ສ້າງຄວາມເຂົ້າໃຈວຽກງານການສະກັດ ກັ້ນ ແລະ ຕ້ານການຄ້າມະນຸດໃຫ້ສື່ມວນຊົນ

ໃນວັນທີ 22 ກໍລະກົດນີ້​, ທີ່ສູນກາງແນວລາວສ້າງຊາດ ນະຄອນຫລວງວຽງຈັນ, ໂຄງການຫລຸດຜ່ອນຄວາມສ່ຽງຈາກການຄ້າມະນຸດຂອງອົງການວິນຣອກສາກົນ ຮ່ວມກັບ ກົມສື່ມວນຊົນ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ຈັດສຳມະນາກ່ຽວກັບບົດບາດຂອງສື່ມວນຊົນໃນວຽກງານສະກັດກັ້ນ ແລະ ຕ້ານການຄ້າມະນຸດ ໂດຍມີຈຸດປະສົງເພື່ອໃຫ້ສື່ມວນຊົນ ຫລື ນັກຂ່າວມີສ່ວນຮ່ວມໃນການໂຄສະນາໃຫ້ຄວາມຮູ້ກ່ຽວກັບຮູບແບບຂອງການຄ້າມະນຸດ ແລະ ການປ້ອງກັນຕົນເອງ, ສະມາຊິກຄອບຄົວຈາກການຄ້າມະນຸດໃຫ້ກັບກຸ່ມສ່ຽງ ໂດຍສະເພາະໄວໜຸ່ມ, ນັກຮຽນ-ນັກສຶກສາ, ປະຊາຊົນທົ່ວໄປໃນສັງຄົມ. ພ້ອມນັ້ນ ຍັງໄດ້ເນັ້ນການສົ່ງເສີມການເຄື່ອນຍ້າຍແຮງງານທີ່ຖືກຕ້ອງ ແລະ ການເຮັດວຽກທີ່ປອດໄພ ເພື່ອຫລຸດຜ່ອນຄວາມສ່ຽງຈາກການຄ້າມະນຸດ.

ຮອງຫົວໜ້າກົມສື່ມວນຊົນ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກ່າວວ່າ: ການຄ້າມະນຸດຍັງເປັນບັນຫາ ແລະ ປະກົດການຫຍໍ້ທໍ້ທີ່ເປັນຜົນກະທົບຕໍ່ການພັດທະນາເສດຖະກິດ-ສັງຄົມຂອງລາວ ແລະ ປະເທດອື່ນໆໃນອະນຸພາກພື້ນລຸ່ມແມ່ນ້ຳຂອງ, ສາເຫດຕົ້ນຕໍທີ່ປະຊາຊົນລາວເຮົາຖືກຕົວະຍົວະຫລອກລວງໃຫ້ເຂົ້າສູ່ຂະບວນການຄ້າມະນຸດຍັງແມ່ນຄວາມທຸກຍາກ, ຄວາມແຕກໂຕນທາງດ້ານເສດຖະກິດ ແລະ ໂອກາດໃນການເຮັດວຽກຂອງປະເທດເຮົາກັບບັນດາປະເທດທີ່ພັດທະນາແລ້ວ. ເຖິງຢ່າງໃດກໍຕາມປັດໄຈຕົ້ນຕໍທີ່ເຮັດໃຫ້ບັນຫານີ້ຮ້າຍແຮງຂຶ້ນກວ່າເກົ່າ ແມ່ນການຂາດຄວາມຮູ້ກ່ຽວກັບຄວາມສ່ຽງ, ຄວາມອັນຕະລາຍ ແລະ ຮູບແບບຂອງການຄ້າມະນຸດທີ່ນາຍໜ້າ ແລະ ນັກຄ້າມະນຸດນຳໃຊ້ ທັງປັບປ່ຽນເປັນປະຈຳ. ນອກຈາກນີ້, ແຮງງານເຄື່ອນຍ້າຍທີ່ກັບຄືນປະເທດ ບວກກັບຈຳນວນແຮງງານທີ່ຢູ່ພາຍໃນປະເທດບໍ່ມີວຽກເຮັດງານທຳ ແລະ ຂາດໂອກາດໃນການເຂົ້າເຖິງຂໍ້ມູນຂ່າວສານທີ່ຖືກຕ້ອງ ຈະເຮັດໃຫ້ພວກເຂົາມີຄວາມສ່ຽງສູງຂຶ້ນຕໍ່ການຖືກຕົວະຍົວະຫລອກລວງໃຫ້ເຂົ້າສູ່ຂະບວນການຄ້າມະນຸດ ແລະ ສະແຫວງຫາຜົນປະໂຫຍດ.

ທ່ານກ່າວຕື່ມວ່າ: ເພື່ອຫລຸດຜ່ອນບັນຫາດັ່ງກ່າວນີ້ ບັນດາສື່ມວນຊົນ, ບັນນາທິການ ແລະ ນັກຂ່າວ ແມ່ນມີບົດບາດສຳຄັນ, ເປັນກະບອກສຽງໃຫ້ພັກ-ລັດໃນການໂຄສະນາໃຫ້ຄວາມຮູ້, ຮຽກຮ້ອງໃຫ້ ປະຊາຊົນມີສ່ວນຮ່ວມໃນການປ້ອງກັນ ແລະ ປົກປ້ອງຜູ້ທີ່ມີຄວາມສ່ຽງ ເພື່ອໄວໜຸ່ມລາວມີຄວາມຮູ້, ຮູ້ທັນຂະບວນການ ແລະ ຮູບແບບຂອງການຄ້າມະນຸດ. ສິ່ງສຳຄັນບັນດາສື່ມວນຊົນຕ້ອງມີສ່ວນຮ່ວມໃນການໂຄສະນາສົ່ງເສີມການມີສ່ວນຮ່ວມຈາກສັງຄົມໃນການປ້ອງກັນ, ລາຍງານກໍລະນີສ່ຽງ ແລະ ຊ່ວຍເຫລືອຜູ້ທີ່ມີຄວາມສ່ຽງໃຫ້ທັນເວລາ. ທັ້ງນີ້ ກໍເພື່ອໂຄສະນາປູກຈິດສໍານຶກເພີ່ມທະວີການຮ່ວມມື ແລະ ເຮັດວຽກຮ່ວມກັນກ່ຽວກັບຄວາມພະຍາຍາມໃນການສະກັດກັ້ນ ແລະ ຕ້ານການຄ້າມະນຸດໃນ ສປປ ລາວ.