ບ້ວງເຫຼັກ ຫຼວງພະບາງ ຄວ້າທີ 3 ລາຍການ ຊີງແຊ໋ມໄທແລນ ບາສເກັດບອນ ລີກ 2020
ທັບນັກກິລາບານບ້ວງເຫຼັກ ຂອງສະໂມສອນ ຫຼວງພະບາງ ຈາກເມືອງມໍລະດົກໂລກ ແຂວງຫຼວງພະບາງ ໜຶ່ງດຽວຈາກລາວເຮົາ ສາມາດສ້າງຜົນງານຢ່າງໂດດເດັ່ນອີກຄັ້ງ ໃນການແຂ່ງຂັນລານບ້ວງຊີງແຊ໋ມສະໂມສອນ ອາຊຽນ ຫຼື ລາຍການ Thailand Basketball League 2020 ທີ່ປະເທດໄທ ຫຼັງຈາກໂຊຟອມເກັ່ງໄລ່ເອົາຊະນະທີມ Android ຈາກ ປະເທດສິງກະໂປ ຂາດຮອຍດ້ວຍຄະແນນ 82-53 ຄວ້າອັນດັບ 3 ສອງປີຕິດຕໍ່ກັນ ພ້ອມເງິນລາງວັນເກືອບ 200 ລ້ານກີບ ຫຼື ປະມານຍ 6 ແສນບາດ (ເງິນສະກຸນໄທ).
ການແຂ່ງຂັນບານບ້ວງ ລີກອາຊຽນໃນລາຍການ Thailand Basketball League 2020 ນັດຊິງຊະນະເລີດ ລະຫວ່າງ Hi Tech ( ໄທ ) ພົບກັບ Dunking Raptor ( ໄທ ) ແລະ ນັດຊີງອັນດັບທີ່ 3 ລະຫວ່າງ ສະໂມສອນ ຫຼວງພະບາງ ພົບກັບ ທີມAndroid ຈາກປະເທດສິງກະໂປ ມີຂື້ນວັນທີ 19 ກໍລະກົດ ຜ່ານມາ ທີ່ນະຄອນຫຼວງ ບາງກອກ ປະເທດໄທ ຫຼັງຈາກສະຖານະການລະບາດຂອງພະຍາດໂຄວິດ 19 ໄດ້ແຜ່ລະບາດຢ່າໜັກ ທາງຝ່າຍຈັດການແຂ່ງຂັນໄດ້ໂຈະການແຂ່ງຂັນຊົ່ວຄາວ ພາຍຫຼັງ ສະຖານະການດີຂື້ນ ຝ່າຍຈັດການແຂ່ງຂັນຈື່ງໄດ້ສືບຕໍ່ກັບມາຈັດການແຂ່ງຂັນລາຍການດັ່ງກ່າວເພື່ອໃຫ້ຈົບລະດູການ.
ໃນໄລຍະເຊື້ອພະຍາດ ມໍລະນະ ໄດ້ແຜ່ລະບາດ ໄດ້ສ້າງຄວາມຫຍຸ້ງຍາກ ໃຫ້ຄະນະຮັບຜິດຊອບຈັດການແຂ່ງຂັນ ແລະ ຫຼາຍສະໂມສອນ ໃນລາຍການດັ່ງກ່າວ ໂດຍສະເພາະທີມຫຼວງພະບາງ ຕົວແທນໜຶ່ງດຽວຈາກ ສປປ ລາວ ເຂົ້າຮ່ວມແຂ່ງຂັນໂດຍມີນັກກິລາຄົນລາວ ແລະ ນັກກິລາຕ່າງຊາດເຊື້ອຊາດລາວ ສົມທົບກັນ ເຮັດໃຫ້ບໍ່ສາມາດກັບໄປແຂ່ງຂັນໄດ້ເນື່ອງຈາກປະເທດໄທຍັງບໍ່ທັນອານຸຍາດໃຫ້ຄົນຕ່າງຊາດເຂົ້າປະເທດໂດຍບໍ່ມີເຫດຈຳເປັນ ຖ້າເຂົ້າໄປກໍ່ຕ້ອງໄດ້ກັກບໍລິເວນ 14 ວັນ ເຮັດໃຫ້ຄະນະຂອງທີມຫຼວງພະບາງຕ້ອງໄດ້ເຮັດຕາມກົດລະບຽບ ເອົານັກກິລາທີ່ຢູ່ພາຍໃນປະເທດໄທ ແລະ ເຄີຍຫຼິ້ນໃຫ້ກັບທີມຫຼວງພະບາງ ໃນລະດູການກ່ອນມາແຂ່ງຂັນແທນ.
ການແຂ່ງຂັນໃນຮອບຊິງອັນດັບ 3 ແຂ່ງຂັນເກມດຽວຈົບ ຜ່ານການແຂ່ງຂັນຜົນປະກົດວ່າ ເປັນທີມຫຼວງພະບາງ ສາມາດໄລ່ເອົາຊະນະ ທີມ Android ຈາກປະເທດ ສິງກະໂປ ຂາດຮອຍ 82-53 ຄະແນນ ຄວ້າອັນດັບ 3 ມາຄອງ ແລະ ກໍເປັນການຮັກສາມູນເຊື້ອຄວ້າອັນດັບ 3 ສອງປີຕິດຕໍ່ກັນ ພ້ອມເງິນລາງວັນເກືອບ 200 ລ້ານກີບ ຫຼື ປະມານຍ 6 ແສນບາດ (ເງິນສະກຸນໄທ) ສ່ວນທີມ Android ຈາກປະເທດສິງກະໂປ ໄດ້ພຽງທີ 4 ພ້ອມເງິນລາງວັນ 5 ແສນບາດ ຂະນະທີ່ອັນດັບທີ 1 ຕົກເປັນຂອງ ອັນດັບ 1 ທີມHi Tech (ໄທ) ໄດ້ຮັບເງິນລາງວັນ 1,2 ລ້ານບາດ ແລະ ອັນດັບ 2 ທີມDunking Raptor (ໄທ) ໄດ້ຮັບເງິນລາງວັນ 7 ແສນບາດ.
ລາຍການນີ້ ສຳລັບທີມບານບ້ວງຫຼວງພະບາງ ໄດ້ເຂົ້າຮ່ວມແຂ່ງຂັນ ມາແລ້ວ 3 ຄັ້ງ ສ່ວນຜົນງານໃນຄັ້ງທຳອິດ ເມື່ອປີ 2018 ໄດ້ອັນດັບ 6, ປີ 2019 ໄດ້ອັນດັບ 3 ແລະ ປີ 2020 ກໍໄດ້ອັນດັບ 3 ໂດຍມີນັກກິລາຈາກ 10 ປະເທດໃນຂົງເຂດອາຊຽນເຂົ້າຮ່ວມ.
ໂດຍ: ສົງການ
