ມະຫາວິທະຍາໄລ Oxford ເຜີຍຜົນທົດລອງວັກແຊງຕ້ານໂຄວິດ-19 ຂັ້ນຕອນທີ 1 ແລະ 2 ປະສົບຜົນສຳເລັດດ້ວຍດີ ກຽມຜະລິດ 100 ລ້ານໂດສ
ວັນທີ 20 ກໍລະກົດ, ມະຫາວິທະຍາໄລ Oxford ທີ່ຮ່ວມມືກັບ AstraZeneca ຜູ້ພັດທະນາວັກແຊງຕ້ານໂຄວິດ-19 ທີ່ມີຊື່ວ່າ ChAdOx1 ເຜີຍຜົນການທົດລອງໃນຂັ້ນຕອນທີ 1 ແລະ 2 ປະສົບຜົນສຳເລັດດ້ວຍດີໃນວາລະສານ Lancet ຫລັງທົດລອງສັກວັກແຊງກັບກຸ່ມຕົວຢ່າງ 1.077 ຄົນ ນຳໄປສູ່ການກະຕຸ້ນການສ້າງແອນຕິບໍດີ້ ແລະ ທີເຊລທີ່ຕໍ່ສູ້ກັບເຊື້ອໄວຣັສໂຄໂຣນາ 2019 ໂດຍບໍ່ມີຜົນຂ້າງຄຽງຮຸນແຮງ, ແຕ່ຍັງພົບອາການມີໄຂ້ ຫລື ເຈັບຫົວໃນກຸ່ມຕົວຢ່າງປະມານ 70%.
ສຳນັກຂ່າວ BBC ລະບຸເບື້ອງຕົ້ນ ລັດຖະບານສະຫະຣາຊະອານາຈັກໄດ້ສັ່ງຜະລິດວັກແຊງດັ່ງກ່າວແລ້ວ 100 ລ້ານໂດສ ໂດຍວັກແຊງທີ່ຄົ້ນຄວ້າໂດຍ Oxford-AstraZeneca ໃນປັດຈຸບັນທົດລອງຂັ້ນຕອນທີ 2 ຄຽງຄູ່ກັບຂັ້ນຕອນທີ 3 ໃນສະຫະຣາຊະອານາຈັກ. ອີກທັງຍັງແຍກທົດລອງຂັ້ນຕອນທີ 3 ຢູ່ເບຣຊິນ ແລະ ອາຟຣິກາໃຕ້ນຳອີກ. ໂຄງການຕັ້ງເປົ້າວ່າຈະສາມາດຜະລິດວັກແຊງຕ້ານໂຄວິດ-19 ສຸກເສີນໃຫ້ໄດ້ພາຍໃນເດືອນຕຸລານີ້.
