ຄິດໃໝ່ໄດ້ແລ້ວການດຳເນີນທຸລະກິດການທ່ອງທ່ຽວ
ການທ່ອງທ່ຽວຢູ່ບ້ານເຮົາເຖິງແມ່ນວ່າຈະມີການພັດທະນາແດ່ແລ້ວກໍຕາມ, ແຕ່ຍັງເຫັນວ່າເຮັດໄປຕາມພໍໃຜພໍລາວ, ບໍ່ທັນຈັດຕັ້ງເປັນເຄືອຂ່າຍ ຫຼື ເປັນຕ່ອງໂສ້ ນຳກັນ. ຍັງບໍ່ທັນຮວມຕົວເຂົ້າກັນເປັນສະມາຄົມ ໂດຍມີການສັນຍາຜູກພັນກັນ ເພື່ອສ້າງຄວາມເຂັ້ມແຂງໃຫ້ແຕ່ລະຊຸມຊົນ ຫຼື ຫົວໜ່ວຍທຸລະກິດຊຶ່ງກັນ ແລະ ກັນ.
ການຈັດຕັ້ງເປັນສະມາຄົມ ຫຼື ຈັດຕັ້ງເປັນເຄືອຂ່າຍ ຕ່ອງໂສ້ ແມ່ນມີຜົນດີຫຼາຍດ້ານ:
- ກ່ອນອື່ນໝົດ ເຮັດໃຫ້ການທ່ອງທ່ຽວຂອງລາວມີຄວາມເຂັ້ມແຂງຂຶ້ນ, ຫົວໜ່ວຍທຸລະກິດດ້ານການທ່ອງທ່ຽວພ້ອມກັນເຂັ້ມແຂງ ແລະ ພັດທະນາຕົນເອງໃຫ້ດີຂຶ້ນ.
- ມັນສາມາດກະຈາຍລາຍໄດ້ທົ່ວເຖິງກັນໃນແຕ່ລະຫົວໜ່ວຍທຸລະກິດ.
- ບໍ່ເກີດຂໍ້ຂັດແຍ້ງກັນລະຫວ່າຫົວໜ່ວຍທຸລະກິດການທ່ອງທ່ຽວດ້ວຍກັນ.
- ບໍ່ສ້າງຄວາມຫຍຸ້ງຍາກໃຫ້ນັກທ່ອງທ່ຽວ ໃນການຈະໄປທ່ອງທ່ຽວບ່ອນໃດບ່ອນໜຶ່ງ ແລະ ບໍ່ໄດ້ຄຶດວ່າຈະໄປບ່ອນໃດແດ່. ໝາຍຄວາມວ່າສ້າງຄວາມສະດວກສະບາຍ ເອື້ອຍອຳນວຍສິ່ງສະດວກໃຫ້ແກ່ນັກທ່ອງທ່ຽວ.
- ຮັບປະກັນຄວາມປອດໄພໃຫ້ນັກທ່ອງທ່ຽວ.
- ສ້າງຄວາມປະທັບໃຈໃຫ້ແກ່ນັກທ່ອງທ່ຽວ.
ເມື່ອໄດ້ທົວທ່ອງທ່ຽວຄະນະໜຶ່ງປະມານ 50 ຄົນ(ສົມມຸດ), ມາລ່ອງເຮືອຕາມລຳແມ່ນໍ້າຊອງ, ລ່ອງນໍ້າຊອງແລ້ວ ໄກ້ພາທ່ຽວກໍຈະພາໄປ ເຂົ້າຖໍ້າຈັງ, ອອກຈາກຖໍ້າຈັງກໍຈະພາໄປຊົມໜ່ວຍສິລະປະພື້ນເມືອງລາວສະແດງ, ອອກຈາກການເບິ່ງສະແດງກໍໄປຕໍ່ ສູນເຄື່ອງທີ່ລະນຶກຫັດຖະກຳລາວ, ຈາກນັ້ນກໍໄປທ່ຽວຊົມປະຊາຊົນກ່ຽວເຂົ້າ, ແລ້ວ ໄປຊີມອາຫານລາວ…
ການທີ່ເຮັດແບບນີ້ ມັນຈະສ້າງຄວາມເຂັ້ມແຂງຂອງແຕ່ລະຫົວໜ່ວຍທຸລະກິດການທ່ອງທ່ຽວ, ກະຈາຍລາຍໄດ້ໄປເຖິງກັນ ແລະ ກັນ, ບໍ່ມີຂໍ້ຂັດແຍ່ງກັນ ແລະ ສະດວກສະບາຍ ແລະ ຄວາມປອດໄພໃຫ້ນັກທ່ອງທ່ຽວ ແລະ ນັກທ່ອງທ່ອງທ່ຽວສາມາດຮູ້ ແລະ ເຫັນໄດ້ທົ່ວເຖິງແຫຼ່ງທ່ອງທ່ຽວ ແລະ ວັດທະນະທຳລາວ ແລະ ວິຖີດຳລົງຊີວິດຂອງປະຊາຊົນລາວ.
ເຖິງເວລາແລ້ວ ທີ່ພວກເຮົາຈະຕ້ອງຄວນເບິ່ງຄືນການເຮັດການທ່ອງທ່ຽວແບບພໍໃຜພໍລາວ ໂດຍບໍ່ເປັນຕ່ອງໂສ້ ຊຶ່ງບໍ່ສາມາດສ້າງຄວາມເຂັ້ມແຂງໃຫ້ຊຸມຊົນໄດ້ຢ່າງທົ່ວເຖິງ ແລະ ປະໃຫ້ນັກທ່ອງທ່ຽວຕ້ອງໄປຊອກບ່ອນທີ່ຈະໄປເອົາເອງ ຊຶ່ງບໍ່ມີຄວາມປອດໄພ ແລະ ສ້າງຄວາມຫຍຸ້ງຍາກໃຫ້ແກ່ນັກທ່ອງທ່ຽວບໍ່ໜ້ອຍ.
