ມຽນມາຈະເປັນອີກປະເທດໃນອາຊີ ທີ່ສົ່ງດາວທຽມຂຶ້ນສູ່ວົງໂຄຈອນ
ມຽນມາກຳລັງກຽມຈະສົ່ງດາວທຽມໜ່ວຍທຳອິດຂຶ້ນສູ່ວົງໂຄຈອນ ຮ່ວມກັບກຸ່ມພັນທະມິດປະເທດນ້ອງໃໝ່ໃນວົງການອະວະກາດ ໂດຍມີເປົ້າໝາຍເພື່ອປົກປ້ອງຄົນນັບລ້ານຈາກຫາຍະນະດ້ານສິ່ງແວດລ້ອມ.
ກຸ່ມດາວຊູເປີທີ່ຈະເກີດຂຶ້ນໃນອະນາຄົດ ເຊິ່ງເປັນກຸ່ມຂອງດາວທຽມຂະໜາດນ້ອຍ ຈາກ 9 ປະເທດໃນອາຊີ ຈະຕິດຕາມໄຕ້ຝຸ່ນ, ແຜ່ນດິນໄຫວ ແລະ ການໄຫລຂອງນ້ຳ ລວມທັງໃຫ້ຂໍ້ມູນກ່ຽວກັບການໃຊ້ທີ່ດິນ, ການເຕີບໃຫຍ່ຂອງພືດ ແລະ ການລະບາດຂອງພະຍາດ.
ໂຄງການດັ່ງກ່າວເປັນໂຄງການອະວະກາດໂຄງການທຳອິດຂອງມຽນມາ ເຊິ່ງເປັນປະເທດທີ່ມີການພັດທະນາທາງເສດຖະກິດນ້ອຍທີ່ສຸດໃນກຸ່ມ ເຊິ່ງມີຟີລິບປິນ, ຫວຽດນາມ ແລະ ອິນໂດເນເຊຍລວມຢູ່ນຳ. ຂະນະທີ່ອະທິການບໍດີມະຫາວິທະຍາໄລວິສະວະກຳອະວະກາດມຽນມາບອກວ່າ: ປະໂຫຍດຂອງການສຳຫລວດສະພາບແວດລ້ອມຈາກອະວະກາດຈະກຸ້ມກັບເງິນຫລາຍລ້ານໂດລາທີ່ມຽນມາໄດ້ຈ່າຍໄປ ແລະ ຍັງກ່າວວ່າ: ສ້າງດາວທຽມເອງຖືກກວ່າ ແລະ ເຕັກໂນໂລຊີຈະຊ່ວຍໃຫ້ເສດຖະກິດຂອງມຽນມາກ້າວກະໂດດໄປຂ້າງໜ້າ.
ຂະນະທີ່ເຈົ້າໜ້າທີ່ຈາກມະຫາວິທະຍາໄລຮອກໄກໂດ ເຊິ່ງເປັນໜຶ່ງໃນສອງສະຖາບັນຂອງຍີ່ປຸ່ນທີ່ເປັນຜູ້ນຳໂຄງການບອກວ່າ: ດຽວນີ້ເຕັກໂນໂລຊີດາວທຽມທີ່ເຄີຍເປັນເລື່ອງໃຫຍ່, ໜັກ ແລະ ແພງ ໄດ້ກາຍເປັນເລື່ອງເລັກໜ້ອຍ, ເບົາ ແລະ ສາມາດເຂົ້າເຖິງໄດ້. ພ້ອມລະບຸວ່າ: ປັດຈຸບັນ ໄນຈີເຣຍຄືສູນກາງຂອງໂລກໃນເລື່ອງການສ້າງເຕັກໂນໂລຊີດາວທຽມໃນລາຄາຖືກ.
