້ທົ່ວເຖິງຢ່າງແຂງແຮງ, ຖືເອົາຍຸດທະສາດຂອງການພັດທະນາຕົ້ນຕໍ 3 ຕະ ຫລາດ ຄື: ຕະຫລາດຜົນຜະລິດ, ຕະຫລາດທຶນ ແລະ ຕະຫລາດແຮງງານ ໃຫ້ບັນລຸຕາມເປົ້າໝາຍ.
ທ່ານ ສົມຈິດ ປັນຍາສັກ ຄະນະປະຈໍາພັກແຂວງອຸດົມໄຊ ໄດ້ລາຍງານໃຫ້ຮູ້ ໃນກອງປະຊຸມໃຫຍ່ອົງຄະນະພັກແຂວງອຸດົມໄຊ ຄັ້ງທີ IX ທີ່ໄດ້ຈັດຂຶ້ນ ໃນລະຫວ່າງ ວັນທີ 24-25 ກໍລະກົດ 2020 ນີ້ວ່າ: ເສດຖະກິດມະຫາພາກຂອງແຂວງອຸດົມໄຊ ໄດ້ສືບຕໍ່ຂະຫຍາຍຕົວຢ່າງຕໍ່ເນື່ອງ ສະເລ່ຍ 5 ປີ ໃນລະດັບ 7,35%, ມາຮອດປີ 2020 ລວມຍອດຜະລິດຕະພັນພາຍໃນ ບັນລຸ 3.635 ຕື້ກີບ ທຽບໃສປີ 2015 ເພີ່ມຂຶ້ນ 9%, ອັດຕາການຂະຫຍາຍຕົວແມ່ນ 6,50% ລາຍຮັບສະເລ່ຍຕໍ່ຫົວຄົນ 1.210 ໂດລາ ຕໍ່ຄົນຕໍ່ປີ, ອັດຕາເງິນເຟີ້ໂດຍສະເລ່ຍ 5 ປີຜ່ານມາ ຢູ່ໃນລະດັບ 1,96%, ສ່ວນການລະດົມທຶນເຂົ້າໃສ່ການພັດທະນາເສດຖະກິດ-ສັງຄົມ ຂອງແຂວງອຸດົມໄຊ ໄດ້ທັງໝົດ 4.898,54 ຕື້ກີບ, ການເກັບລາຍຮັບໃນ 5 ປີຜ່ານມາ, ບັນລຸໄດ້ 659,43 ຕື້ກີບ, ສ່ວນການຄຸ້ມຄອງລາຍຈ່າຍຢູ່ທີ່ 2.258,81 ຕື້ກີບ, ການສົ່ງອອກປະຕິບັດໄດ້ 677,45 ຕື້ກີບ, ການນຳເຂົ້າ 239,31 ຕື້ກີບ ແລະ ມູນຄ່າຈໍລະຈອນສິນຄ້າຂາຍຍົກ, ຂາຍຍ່ອຍ ແລະ ເກັບຊື້ພາຍໃນບັນລຸໄດ້ 6.906,42 ຕື້ກີບ.
ພ້ອມດຽວກັນນັ້ນ, ດ້ານກະສິກຳ ມາຮອດປີ 2020 ທົ່ວແຂວງ ມີເນື້ອທີ່ປູກເຂົ້າທັງໝົດ 25.703 ເຮັກຕາ, ຜົນຜະລິດໄດ້ 89.066 ໂຕນ, ທຽບໃສ່ປີ 2015 ຜົນຜະລິດເພີ່ມຂຶ້ນ 3,6%, ພືດສະບຽງອາຫານ ສາມາດຜະລິດໄດ້ 251.789 ໂຕນ, ສະເລ່ຍ 50.358 ໂຕນຕໍ່ປີ, ການຜະລິດເປັນສິນຄ້າບັນລຸໄດ້ 1.748.526 ໂຕນ, ສະເລ່ຍ 349.705 ໂຕນຕໍ່ປີ, ສຳລັບ ການຄຸ້ມຄອງປ່າໄມ້ກໍມີຄວາມຄືບໜ້າ ຊຶ່ງປັດຈຸບັນ ທົ່ວແຂວງມີເນື້ອທີ່ປ່າໄມ້ 781.245 ເຮັກຕາ ແລະ ຟື້ນຟູປ່າໄມ້ແບບທຳມະຊາດໄດ້ 58.060 ເຮັກຕາ, ຊົນລະປະທານ ກໍສາມາດສະໜອງນໍ້າໃຫ້ແກ່ການຜະລິດທັງລະດູແລ້ງ ແລະ ລະດູຝົນ. ສ່ວນດ້ານການສຶກສາ ໃນທົ່ວແຂວງມີໂຮງຮຽນສາມັນ ທັງໝົດ 671 ແຫ່ງ, ທຽບໃສ່ປີ 2015 ເພີ່ມຂຶ້ນ 49 ແຫ່ງ, ມີໂຮງຮຽນວິຊາຊີບ 1 ແຫ່ງ ແລະ ວິທະຍາໄລເອກະຊົນ 3 ແຫ່ງ, ສາ ມາດບັນລຸ 9 ຄາດໝາຍຂອງວຽກງານສຶກສາ ແລະ ບັນລຸ 8 ຄາດໝາຍຂອງວຽກງານສາທາລະນະສຸກ ໂດຍມີຕາໜ່າງບໍລິການຄື ໂຮງໝໍແຂວງ 1 ແຫ່ງ, ໂຮງໝໍທະຫານ 2 ແຫ່ງ, ໂຮງໝໍເມືອງ 6 ແຫ່ງ, ໂຮງໝໍນ້ອຍ 53 ແຫ່ງ, ໂຮງໝໍເອກະຊົນ 1 ແຫ່ງ, ຫ້ອງກວດພະຍາດເອກະຊົນ 27 ແຫ່ງ, ຮ້ານຂາຍຢາເອກະຊົນ 71 ຮ້ານ ແລະ ຕູ້ຢາປະຈຳບ້ານ 311 ຕູ້.
ສຳລັບ ທິດທາງແຜນການ 5 ປີໃນຕໍ່ໜ້າ ແຂວງອຸດົມໄຊ ມີທິດທາງແຜນການ ຕາມຄຳຂວັນ “ສ້າງແຂວງອຸດົມໄຊ ໃຫ້ກາຍເປັນໃຈກາງເຊື່ອມຈອດ-ເຊື່ອມຕໍ່ກັບພາຍໃນ ແລະ ສາກົນ ສູ້ຊົນອອກຈາກຄວາມດ້ອຍພັດທະນາໃນປີ 2025 ດ້ວຍການປະຕິບັດ 4 ໃຈກາງພັດທະນາ-ຮັກສາສິ່ງແວດລ້ອມໃຫ້ເປັນສີຂຽວ ແລະ ຍືນຍົງໃນປີ 2030”, ສູ້ຊົນເຮັດໃຫ້ເສດຖະກິດຂອງແຂວງ ຂະຫຍາຍຕົວໃນລະດັບ 7,5% ລວມຍອດມູນຄ່າຜະລິດຕະພັນພາຍໃນ (GDP) ໃຫ້ບັນລຸ 5,442,39 ຕື້ກີບ ລາຍໄດ້ສະເລ່ຍຕໍ່ຫົວຄົນ 1.720 ໂດລາສະຫະລັດ, ໃນນັ້ນ, ຂະແໜງກະສິກໍາ ແລະ ປ່າໄມ້ ຂະຫຍາຍຕົວ 6,35% ກວມເອົາ 30,21% ຂອງ GDP; ຂະແໜງອຸດສາຫະກໍາ ຂະຫຍາຍຕົວ 4,02% ກວມເອົາ 31,61% ຂອງ GDP; ຂະແໜງບໍລິການ – ຂະຫຍາຍຕົວ 14,34% ກວມເອົາ 35,67% ຂອງ GDP; ພາສີອາກອນ ຜະລິດຕະພັນ ແລະ ຂາເຂົ້າ ຂະຫຍາຍຕົວ 10,89% ກວມເອົາ 2,51% ຂອງ GDP.
ຫນັງສືພິມລາວພັດທະນາ
