ຫວຽດນາມຈັດກອງປະຊຸມເຄືອຂ່າຍຮັກສາສັນຕິພາບ ອາຊຽນ

ວັນທີ 16 ກໍລະກົດນີ້, ຢູ່ທີ່ ຮ່າໂນ້ຍ, ກົມຮັກສາສັນຕິພາບ ຂອງກະຊວງປ້ອງກັນປະເທດຫວຽດນາມ ໄດ້ຈັດກອງປະຊຸມເຄືອຂ່າຍຮັກສາສັນຕິພາບ ອາຊຽນ(APCN) ຂຶ້ນຢ່າງເປັນທາງການ.

ເຂົ້າຮ່ວມກອງປະຊຸມ ມີທ່ານ ນາຍພົນໂທ ຫງວຽນຈິວິງ, ຮອງລັດຖະມົນຕີກະຊວງປ້ອງກັນປະເທດ, ທ່ານພົນຕີ ຮວ່າງກີມຟຸງ ຫົວໜ້າກົມຮັກສາສັນຕິພາບຂອງຫວຽດນາມ, ພົນຕີ ຫງວຽນຊວັນກຽນ ຫົວໜ້າກົມການແພດທະຫານ ແລະ ຜູ້ຕາງໜ້າໃຫ້ສະມາຊິກໃນເຄືອຂ່າຍຮັກສາສັນຕິພາບອາຊຽນ, ຄະນະເລຂາທິການອາຊຽນ ແລະ ຜູ້ຕາງໜ້າປ້ອງກັນຊາດຂອງບັນດາປະເທດສະມາຊິກອາຊຽນເຂົ້າຮ່ວມ ຢ່າງພ້ອມພຽງ.

ບັນດາຜູ້ແທນເຂົ້າຮ່ວມກອງປະຊຸມ ໄດ້ພ້ອມກັນສຸມໃສ່ຄົ້ນຄວ້າປິ່ນອ້ອມບາງບັນຫາຕົ້ນຕໍຄື: ເພີ່ມທະວີການຮ່ວມມືລະຫວ່າງສະມາຊິກ APCN ໃນສະຖານະການ ໂຄວິດ-19 ລະບາດ, ແບ່ງປັນຜົນສຳເລັດທາງດ້ານການທະຫານຂອງຫວຽດນາມໃນການເຂົ້າຮ່ວມປ້ອງກັນ ແລະ ຕ້ານໂຄວິດ-19, ບົດຮຽນ ແລະ ວິທີປ້ອງກັນ ແລະ ຕ້ານພະຍາດຕໍ່ກັບກຳລັງປ້ອງກັນສັນຕິພາບຂອງສະຫະປະຊາຊາດ, ຮັບຮູ້ສະຖານະການພະຍາດທີ່ເກີດຂຶ້ນກັບທະຫານ.

ຂ່າວ: ລູກເມືອງພວນ(ແຫຼ່ງຂ່າວ vietnamnet)