ອິນໂດເນເຊຍກຽມເປັນປະເທດຫລ້າສຸດ ທີ່ມີຜູ້ຕິດໂຄວິດ-19 ເຖິງ 1 ແສນຄົນ ລະບາດໜັກສຸດໃນອາຊຽນ
ວັນທີ 27 ກໍລະກົດ, ປະເທດຮ່ວມອາຊຽນຂອງລາວຄືອິນໂດເນເຊຍ ກຽມເປັນປະເທດຫລ້າສຸດປະເທດທີ 24 ຂອງໂລກທີ່ມີຜູ້ຕິດໂຄວິດ-19 ເຖິງ 1 ແສນຄົນ ໂດຍຍອດຕິດເຊື້ອສະສົມມີ 98.778 ຄົນ, ເສຍຊີວິດແລ້ວ 4.700 ກວ່າຄົນ ລະບາດໜັກສຸດໃນອາຊຽນ.
ຕາມຫລັງມາແມ່ນຟີລິບປິນ (80.448 ຄົນ), ສິງກະໂປ (50.369 ຄົນ), ມາເລເຊຍ (8.897 ຄົນ) ແລະ ໄທ (3.291 ຄົນ) ໂດຍບຣູໄນ ແລະ ຕິມໍເລສເຕ ເປັນ 2 ປະເທດໃນເຂດອາຊຽນທີ່ພົບຜູ້ຕິດເຊື້ອ ແຕ່ໄດ້ຮັບການປິ່ນປົວຈົນປອດໂຄວິດ-19 ແລ້ວໃນປັດຈຸບັນ ແລະ ຍັງບໍ່ພົບລາຍງານຜູ້ຕິດເຊື້ອໃໝ່ເພີ່ມຕື່ມ.
ການແຜ່ລະບາດຂອງໂຄວິດ-19 ກຳລັງກ້າວເຂົ້າສູ່ເດືອນທີ 7 ທົ່ວໂລກມີຜູ້ຕິດເຊື້ອສະສົມເກີນ 16,4 ລ້ານຄົນແລ້ວ (16.412.794 ຄົນ), ປິ່ນປົວຫາຍກວ່າ 10 ລ້ານຄົນ (10.042.362 ຄົນ) ຫລື ເກືອບ 2 ໃນ 3 ຂອງຜູ້ຕິດເຊື້ອທັງໝົດ, ເສຍຊີວິດແລ້ວ 652.039 ຄົນ ອັດຕາການເສຍຊີວິດປະມານ 4% ໂດຍພົບຜູ້ຕິດເຊື້ອເພີ່ມເກີນມື້ລະ 1 ແສນຄົນ ຕິດຕໍ່ກັນເຖິງ 61 ມື້ ນັບແຕ່ວັນທີ 27 ພຶດສະພາຜ່ານມາ.
ອາເມລິກາຍັງເປັນປະເທດທີ່ພົບຜູ້ຕິດເຊື້ອສະສົມຫລາຍທີ່ສຸດໃນໂລກ (4.371.839 ຄົນ) ຕາມມາແມ່ນເບຣຊິນ (2.419.091 ຄົນ), ອິນເດຍ (1.436.019 ຄົນ), ຣັດເຊຍ (812.485 ຄົນ) ແລະ ອາຟຣິກາໃຕ້ (445.433 ຄົນ) ໂດຍພົບຜູ້ຕິດເຊື້ອແລ້ວຢ່າງໜ້ອຍ 181 ຈາກ 193 ປະເທດ ເຊິ່ງທາງການ ສປປ ເກົາຫລີ ປະກາດພົບຜູ້ຕ້ອງສົງໄສຕິດໂຄວິດ-19 ຄົນທຳອິດໃນວັນທີ 26 ກໍລະກົດ.
