ຄືໄດ້ເກີດໃໝ່ ! ຜູ້ຕິດເຊື້ອໂຄວິດຢູ່ຈີນ ປ່ຽນຖ່າຍປອດ ຫາຍດີຄົນທຳອິດໃນໂລກ
ຜູ້ຕິດເຊື້ອໂຄວິດ-19 ຢູ່ຈີນ ຮັບການປ່ຽນຖ່າຍປອດໃນເດືອນເມສາ ພັກຟື້ນດົນກວ່າ 2 ເດືອນເຄິ່ງ ຈົນຫາຍດີເປັນຄົນທຳອິດຂອງໂລກ.
ສຳນັກຂ່າວຊິນຮົວລາຍງານວ່າ: ຜູ້ຕິດເຊື້ອໂຄວິດ-19 ທີ່ໄດ້ຮັບການປິ່ນປົວດ້ວຍການຜ່າຕັດປ່ຽນຖ່າຍປອດ ສາມາດອອກຈາກໂຮງໝໍໄດ້ແລ້ວໃນວັນທີ 21 ກໍລະກົດຜ່ານມາ ຫລັງຈາກເຂົ້າຮັບການຜ່າຕັດໃນທ້າຍເດືອນເມສາຜ່ານມາ.
ຜູ້ຕິດເຊື້ອຄົນດັ່ງກ່າວເປັນຜູ້ຊາຍນາມສົມມຸດ ຊຸ່ຍ ເປັນແຮງງານກະສຽນອາຍຸ ເລີ່ມມີໄຂ້ໃນວັນທີ 23 ມັງກອນ ແລະ ໄດ້ຮັບການບົ່ງມະຕິວ່າ ຕິດເຊື້ອໂຄວິດ-19 ໃນວັນທີ 7 ກຸມພາ, ລາວຖືກຍ້າຍໄປໂຮງໝໍເຫລິນໝິນແຫ່ງມະຫາວິທະຍາໄລອູ່ຮັນ ໃນວັນທີ 18 ມີນາ ໂດຍຕ້ອງໃຊ້ເຄື່ອງຊ່ວຍເຮັດວຽກຂອງຫົວໃຈ ແລະ ປອດ.
ເຖິງຢ່າງໃດກໍຕາມ, ຫລິນ ຮຸ່ຍຊິງ ແພດສັນຍະກຳອາວຸໂສ ກ່າວວ່າ: ຜົນການທົດສອບກົດນິວຄລີອິກຂອງຜູ້ຕິດເຊື້ອກັບມາເປັນລົບຫລັງການປິ່ນປົວ, ແຕ່ມີສະພາບພັງພືດແຊກຊີ້ນປອດທີ່ກັບຄືນສະພາບບໍ່ໄດ້ ອັນສົ່ງຜົນໃຫ້ປອດລົ້ມເຫລວ ເຊິ່ງຕ້ອງປິ່ນປົວດ້ວຍການປ່ຽນຖ່າຍປອດເທົ່ານັ້ນ.
ທາງໂຮງໝໍໄດ້ຮ່ວມມືກັບທີມຜູ້ຊ່ຽວຊານດ້ານການປ່ຽນຖ່າຍປອດແຫ່ງຊາດ ໄດ້ເລີ່ມການຜ່າຕັດໃນວັນທີ 20 ເມສາ ໂດຍການຜ່າຕັດໃຊ້ເວລາກວ່າ 6 ຊົ່ວໂມງ.
ຫລັງຈາກປິ່ນປົວການເກີດສະພາບປະຕິເສດປອດກະທັນຫັນ ການຕິດເຊື້ອຢ່າງຮຸນແຮງ, ການດື້ຢາຫລາຍຊະນິດ ລວມທັງການເຮັດວຽກຂອງລຳໄສ້ ແລະ ໄຕລົ້ມເຫລວ ເຊິ່ງເປັນສະພາບທີ່ຕາມມາຫລັງການຜ່າຕັດ, ແຕ່ທ້າວ ຊຸ່ຍ ກໍສາມາດປະຄອງຮ່າງກາຍດ້ວຍຕົນເອງໃນກາງເດືອນມິຖຸນາ ແລະ ຍ້າຍໄປນັ່ງລໍ້ຍູ້ໄດ້ໃນເດືອນກໍລະກົດ.
ທ່ານ ໝໍ ຫລິນ ກ່າວວ່າ: ຍັງມີຄວາມຈຳເປັນຕ້ອງຟື້ນຟູສະມັດຖະພາບເພີ່ມຕື່ມ ເນື່ອງຈາກຂາຂອງທ້າວ ຊຸ່ຍ ມີອາການກ້າມຊີ້ນອ່ອນແຮງ.
ນັບຮອດວັນທີ 22 ກໍລະກົດ ມົນທົນຫູເປີຍ ເຊິ່ງເປັນພື້ນທີ່ທີ່ໄດ້ຮັບຜົນກະທົບຮຸນແຮງທີ່ສຸດຈາກການລະບາດຂອງໂຄວິດ-19 ຢູ່ປະເທດຈີນ ລາຍງານພົບຜູ້ຕິດເຊື້ອຢືນຢັນຜົນແລ້ວ 68.135 ຄົນ ໂດຍຜູ້ຕິດເຊື້ອ 63.623 ຄົນຫາຍດີອອກຈາກໂຮງໝໍແລ້ວ, ສ່ວນຜູ້ເສຍຊີວິດຢູ່ມົນທົນຫູເປີຍໃນປັດຈຸບັນມີ 4.512 ຄົນ.
