ປີນີ້ເສດຖະກິດເຊກອງຈະຂະຫຍາຍຕົວພຽງ 4,3% ຍ້ອນການລະບາດຂອງໂຄວິດ-19
ຮອງເຈົ້າແຂວງເຊກອງ ໃຫ້ຮູ້ວ່າ: ຕາມແຜນແລ້ວໃນປີນີ້ ແຂວງເຊກອງຕັ້ງເປົ້າການພັດທະນາເສດຖະກິດໃຫ້ຂະຫຍາຍຕົວ 8% ແລະ ມູນຄ່າ GDP ສະເລ່ຍໃສ່ຫົວຄົນໃຫ້ບັນລຸ 14,5 ລ້ານກີບ ຫລື ເທົ່າກັບ 1.791 ໂດລາຕໍ່ຄົນຕໍ່ປີ, ແຕ່ຍ້ອນການລະບາດຂອງພະຍາດໂຄວິດ-19 ໄດ້ສົ່ງຜົນກະທົບໃຫ້ການຂະຫຍາຍຕົວເສດຖະກິດປະຕິບັດໄດ້ພຽງ 4,3%. ໃນຂະນະທີ່ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນ 5 ປີຄັ້ງທີ VIII (2016-2020) ແຂວງເຊກອງກໍສາມາດຍາດໄດ້ຜົນງານພົ້ນເດັ່ນຫລາຍດ້ານ ໂດຍສະເພາະດ້ານການຈັດຕັ້ງປະຕິບັດການລົງທຶນເຫັນວ່າມີບັນຍາກາດຄຶກຄື້ນຈາກແຜນການທີ່ວາງໄວ້ 3.650 ຕື້ກີບ ມາເປັນ 4.744,9 ຕື້ກີບ ເຊິ່ງລື່ນຄາດໝາຍວາງໄວ້ເຖິງ 30%, ໃນນັ້ນ ການລົງທຶນຂອງລັດບັນລຸ 610 ຕື້ກີບ, ທຶນຊ່ວຍເຫລືອລ້າ-ກູ້ຢືມມີ 317,1 ຕື້ກີບ; ການລົງທຶນຂອງພາກເອກະຊົນມີຫລາຍກວ່າ 1.173 ຕື້ກີບ ແລະ ທຶນສິນເຊື່ອທະນາຄານ 2.643 ກວ່າຕື້ກີບ.
