ທຣຳ ປັບທ່າທີ ແນະນຳພົນລະເມືອງໃສ່ຜ້າປິດປາກ-ດັງ ຫລັງອາເມລິກາຕິດໂຄວິດ-19 ເຖິງ 4 ລ້ານຄົນ
ປະທານາທິບໍດີອາເມລິກາ ປັບທ່າທີຄັ້ງສຳຄັນ ແນະນຳພົນລະເມືອງໃຫ້ໃສ່ຜ້າປິດປາກ-ດັງ ແລະ ເວັ້ນໄລຍະຫ່າງທາງສັງຄົມ ຫລັງຜະເຊີນແຮງກົດດັນຢ່າງໜັກ ໂດຍສະເພາະຈາກທີມບຸກຄະລາກອນທາງການແພດ ແລະ ນັກວິໄຈ ໂດຍສະຖາສະການການແຜ່ລະບາດຂອງໂຄວິດ-19 ກຳລັງກ້າວເຂົ້າສູ່ເດືອນທີ 7 ອາເມລິກາມີຜູ້ຕິດເຊື້ອສະສົມສູງເຖິງ 4 ລ້ານຄົນແລ້ວ ສູງເປັນອັນດັບ 1 ຂອງໂລກໃນປັດຈຸບັນ.
ກ່ອນໜ້ານີ້ ປະທານາທິບໍດີ ໂດນັລ ທຣຳ ເປັນໜຶ່ງໃນຜູ້ນຳປະເທດທີ່ບໍ່ສະໜັບສະໜູນການໃສ່ຜ້າປິດປາກ-ດັງ ໂດຍຜູ້ນຳອາເມລິກາຫາກໍຈະຍອມໃສ່ຜ້າປິດປາກ-ດັງປະຕິບັດພາລະກິດຢູ່ສະຖານທີ່ສາທາລະນະເປັນຄັ້ງທຳອິດ ເມື່ອກາງເດືອນກໍລະກົດຜ່ານມາ ຫລັງໂຄວິດ-19 ແຜ່ລະບາດມາເກືອບ 7 ເດືອນ. ຫລ້າສຸດ ທຣຳ ປັບທ່າທີຄັ້ງສຳຄັນ ແນະນຳພົນລະເມືອງໃຫ້ໃສ່ຜ້າປິດປາກ-ດັງ. ພ້ອມຍອມຮັບວ່າ: ສະຖານະການການແຜ່ລະບາດພາຍໃນປະເທດອາດຮ້າຍແຮງອີກ ກ່ອນຈະຄ່ອຍໆດີຂຶ້ນ.
ທ່ານ ທຣຳ ກຳລັງຜະເຊີນແຮງກົດດັນຢ່າງໜັກ ຫລັງຈາກຈຳນວນຜູ້ຕິດເຊື້ອສະສົມຢູ່ອາເມລິກາເພີ່ມສູງປະມານ 4 ລ້ານຄົນ ສູງເປັນອັນດັບ 1 ຂອງໂລກ, ມີຜູ້ເສຍຊີວິດແລ້ວ 142.000 ກວ່າຄົນທົ່ວປະເທດ ໂດຍລັດນິວຢອກ ແລະ ແຄລິຟໍເນຍ ມີຜູ້ຕິດໂຄວິດ-19 ຫລາຍທີ່ສຸດ ລັດລະ 4 ແສນກວ່າຄົນ. ຫລາຍຝ່າຍຊີ້ວ່າ: ຖ້າຜູ້ນຳອາເມລິກາແນະນຳພົນລະເມືອງໃສ່ຜ້າປິດປາກ-ດັງ ແລະ ເວັ້ນໄລຍະຫ່າງທາງສັງຄົມນັບແຕ່ເລີ່ມມີການລະບາດໃໝ່ໆ ສະຖານະການອາດບໍ່ຮ້າຍແຮງເຖິງຂະໜາດນີ້.
