ສຶກສາອົບຮົມໄວລຸ້ນກວນເມືອງ

ເມື່ອບໍ່ດົນມານີ້, ກອງບັນຊາການປ້ອງກັນເຄື່ອນທີ່ກະຊວງປ້ອງກັນຄວາມສະຫງົບໄດ້ສຶກສາອົບຮົມກຸ່ມໄວລຸ້ນຂີ່ລົດກວນເມືອງ, ພ້ອມປັບໃໝຕາມລະບຽບການ, ກ່ອນສົ່ງໃຫ້ຜູ້ປົກຄອງເອົາໄປສຶກສາອົບຮົມ, ໂດຍກຸ່ມໄວລຸ້ນດັ່ງກ່າວຖືກເຈົ້າໜ້າທີ່ກັກຕົວມາປະຕິບັດວິໄນໃນໄລຍະເດືອນພຶດສະພາ-ເດືອນມິຖຸນານີ້, ຍ້ອນພາກັນຂີ່ລົດເປັນພຶງເປັນແພກໍໃຫ້ເກີດສຽງດັງລົບກວນສັງຄົມ, ກີດຂວາງການສັນຈອນ ແລະ ພາໃຫ້ເກີດອຸປະຕິເຫດຕາມມາ.

ການອົບຮົມຂອງເຈົ້າໜ້າທີ່ຄັ້ງນີ້, ໄດ້ເຕືອນໄວລຸ້ນດັ່ງກ່າວບໍ່ໃຫ້ມີພຶດຕິກໍາທີ່ເປັນການສ້າງຄວາມບໍ່ສະຫງົບໃນສັງຄົມ, ພ້ອມທັງເນັ້ນຜູ້ປົກຄອງໃຫ້ເອົາໃຈໃສ່ສຶກສາອົບຮົມລູກຫລານປະພຶດຕົນດີ, ບໍ່ໃຫ້ໄປທ່ຽວຫລີ້ນໃນຍາມຄໍ່າຄືນທີ່ຈະເປັນການສ້າງຄວາມບໍ່ສະຫງົບໃນສັງຄົມ. ສ່ວນລົດຈັກຂອງໄວ້ລຸ້ນຈໍານວນໜຶ່ງ ທີ່ມີການດັດແປງສະພາບຜິດລະບຽບເຈົ້າໜ້າທີ່ຈະໄດ້ນໍາໄປທໍາລາຍຖີ້ມ.