ຍັງມີຮ້ານອິນເຕີເນັດຫລາຍແຫ່ງບໍລິການບໍ່ຖືກຕ້ອງບໍ່ສອດຄ່ອງ

ທ່ານ ສີຄອນ ອ່ອນສີພັນລາ ຫົວຫນ້າພະແນກໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ນະຄອນຫລວງວຽງຈັນ ໃຫ້ຮູ້ວ່າ: ຢູ່ນະຄອນຫລວງວຽງຈັນ ມີຮ້ານອິນເຕີເນັດ ທັງຫມົດ 379 ຮ້ານ, ຂຶ້ນກັບ ເມືອງຄຸ້ມຄອງ 159 ຮ້ານ, ໃນໄລຍະຜ່ານມາ, ໄດ້ອອກແຈ້ງການຫ້າມບໍ່ໃຫ້ຮ້ານອິນເຕີເນັດ ຕິດໂປດສະເຕິ ແລະ ຮູບພາບທີ່ເປັນລັກສະນາຊັກຊວນໃຫ້ເຂົ້າມາຫລິ້ນການພະນັ້ນຢູ່ຮ້ານອິນເຕີເນັດ, ເຜີຍແຜ່ຂໍ້ຕົກລົງ ແລະ ສຶກສາອົບຮົມເຈົ້າຂອງທຸລະກິດ ໃຫ້ປະຕິບັດເຂັ້ມງວດຕໍ່ມາດຕະການທີ່ໄດ້ກໍານົດໄວ້.

ເຖິງຈະມີການກວດກາຄຸ້ມຄອງຢ່າງຕັ້ງຫນ້າກໍຕາມ, ແຕ່ກໍຍັງພົບເຫັນຮ້ານອິນເຕີເນັດຈໍານວນຫນຶ່ງບໍລິການບໍ່ຖືກກັບໃບອະນຸຍາດ, ບໍ່ສອດຄ່ອງກັບລະບຽບການ, ມີຫລາຍຮ້ານບໍລິການເກມອອນລາຍ, ບໍລິການເກມພະນັ້ນທາງ ອິນເຕິເນັດ ໃນຮູບແບບຫລິ້ນຢູ່ກັບຮ້ານ ຫລື ຫລິ້ນຢູ່ໃສກໍໄດ້ບ່ອນທີ່ມີອິນເຕີເນັດ, ມີບໍລິການໂຕະແທງບານ (ພະນັນບານ) ຈໍານວນຫນຶ່ງ ສວຍໃຊ້ຮ້ານອິນເຕີເນັດ ເປັນບ່ອນມົ້ວສຸມ, ຊື້-ຂາຍຢາເສບຕິດ.

ການຄຸ້ມຄອງບັນດາຮ້ານອິນເຕີເນັດ ໂດຍລວມຍັງພົບຄວາມຫຍຸ້ງຍາກຫລາຍ ເພາະວ່ານິຕິກໍາການຄຸ້ມຄອງຍັງບໍ່ທັນຊັດເຈນກ່ຽວກັບການດັດສົມຮ້ານອິນເຕີເນັດຢູ່ແຕ່ລະເມືອງ, ບ້ານ, ບໍ່ໄດ້ກໍານົດຜູ້ເຂົ້າຊົມໃຊ້, ກໍານົດໂມງເວລາບໍລິການ, ການຄຸ້ມຄອງຕິດຕາມການກວດກາບໍ່ທົ່ວເຖິງທຸກບ້ານ, ການຄຸ້ມຄອງ ແກ້ໄຂຢູ່ຂັ້ນພື້ນຖານຍັງບໍ່ທັນເປັນເຈົ້າການຢ່າງເຂັ້ມງວດ, ບາງເທື່ອປິດບັງຂໍ້ມູນການເຄື່ອນໄຫວຂອງຮ້ານ ອິນເຕິເນັດ.

ສໍາລັບເກມອອນລາຍ ແລະ ການພະນັນອອນລາຍ ແມ່ນມີຄວາມຫຍຸ້ງຍາກໃນການຄຸ້ມຄອງ ຍ້ອນວ່າບັນດາເກມເຫລົ່ານີ້ ຖືກສ້າງຂຶ້ນ ແລະ ມີຖານຂໍ້ມູນຢູ່ຕ່າງປະເທດ, ເຊິ່ງສາມາດຫລິ້ນໄດ້ທຸກບ່ອນທີ່ມີອິນເຕີເນັດ ອັນເຮັດໃຫ້ການແກ້ໄຂພົບຄວາມຫຍຸ້ງຍາກ.