ຈັດກິດຈະກຳສະຫລອງວັນສ້າງຕັ້ງ ສະຫະພັນແມ່ຍິງລາວ ຄົບຮອບ 65 ປີ
ເຊົ້າວັນທີ 16 ກໍລະກົດນີ້, ສູນກາງສະຫະພັນແມ່ຍິງລາວ ໄດ້ຈັດຫລາຍກິດຈະກຳ ເພື່ອສະເຫລີມສະຫລອງວັນສ້າງຕັ້ງສະຫະພັນແມ່ຍິງລາວ ຄົບຮອບ 65 ປີ (20/7/1955-20/7/2020) ແລະ ລະນຶກວັນສາກົນຕ້ານການຄ້າມະນຸດ ປີ 2020 ພ້ອມວັນແມ່ຍິງສາກົນ ຄົບຮອບ 110 ປີ ຂຶ້ນທີ່ສູນຝຶກອົບຮົມສະຫະພັນແມ່ຍິງລາວ ທີ່ນະຄອນຫລວງວຽງຈັນ ໂດຍການເຂົ້າຮ່ວມຂອງທ່ານ ນາງ ອິນລາວັນ ແກ້ວບຸນພັນ ປະທານສະຫະພັນແມ່ຍິງດັ່ງກ່າວ.
ໃນງານປະກອບມີກິດຈະກຳເຕັ້ນລາລີ-ລີລາດ ເພື່ອສຸຂະພາບຂອງເອື້ອຍນ້ອງແມ່ຍິງ, ການສຳມະນາ ພາຍໃຕ້ຫົວຂໍ້ “ສິດທິຂອງແມ່ຍິງຕິດພັນກັບຄວາມສະເໝີພາບຍິງ-ຊາຍ” ແລະ ເຜີຍແຜ່ຜົນກອງປະຊຸມສາກົນກ່ຽວກັບປະຊາກອນ ແລະ ການພັດທະນາ ຄັ້ງທີ 25 ທີ່ໄນໂຣບີ ປີ 2019 ແລະ ຄຳໝັ້ນໝາຍຂອງ ສປປ ລາວ ກ່ຽວກັບການຈັດຕັ້ງປະຕິບັດເປົ້າໝາຍການພັດທະນາຍືນຍົງ, ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ, ການລ້ຽງດູເດັກ ແລະ ສຸຂະພາບຂອງແມ່ຍິງ, ຄວາມຮູ້ການປ້ອງກັນພະຍາດໂຄວິດ-19, ການຖາມ-ຕອບວິທະຍາສາດ ແລະ ກິດຈະກຳກວດສຸຂະພາບໂດຍບໍ່ເສຍຄ່າ, ການວາງສະແດງຜະລິດຕະພັນສີໄມ້ລາຍມືຂອງແມ່ຍິງລາວຈາກກຸ່ມໂອດອບ ແລະ ອົງການຈັດຕັ້ງສາກົນອື່ນໆອີກ.
