ເກົາຫຼີ ເຫນືອ ປະຕິເສດທີ່ຈະເຈລະຈາກັບ ສະຫະລັດ.

ເຈົ້າໜ້າທີ່ການຕ່າງປະເທດຂອງ ສປ ເກົາຫຼີ ປະກາດວ່າ: ສປ ເກົາຫຼີ ບໍ່ເຫັນມີຄວາມຈຳເປັນທີ່ຈະເຈລະຈາກັບ ສະຫະລັດ ເມື່ອເຫັນວ່າ ນີ້ພຽງແຕ່ເປັນ “ເຄື່ອງມືທາງການເມືອງ” ຂອງ ວໍຊິງຕັນ ເທົ່ານັ້ນ.

ຮອງລັດຖະມົນຕີການຕ່າງປະເທດຂອງ ສປ ເກົາຫຼີ ທ່ານ Choe Son Hui ເນັ້ນວ່າ: ການເຈລະຈາລະຫວ່າງ ພຽງຢາງ ແລະ ວໍຊິງຕັນ ຈະບໍ່ໄດ້ຮັບຜົນ ແລະ ຈະບໍ່ມີການປ່ຽນແປງໃດໆ ໃນນະໂຍບາຍຂອງ ສປ ເກົາຫຼີ.

ສຳນັກຂ່າວສານ ຂອງ ສປ ເກົາຫຼີ(KCNA), ວັນທີ 4 ກໍລະກົດນີ້ ໄດ້ອ້າງອີງຄຳເວົ້າຂອງທ່ານ ນາງ Choe ໃຫ້ຮູ້ວ່າ: “ພວກເຮົາບໍ່ເຫັນມີຄວາມຕ້ອງການໃດໆທີ່ຈະຕ້ອງມານັ່ງເຈລະຈາກັບສະຫະລັດ ຊຶ່ງພວກເຮົາເຫັນວ່າ ການເຈລະຈາກັບສະຫະລັດ ພຽງແຕ່ເປັນເຄື່ອງມືເພື່ອແກ້ໄຂວິກິດການທາງການເມືອງພາຍໃນປະເທດຂອງພວກເຂົາເທົ່ານັ້ນ”.

Reuters ໃຫ້ຮູ້ວ່າ: ຜູ້ຕາງໜ້າຂອງ ສປ ເກົາຫຼີ ປະກາດອອກມາ ໃນຂະນະທີ່ຮອງລັດຖະມົນຕີການຕ່າງປະເທດຂອງ ສະຫະລັດ Stephen Biegun ມາຢ້ຽມຢາມ ສ ເກົາຫຼີ ໃນອາທິດທີ່ຜ່ານມາ ຊຶ່ງຈະປຶກສາຫາລືກ່ຽວກັບກອງປະຊຸທສຸດຍອດທີ່ຍັງຄ້າງຄາກັບ ພຽງຢາງ.

ຊຶ່ງກ່ອນໜ້ານັ້ນຄື ວັນທີ 1 ກໍລະກົດ ປະທານາທິບໍດີ Moon Jae-in ກໍເວົ້າວ່າ: ປະທານາທິບໍດີ ທຣຳ ຄວນພົບປະກັບ ຜູ້ນຳ ສປ ເກົາຫຼີ ຄີມຈອງອູນ ກ່ອນການເລືອກຕັ້ງປະທານາທິບໍດີຂອງສະຫະລັດໃນເດືອນ ພະຈິກ ທີ່ຈະມາເຖິງ.

ຂ່າວ: ລູກເມືອງພວນ(ແຫຼ່ງຂ່າວ vietnamnet)