5 ເລື່ອງເດັ່ນທີ່ເກີດຂຶ້ນໃນ ລາວລີກ 1 ນັດເປີດລະດູການ..!

ຜ່ານໄປເປັນທີ່ຮຽບຮ້ອຍສຳລັບການແຂ່ງຂັນບານເຕະລາວລີກ 1, ໂດຍມີພຽງ ປກສ ທີ່ສາມາດເກັບ 3 ແຕ້ມໄດ້ ເຮັດໃຫ້ຂຶ້ນຳເປັນອັນດັບ 1 ຂອງຕາຕະລາງເມື່ອຜ່ານພົນອາທິດທີ 1 ໄປ. ໃນຂະນະດຽວກັນ ກໍ່ມີຫຼາຍເຫດການເດັ່ນສຳລັບການແຂ່ງຂັນໃນອາທິດນີ້ເຊິ່ງຜູ້ຂຽນຂໍສະຫຼຸບດັ່ງນີ້:

1. ອີງໃສ່ມາດຕະການປ້ອງກັນເຊື້ອໄວຣັສ Covid-19 ການທັກທາຍຂອງນັກກິລາໃນສະໜາມຫຼັງຈາກຍ່າງເຂົ້າສະໜາມບໍ່ໃຫ້ມີການສຳພັດມືແຕ່ປ່ຽນມາໃຊ້ການນົບແທນ ເຊິ່ງຖືໄດ້ວ່າເປັນເອກະລັກ ແລະ ເປັນວິທີການທີ່ດີ. ຕ້ອງຂໍຊົມເຊີຍຄະນະຈັດການແຂ່ງຂັນທີ່ມີແນວຄວາມຄິດດີໆແບບນີ້
2. ແຟນບານໃຫ້ຄວາມສົນໃຈການແຂ່ງຂັນບານເຕະລີກ 1 ຫຼາຍຂຶ້ນ ສັງເກດໄດ້ຈາກນັດທໍາອິດຂອງການແຂ່ງຂັນແຟນບານ(ໂດຍສະເພາະ ຄົນຮຸ້ນໃໝ່) ແຮ່ກັນເຂົ້າຊົມການແຂ່ງຂັນ ທີສະໜາມກິລາຫຼັກ 16 ຫຼາຍກວ່າ 1000 ຄົນ. ແຕ່ກໍ່ໜ້າເປັນຫ່ວງບາງສະໂມສອນທີ່ເຄີຍມີຖານແຟນບານຫຼາຍກັບມີແຟນບານເຂົ້າມາເຊຍທີມຂອງຕົນໜ້ອຍລົງຢ່າງເຫັນໄດ້ຊັດເຈນ.
3. ເກມບຸກຂອງທຸກທີມທີ່ລົງແຂ່ງຂັນລາວລີກ 1 ໃນອາທິດທໍາອິດຍັງຝືດຫຼາຍ, ເຖິງແມ່ນວ່າຜົນການແຂ່ງຂັນບານເຕະລາວລີກ 1 ໃນອາທິດທຳອິດຈະຈົບລົງໂດຍທີ່ທຸກຄູ່ມີສະກໍເກີດຂຶນກໍ່ຕາມແຕ່ມາເບິ່ງຜົນງານໂດຍລວມແລ້ວ ເກມບຸກຂອງເກືອບທຸກທີມຍັງບໍ່ທັນເຮັດໄດ້ດີເທົ່າທີຄວນ, ໂດຍສະເພາະແຊ້ມເກົ່າ ສະໂມສອນລາວໂຕໂຢຕ້າ ເມື່ອລະດູການນີ້ບໍ່ມີກອງໜ້າຕຳນານຂອງສະໂມສອນ ຄາຊູ ໂອະ ໂຮມາເຫັນໄດ້ວ່າ ປະສິດທິພາບໃນເກມບຸກແຜ່ວລົງຢ່າງຊັດເຈນ. ສ່ວນ Master 7 ກໍ່ອາໃສ ຄູນສົມບັດ ໄປຢືນເປັນໜ້າເປົ່າ ເຊິ່ງທີ່ຜ່ານມາອາດີດນັກເຕະຂອງ ສະໂມສອນ ປກສ ແມ່ນຫຼິ້ນຕໍາແໜ່ງກອງຫຼັງ ຫຼື ປີກມາຕະຫຼອດ ແຕ່ນັດເປີດສະໜາມກໍ່ໄດ້ສ້າງຄວາມປະຫຼາດໃຈ ໂດຍໂຄຊ ຈັນດາລາພອນ ຈັບເຂົາໄປເປັນໜ້າເປົ້າ.
4. ເອສຣາ ກັບຂຶ້ນມາຫຼິ້ນໃນລີກ 1 ພ້ອມກັບ ຄວາມໝັ້ນໃຈແລະກອງເຊຍທີ່ໜ້າແໜ້ນ, ໃນລະດູການນີ້ເອສຣາ ທີມທີ່ປັ້ນນັກເຕະຜູ້ທີ່ມີຊື່ສຽງລະດັບຊາດແລະລະດັບອາຊຽນມາແລ້ວຈຳນວນຫຼາຍໄດ້ຫວນຄືນສູ່ເວທີ ລີກ 1 ເຊິ່ງການກັບມາໃນຄັ້ງນີ້ພວກເຂົາໄດ້ໃຊ້ກຳລັງເກົ່າທີ່ມີປະສົບການສູງຄື ພັດທະນາ ພົມມະເທບ ປະສົມປະສານກັບບັນດານ້ອງໆ ທີ່ຂຶນມາໃໝ່ ໂດຍອາຍຸສະເລ່ຍຂອງທີມແມ່ນບໍ່ກາຍ 20 ປີ, ສິ່ງສຳຄັນລະດູການນີ້ ທີມຂອງພວກເຂົາແມ່ນສາມາດດຶງດູດກອງເຊຍ ໄວໜຸ່ມ ໂດຍສະເພາະ ສາວໆ ເຂົ້າມາຊົມມາເຊີຍເຮັດໃຫ້ສີສັນຂອງລາວລີກ 1 ເພີ່ມຂຶ້ນມາທັນທີ.
5. ກໍາເນີດກອງກາງໂຕຕັດເກມ KANU ຖ້າໃຜໄດ້ຊົມການແຂ່ງຂັນຄູ່ລະຫວ່າງຊ້າງນ້ອຍ ພົບກັບ ເອສຣາ ຕ້ອງບອກເລີຍວ່າຜູ້ຫຼິ້ນໝາຍເລກ 30 ການູ(KANU) ຂອງຊ້າງນ້ອຍໂຊຜົນງານໄດ້ຢ່າງໂດດເດັ່ນດ້ວຍການຕັດເກມໃນຈັງວະສຳຄັນໆໄດ້ຫຼາຍຄັ້ງ ພ້ອມທັງຄວາມຝິດທີ່ສະແດງໃຫ້ເຫັນຕະຫຼອດ 90 ນາທີ່ໄດ້ຢ່າງບໍ່ມີປັນຫາ ລວມເຖິງການສ້າງຈັງວະໃຫ້ທີມໃນການຫຼິ້ນເກມບຸກໄດ້ອີກດ້ວຍ. ຖ້າບໍ່ມີ ການູ ບໍ່ຮູ້ວ່າຜົນການແຂ່ງຂັນໃນມື້ນັ້ນຈະອອກມາສະເໝີແບບ 1-1 ຫຼືບໍ່ ນີ້ກໍ່ຄື 5 ເຫດການເດັ່ນສຳລັບການແຂ່ງຂັນບານເຕະລາວລີກ 1 ໃນອາທິດທຳອິດນີ້.

ໂດຍ:ນັກຂ່າວເງົາ

ພາບ: Khanthaly Noy Tatideth,Laotoyota FC,Lao Premier League