ກອງປະຊຸມໃຫຍ່ຜູ້ແທນອົງຄະນະພັກແຂວງອຸດົມໄຊ ຄັ້ງທີ Ⅸ ປິດລົງດ້ວຍຜົນສຳເລັດອັນຈົບງາມ
ກອງປະຊຸມໃຫຍ່ຜູ້ແທນອົງຄະນະພັກແຂວງອຸດົມໄຊ ຄັ້ງທີ Ⅸ ໄດ້ປິດລົງດ້ວຍຜົນສຳ ເລັດອັນຈົບງາມ, ທັງຖືກຕ້ອງຕາມກົດລະບຽບຂອງພັກ, ແລະ ເຕັມໄປດ້ວຍເນື້ອໃນຄວາມໝາຍສໍາຄັນ, ຮັກສາໄດ້ຄວາມໂປ່ງໃສ, ເປັນລະບຽບຮຽບຮ້ອຍ, ຄວາມສະຫງົບ, ປອດໄພພາຍ ຫລັງດຳເນີນມາແຕ່ວັນທີ 24-25 ກໍລະກົດ 2020 ໂດຍມີ ສະຫາຍ ພັນຄໍາ ວິພາວັນ ກໍາມະການກົມການເມືອງສູນກາງພັກ, ຜູ້ປະຈໍາການ ຄະນະເລຂາທິການສູນກາງພັກ, ຮອງປະທານປະເທດ, ມີຜູ້ແທນສົມບູນເຂົ້າຮ່ວມ 252 ສະຫາຍ, ຍິງ 38 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກໃນທົ່ວແຂວງ ຈຳນວນ 16.538 ສະຫາຍ.
ກອງປະຊຸມໃຫຍ່ຄັ້ງນີ້, ໄດ້ດໍາເນີນພາຍໃຕ້ຄໍາຂັວນ: “ຍົກສູງຄວາມສາມາດນໍາພາ ແລະ ຄວາມເປັນແບບຢ່າງນໍາໜ້າ ຂອງອົງຄະນະພັກແຂວງ, ເພີ່ມທະວີຄວາມສາມັກຄີເປັນເອກະພາບພາຍໃນພັກ ແລະ ທົ່ວປວງຊົນ, ສ້າງການຫັນປ່ຽນໃໝ່ຢ່າງຮອບດ້ານ, ສຸມທຸກກໍາລັງແຮງພັດທະນາອຸດົມໄຊຕາມ 4 ໃຈກາງ ໃຫ້ມີພື້ນຖານອັນໜັກແໜ້ນ, ກ້າວຂຶ້ນຕາມທິດສັງຄົມນິຍົມ ”. ກອງປະຊຸມໄດ້ພ້ອມກັນຄົ້ນຄ້ວາ, ປະກອບຄໍາເຫັນພິຈາລະນາຢ່າງເລິກເຊິ່ງ ແລະ ເປັນເອກະສັນກັນ ຮັບຮອງເອົາບົດລາຍງານການເມືອງ, ແຜນພັດທະນາເສດຖະກິດ-ສັງຄົມ 5 ປີຄັ້ງທີ IX ແຕ່ນີ້ເຖິງປີ 2025, ພ້ອມກັນນັ້ນກອງປະຊຸມໄດ້ເປັນເອກະພາບ ຕໍ່ການຕີລາຄາດ້ານອອ່ນ-ຂໍ້ຄົງຄ້າງ, ສາເຫດ ແລະ ບົດຮຽນຖອດຖອນໄດ້ ທີ່ໄດ້ຍົກໃນລາຍງານການເມືອງ ແລະ ແຜນພັດທະນາເສດຖະກິດ-ສັງຄົມ, ໄດ້ເປັນເອກະພາບຮັບຮອງເອົາບັນດາຄາດໝາຍລວມ, ທິດທາງ, ໜ້າທີ່ລວມ ແລະ ຄາດໝາຍສູ້ຊົນໃນ 5 ປີ ຕໍ່ໜ້າ (2021-2025) ທີ່ໄດ້ກຳນົດຢູ່ໃນລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ບົດສຳຫລວດການນຳພາລວມ ຂອງຄະນະບໍລິຫານງານພັກແຂວງ ສະໄໝທີ VIII ຢ່າງເປັນເອກະພາບ. ພ້ອມກັນນັ້ນ, ບັນດາຜູ້ແທນສົມບູນ ກໍໄດ້ໃຊ້ສິດປະຊາທິປະໄຕ ເພື່ອປ່ອນບັດເລືອກຕັ້ງເອົາຄະນະບໍລິຫານງານພັກແຂວງຊຸດໃໝ່ ເຊິ່ງມີຜູ້ອອກຮັບສະໝັກທັງໝົດ 38 ສະຫາຍ, ຍິງ 8 ສະຫາຍ, ເລືອກໄດ້ 33 ສະຫາຍ, ຍິງ 6 ສະຫາຍ, ເຊິ່ງບັນດາສະຫາຍ ທີ່ໄດ້ຮັບການເລືອກຕັ້ງຊຸດນີ້ ລ້ວນແຕ່ມີປະສົບການໃນການຊີ້ນໍາ-ນໍາພາ, ມີຄວາມຮູ້, ຄວາມສາມາດ, ມີຄວາມຫ້າວຫັນ, ມີຄຸນສົມບັນສິນທໍາປະຕິວັດ ແລະ ໜັກແໜ້ນທາງດ້ານການເມືອງ ເພື່ອເປັນຫລັກແຫລ່ງແກ່ນສານ ສືບຕໍ່ນໍາພາຈັດຕັ້ງປະຕິບັດໜ້າທີ່ການເມືອງກໍຄື ພາລະກິດການປົກປັກຮັກສາ ແລະ ສ້າງສາພັດທະນາແຂວງອຸດົມໄຊ ໃນ 5 ປີຕໍ່ໜ້າ.
ຜ່ານການດຳເນີນກອງປະຊຸມຄັ້ງປະຖົມມະລຶກ ຂອງຄະນະບໍລິຫານງານພັກແຂວງອຸດົມໄຊ ຄັ້ງທີ Ⅸໄດ້ເລືອກຕັ້ງເອົາຄະນະປະຈຳພັກແຂວງ ຈຳນວນ 11 ສະຫາຍ, ຍິງ 1 ສະຫາຍໂດຍໄດ້ເຫັນດີເປັນເອກະພາບກັນ ເລືອກເອົາ ສະຫາຍ ຄຳພັນ ເຜີຍຍະວົງ ເປັນເລຂາຄະນະບໍລິຫານງານພັກແຂວງອຸດົມໄຊ ຄັ້ງທີ Ⅸ, ສະຫາຍຄຳພຽງ ຢາຈົງວາ ເປັນຮອງເລຂາຄະນະບໍລິຫານງານພັກແຂວງ, ສະຫາຍ ບຸນຄົງຫລ້າຈຽມພອນ ເປັນຮອງເລຂາຄະນະບໍລິຫານງານພັກແຂວງ ແລະ ໄດ້ເລືອກຕັ້ງເອົາ ສະຫາຍ ນາງ ຈັນສະໝອນ ທິບພະຫົງ ເປັນປະທານຄະນະກວດກາພັກແຂວງ, ສະຫາຍ ຈໍາປາ ສີດາຄໍາເປັນຮອງປະທານຄະນະກວດກາພັກແຂວງ, ສະຫາຍ ນາງ ສົມຫວັງ ໄຊຍະຕິ ເປັນຮອງປະທານຄະນະກວດກາພັກແຂວງ, ສະຫາຍ ທະນຸໄຊ ເລືອງສະຫວັດ ເປັນຮອງປະທານຄະນະກວດ ກາພັກແຂວງອຸດົມໄຊ. ພ້ອມນັ້ນ, ກອງປະຊຸມຍັງໄດ້ປ່ອນບັດເລືອກເອົາຜູ້ແທນສົມບູນ ແລະ ສຳຮອງ ໄປເຂົ້າຮ່ວມກອງປະຊຸມໃຫຍ່ຄັ້ງທີ XI ຂອງພັກ ທີ່ຈະຈັດຂຶ້ນໃນຕໍ່ໜ້າ ເຊິ່ງມີ 31 ສະຫາຍ, ເລືອກເອົາ 25 ສະຫາຍ, ໃນນັ້ນຜູ້ແທນສົມບູນ 25 ສະຫາຍ, ຍິງ 4 ສະຫາຍ, ຜູ້ແທນສຳຮອງ 3 ສະ ຫາຍ, ຍິງ 1 ສະຫາຍ.
ໂອກາດດັ່ງກ່າວ, ສະຫາຍ ພັນຄໍາ ວິພາວັນ ໄດ້ມີຄຳເຫັນໂອ້ລົມ ໂດຍໄດ້ສະແດງຄວາມຊົມເຊີຍ ຕໍ່ຜົນສຳເລັດຂອງກອງປະຊຸມ ໃນຄັ້ງນີ້, ພ້ອມທັງເນັ້ນໃຫ້ຄະນະບໍລິຫານງານພັກແຂວງຊຸດໃໝ່ຫັນເອົາມະຕິກອງປະຊຸມໃຫຍ່ຄັ້ງນີ້ ໃຫ້ເປັນແຜນງານ, ໂຄງການ ແລະ ສ້າງເປັນນິຕິກໍາລະອຽດ ເພື່ອຈັດຕັ້ງການເຜີຍແຜ່ເຊື່ອມຊຶມ, ໂດຍເລີ່ມແຕ່ຄະນະບໍລິຫານງານພັກແຂວງ ຈົນເຖິງບັນດາເມືອງ, ຂະ ແໜງການ ແລະ ຮາກຖານຕ່າງໆໃຫ້ທົ່ວເຖິງ ເພື່ອສ້າງຄວາມຮັບຮູ້ເຂົ້າໃຈ ແລະ ເປັນເອກະພາບ ກັນກັບແນວທາງນະໂຍບາຍທີ່ວາງອອກ, ກໍຄື ມະຕິກອງປະຊຸມໃຫຍ່ຄັ້ງນີ້, ໃຫ້ເອົາໃຈໃສ່ຕໍ່ວຽກງານຂົນຂວາຍ, ຍາດແຍ່ງ, ດຶງດູດການຊ່ວຍເຫລືອ ແລະ ລົງທຶນ ຈາກທຸກພາກສ່ວນທຸລະກິດທັງພາຍໃນ ແລະ ຕ່າງປະເທດ ເຂົ້າໃນການພັດທະນາແຂວງອຸດົມໄຊ ໃຫ້ນັບມື້ນັບເພີ່ມຂຶ້ນ ຕິດພັນກັບສ້າງເງື່ອນໄຂຄວາມສະດວກ ແລະ ມີນະໂຍບາຍຊຸກຍູ້, ສົ່ງເສີມທີ່ເໝາະສົມ. ໃຫ້ຄະນະບໍລິຫານງານພັກແຂວງຊຸດໃໝ່ ຮີບຮ້ອນແບ່ງວຽກ, ແບ່ງຄວາມຮັບຜິດຊອບ ລະຫວ່າງ ຄະນະປະຈໍາ, ຄະນະບໍລິຫານງານພັກແຂວງ ໃຫ້ລະອຽດ, ຈະແຈ້ງ ຕິດພັນກັບການປັບປຸງລະບອບແບບແຜນວິທີເຮັດວຽກ, ການປະຕິບັດຫລັກການລວມສູນ ປະຊາທິປະໄຕ ນໍາພາເປັນໝູ່ຄະນະ, ບຸກຄົນຮັບຜິດຊອບຢ່າງຈະແຈ້ງ, ແນໃສ່ຫັນປ່ຽນແນວຄິດຈິນຕະນາການໃໝ່ ເປັນເຈົ້າການເຊີດຊູຈິດໃຈເອກະລາດ ເປັນເຈົ້າຕົນເອງ, ເພິ່ງຕົນເອງ, ສ້າງຄວາມ ເຂັ້ມແຂງດ້ວຍຕົນເອງ, ຕັ້ງໜ້າປຸກລະດົມທຸກກໍາລັງແຮງຂອງທົ່ວປວງຊົນ ເຂົ້າຮ່ວມໃນການປົກປັກຮັກສາ ແລະພັດທະນາແຂວງ ຕາມ 4 ໃຈກາງ ຢ່າງໜັກແໜ້ນ ແນໃສ່ສ້າງກໍາລັງແຮງໃນການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ 5 ປີ ຂອງແຂວງໃຫ້ບັນລຸຜົນສໍາເລັດຕາມຄາດໝາຍທີ່ວາງໄວ້ ທັງເຮັດໃຫ້ແຂວງມີຄວາມໜັກແໜ້ນທາງດ້ານການເມືອງ, ເຂັ້ມແຂງທາງດ້ານປ້ອງກັນຊາດ-ປ້ອງກັນຄວາມສະຫງົບ, ອຸດົມຮັ່ງມີທາງດ້ານເສດຖະກິດ ແລະ ຈະເລີນກ້າວ ຫນ້າທາງດ້ານວັດທະນະທໍາ-ສັງຄົມ, ກາຍເປັນແຂວງທີ່ມັ່ງຄັ້ງເຂັ້ມແຂງ ແລະ ທັນສະໄໝໃນອະນາ ຄົດ.
