ບໍລິສັດ ສະຕາ ໂທລະຄົມ ສາຂາແຂວງບໍລິຄໍາໄຊ ເປິດນຳໃຊ້ຫ້ອງການຫລັງໃໝ່

ບໍລິສັດ ສະຕາ ໂທລະຄົມ ຈໍາກັດ (ຢູນີເທວ) ສາຂາບໍລິຄຳໄຊ ເປີດນຳໃຊ້ຫ້ອງການຫລັງໃໝ່ ຢູ່ບ້ານໂພນໄຊ ເມືອງປາກຊັນ ແຂວງບໍລິຄໍາໄຊ ໃນວັນທີ 23 ກໍລະກົດ 2020 ໂດຍມີ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ທ່ານ ພົຕ ອ່ອນສີ ແສນສຸກ ຮອງລັດຖະມົນຕີ ກະຊວງປ້ອງກັນປະເທດ, ທັງເປັນປະທານສະພາບໍລິຫານ ບໍລິສັດ ສະຕາໂທລະຄົມ, ທ່ານ ລິວ ແມັງ ຮ່າ ຜູ້ອຳນວຍ ການໃຫຍ່ ບໍລິສັດ ສະຕາ ໂທລະຄົມ ແລະ ອໍານວຍການຈາກ 6 ສາຂາແຂວງໃກ້ຄຽງ ເຂົ້າຮ່ວມ.

ທ່ານ ນາງ ດາວວອນ ເພັດສານຸພົນ ອຳນວຍການ ບໍລິສັດ ສະຕາ ໂທລະຄົມ ສາຂາແຂວງບໍລິຄຳໄຊ ໄດ້ກ່າວວ່າ: ສາຂາແຂວງບໍລິຄຳໄຊ  ເປັນຫົວໜ່ວຍໜຶ່ງຂຶ້ນກັບ ບໍລິສັດ ສະຕາໂທລະຄົມ ເຊິ່ງເປັນການຮ່ວມມື ລະຫວ່າງ ບໍລິສັດລັດວິສາຫະກິດ ລາວ-ເອເຊຍ ໂທລະຄົມ ຕາງໜ້າໃຫ້ຜູ້ຖືຫຸ້ນ ສປປ ລາວ, ຖືຫຸ້ນ 51%  ແລະ ບໍລິສັດ ຫວຽດເທວ ໂກໂລໂບ ຕາງໜ້າໃຫ້ຜູ້ຖືຫຸ້ນ ສສ. ຫວຽດນາມ ຖືຫຸ້ນ 49%, ໂດຍໄດ້ຮັບການອານຸຍາດໃຫ້ດຳເນີນທຸລະກິດຈາກ 2 ພັກ-ລັດຖະບານ, ສອງກະຊວງປ້ອງກັນປະເທດ ລາວ-ຫວຽດນາມ ແລະ ເລີ່ມຕົ້ນເຄື່ອນໄຫວດຳເນີນທຸລະກິດ ແຕ່ປີ 2008 ເປັນຕົ້ນມາ. ຜ່ານການເຄື່ອນໄຫວດໍາເນີນທຸລະກິດ 12 ປີ ຢູນີເທວ ໄດ້ຂະຫຍາຍເຄືອຂ່າຍໂທລະຄົມທີ່ກວ້າງຂວາງ ເຊິ່ງສາມາດຂະຫຍາຍໄດ້ຫລາຍກວ່າ 332 ສູນສະຖານີ. ໃນນັ້ນ; 2G ມີ 116 ສູນສະຖານນີ, 3G ມີ 101 ສູນສະຖານນີ, 4G ມີ 115 ສູນສະຖານນີ ມີລະບົບສາຍສົ່ງແກ້ວໄຍແສງຫລາຍກ່ວາ 1.337 ກມ, ມີສັນຍານເຂດປົກຄຸມກວມ 100% ບັນດາເມືອງ, 95% ຂອງພົນລະເມືອງທົ່ວແຂວງ, ມີລູກຄ້າມືຖືທັງໝົດ ຈຳນວນ 134.749 ລູກຄ້າ, ອິນເຕີເນັດແບບມີສາຍ ຈຳນວນ 2.156 ລູກຄ້າ, ມີຊ່ອງທາງຈຳໜ່າຍທີ່ກວ້າງຂວາງ, ມີ 5 ປ່ອງບໍລິການ, ມີຮ້ານຕົວແທນຈຳໜ່າຍ ແລະ ຈຸດຂາຍຍ່ອຍ 1.100 ຮ້ານ.

ທ່ານ ບີ ມົວໄຟດາເຍຍຈ່າ ຮອງຜູ້ອໍານວຍການໃຫຍ່ ຈັດຕັ້ງ-ບໍລິຫານ ບໍລິສັດ ສະຕາ ໂທລະຄົມ ໄດ້ກ່າວວ່າ: ຕະຫລອດໄລຍະ 12 ປີ ຢູນີເທວ ໄດ້ມີການພັດທະນາພື້ນຖານໂຄງລ່າງລະບົບເຄືອຂ່າຍໂທລະຄົມ ໃນຂອບເຂດທົ່ວປະເທດ ກັບເຕັກໂນໂລຊີທີ່ທັນສະໄໝຂອງໂລກ, ໄດ້ປະກອບສ່ວນໃນການສະໜອງບໍລິການ ທາງດ້ານໂທລະຄົມໃຫ້ກັບປະຊາຊົນລາວ, ໄປສູ່ເຂດຫ່າງໄກສອກຫລີກ ເພື່ອຮັບໃຊ້ສັງຄົມ ແລະ ເຮັດໃຫ້ຊີວິດການເປັນຢູ່ຂອງປະຊາຊົນ ນັບມື້ນັບສະດວກສະບາຍ ແລະ ໄດ້ກາຍເປັນບໍລິສັດໂທລະຄົມມະນາຄົມ ທີ່ນອນຢູ່ໃນລະດັບແຖວໜ້າຂອງ ສປປ ລາວ, ປັດຈຸບັນ ບໍລິສັດ ສະຕາໂທລະຄົມ ມີສູນ-ສະຖານນີ ຮັບສົ່ງມືຖືຈຳນວນ 8.000 ແຫ່ງ, ລະບົບສາຍສົ່ງແກ້ວໄຍແສງ 34.000 ກິໂລແມັດ, ລູກຄ້າທັງການ ນຳພັກ-ລັດ ແລະ ລູກຄ້າທົ່ວໄປຈຳນວນ 3.3 ລ້ານເລກໝາຍ, ຜູ້ນຳໃຊ້ອິນເຕີເນັດຄວາມໄວສູງ ຈຳນວນ 40.792 ລູກຄ້າ, ລາຍຮັບລວມຍອດບັນລຸໄດ້ 1300 ລ້ານໂດລາສະຫະລັດ, ມອບພັນທະໃຫ້ລັດຖະບານຈໍານວນ 650 ລ້ານໂດລາສະຫະລັດ ແລະ ຊ່ວຍເຫລືອສັງຄົມຈໍານວນ 12 ລ້ານໂດລາສະຫະລັດ.