“ຖ້າໃຜຄົນໃດຄົນໜຶ່ງຕ້ອງຕາຍ ຄົນຜູ້ນັ້ນຄວນເປັນຂ້ອຍ”

ບຣິດເຈີ ວອດເກີ ເດັກຊາຍອາຍຸ 6 ປີ ຖືກຫຍິບໃບໜ້າ 90 ເຂັມ,ພາຍຫລັງເຂົ້າໄປຊ່ວຍເຫລືອນ້ອງສາວຂອງຕົນໃຫ້ລອດຈາກການຖືກໝາກັດ.

ໃນວັນທີ 9 ກໍລະກົດ 2020 ຜ່ານມາ, ເດັກຊາຍຄົນດັ່ງກ່າວຈາກລັດໄວໂອມິງ ປະເທດ ສະຫະລັດອາເມລິກາ ກຳລັງແລ່ນຫລິ້ນກັບນ້ອງສາວຂອງຕົນໃນບໍລິເວນບໍ່ໄກຈາກບ້ານພໍປານໃດ, ທັນໃດນັ້ນກໍມີໝາໂຕໜຶ່ງແລ່ນມຸ່ງໜ້າເຂົ້າມາຫານ້ອງສາວຂອງ ບຣິດເຈີ ວອດເກີ ຢ່າງໄວວາ ແລະ ທ່າທີຂອງມັນບໍ່ໄດ້ມາເພື່ອຫລິ້ນນຳຢ່າງແນ່ນອນ, ດ້ວຍສັນຊາດຕະຍານຄວາມເປັນອ້າຍ. ບຣິດເຈີ ວອດເກີ ຈຶ່ງຮີບແລ່ນເຂົ້າໄປລັດຂັ້ນເຄິ່ງກາງລະຫວ່າງໝາກັບນ້ອງສາວທັນທີ, ບຣິດເຈີ ວອດເກີ ຕໍ່ສູ້ກັບໝາສຸດຄວາມສາມາດພ້ອມທັງພະຍາຍາມຍູ້ດັນໃຫ້ໝາອອກໄປ. ດັ່ງນັ້ນ ບຣິດເຈີ ວອດເກີ ຈຶ່ງຖືກໝາຂູດ ແລະ ກັດ ຢູ່ຫົວ ແລະ ໜ້າຈົນເລືອດອາບໜ້າ, ສຸດທ້າຍໝາໂຕນັ້ນກໍຍອມຖອຍໜີ ບຣິດເຈີ ວອດເກີ ຮີບຈັບມືນ້ອງສາວແລ້ວແລ່ນໜີກັບບ້ານທັນທີ.

“ຖ້າໃຜຄົນໃດຄົນໜຶ່ງຕ້ອງຕາຍ ຄົນໆນັ້ນຄວນເປັນຂ້ອຍ” ບຣິດເຈີ ວອດເກີ ກ່າວກັບຄອບຄົວຫລັງຈາກພານ້ອງສາວມາບ້ານ ຈຶ່ງຖືກນຳຕົວສົ່ງໂຮງໝໍຢ່າງຮີບດ່ວນ, ລາວມີບາດແຜຈີກຂາດທີ່ປາກ ແລະ ແກ້ມເບື້ອງຊ້າຍ ແລະ ຕ້ອງຖືກຫຍິບເຖິງ 90 ເຂັມ.

“ບາດແຜມັນເຈັບຈົນຂ້ອຍບໍ່ສາມາດຍິ້ມໄດ້ເລີຍ” ບຣິດເຈີ ວອດເກີ ກ່າວໄວ້, ເມື່ອເຈົ້າຂອງໝາໂຕນັ້ນໄດ້ຍິນຂ່າວຈຶ່ງຮີບຮ້ອນເຂົ້າໄປຂໍໂທດ ແລະ ຊ່ວຍເຫລືອທັນທີ, ທາງຄອບຄົວຂອງບຣິດເຈີ ວອດເກີ ແລະ ບຣິດເຈີ ວອດເກີ ກໍໃຫ້ອະໄພ ແລະ ເຂົ້າໃຈເປັນຢ່າງດີວ່າມັນເປັນພຽງອຸປະຕິເຫດທີ່ໝາຫລຸດອອກມາຈາກບ້ານ.

ນິໂຄ ວອດເກີ ປ້າຂອງ ບຣິດເຈີ ວອດເກີ ໄດ້ເຜີຍແຜ່ເລື່ອງລາວດັ່ງກ່າວ ລົງໃນ ຂອງລາວວ່າ: ຢາກໃຫ້ນັກສະແດງ ທີ່ ບຣິດເຈີ ວອດເກີ ມັກຮັກໄດ້ຮັບຮູ້ວ່າການກະທຳທີ່ເຂົາເຮັດໄປນັ້ນບໍ່ຕ່າງຫຍັງກັບຮີ່ໂຣ ເດັກຄົວນ້ອຍໆກໍສາມາດເປັນໄດ້, ເຊິ່ງລ້າສຸດ ຄຣິສ ອີແວນສ ຜູ້ສະແດງເປັນກັບຕັນອາເມລິກາ ໄດ້ໂທວີດີໂອມາໃຫ້ກຳລັງໃຈ ບຣິດເຈີ ແລ້ວ.