ນັກວິທະຍາສາດທົ່ວໂລກຮ່ວມກັນເຕືອນ WHO ແປງຂໍ້ແນະນຳໂຄວິດ-19 ຫລັງພົບຫລັກຖານບົ່ງບອກ ໄວຣັສແຜ່ກະຈາຍທາງອາກາດໄດ້
ໜັງສືພິມ The New York Times ລາຍງານວ່າ: ນັກວິທະຍາສາດ 239 ຄົນ ຈາກ 32 ປະເທດ ຮ່ວມສົ່ງຈົດໝາຍເຖິງອົງການອະນາໄມໂລກ (WHO) ຂໍໃຫ້ປ່ຽນແປງຂໍ້ແນະນຳກ່ຽວກັບການຫລີກລ່ຽງການຕິດເຊື້ອໄວຣັສໂຄໂຣນາ 2019 ທີ່ເປັນຕົ້ນເຫດຂອງພະຍາດໂຄວິດ-19 ຫລັງພົບຫລັກຖານວ່າ: ອະນຸພາກຂະໜາດນ້ອຍຂອງໄວຣັສທີ່ລອຍໃນອາກາດສາມາດກໍ່ໃຫ້ເກີດການຕິດເຊື້ອໃນມະນຸດໄດ້.
ໂດຍຜ່ານມາ WHO ລະບຸວ່າ: ພະຍາດໂຄວິດ-19 ນັ້ນ ໂດຍຫລັກແລ້ວສາມາດລະບາດໄດ້ຈາກບຸກຄົນໜຶ່ງສູ່ບຸກຄົນໜຶ່ງ ຜ່ານທາງລະອອງຝອຍທີ່ອອກມາຈາກດັງ ຫລື ປາກຂອງຜູ້ຕິດເຊື້ອໂຄວິດ-19 ດ້ວຍການໄອ, ຈາມ ຫລື ເວົ້າ.
ຂະນະທີ່ກຸ່ມນັກວິທະຍາສາດລະບຸໃນຈົດໝາຍທີ່ກຽມເຜີຍແຜ່ໃນວາລະສານວິທະຍາສາດໃນອາທິດນີ້ ສະແດງໃຫ້ເຫັນຫລັກຖານວ່າ: ອະນຸພາກຂະໜາດນ້ອຍຂອງເຊື້ອໄວຣັສໂຄໂຣນາ 2019 ນັ້ນສາມາດແຜ່ກະຈາຍຜ່ານທາງລະອອງຝອຍທີ່ເກີດຈາກການໄອ, ຈາມ ຫລື ລະອອງຝອຍຂະໜາດນ້ອຍທີ່ສຸດທີ່ເຮົາຫາຍໃຈອອກມາທາງດັງ ເຊິ່ງສາມາດລອຍໄປຕາມອາກາດໄດ້ໄກຕາມຂະໜາດຫ້ອງ ແລະ ກໍ່ໃຫ້ເກີດການຕິດເຊື້ອໄດ້ພຽງແຕ່ຫາຍໃຈເຂົ້າໄປ.
ລາຍງານຂອງ The New York Times ຍັງລະບຸວ່າ: ກໍລະນີການລະບາດແບບກຸ່ມທີ່ເພີ່ມຂຶ້ນພາຍຫລັງການເປີດທຸລະກິດຕ່າງໆເຊັ່ນ: ຮ້ານບັນເທີງ, ຮ້ານອາຫານ, ຕະຫລາດ, ກາສິໂນ ຫລື ສຳນັກງານຕ່າງໆ ເປັນສິ່ງຢືນຢັນເຖິງຂໍ້ມູນທີ່ນັກວິທະຍາສາດຫລາຍທ່ານລະບຸໄວ້ໃນຫລາຍເດືອນຜ່ານມາວ່າ: ໄວຣັສໂຄໂຣນາ 2019 ນັ້ນລອຍຄ້າງຢູ່ໃນອາກາດໃນພື້ນທີ່ປິດ ຫລື ພື້ນທີ່ໃນຮົ່ມໄດ້ດົນກວ່າ ແລະ ເຮັດໃຫ້ຜູ້ທີ່ເຂົ້າໃກ້ນັ້ນຕິດເຊື້ອ.
ເຖິງຢ່າງໃດກໍຕາມ, ໃນການອັບເດດຂໍ້ມູນການຕິດໂຄວິດ-19 ຫລ້າສຸດຂອງ WHO ທີ່ເຜີຍແຜ່ໃນວັນທີ 29 ມິຖຸນາຜ່ານມາ ລະບຸວ່າ: ການແຜ່ລະບາດຂອງເຊື້ອໄວຣັສໂຄໂຣນາ 2019 ທາງອາກາດນັ້ນ ຈະເກີດຂຶ້ນໄດ້ເມື່ອມີການເຮັດຫັດຖະການທາງການແພດ ທີ່ກໍ່ໃຫ້ເກີດ Aerosol ຫລື ລະອອງຂະໜາດນ້ອຍໃນອາກາດ ເຊິ່ງເປັນລະອອງຝອຍທີ່ມີຂະໜາດນ້ອຍກວ່າ 5 ໄມຄຣອນ ແລະ ໃນກໍລະນີດັ່ງກ່າວຈຳເປັນຕ້ອງໃຊ້ລະບົບລະບາຍອາກາດທີ່ເໝາະສົມ ລວມທັງຜ້າອັດປາກ-ດັງຊະນິດ N95 ຂຶ້ນໄປເພື່ອປ້ອງກັນການຕິດເຊື້ອ.
ສ່ວນຜູ້ຊ່ຽວຊານຂອງ WHO ໄດ້ຕັ້ງຂໍ້ສັງເກດເຖິງຄວາມໜ້າເຊື່ອຖືໃນຫລັກຖານເລື່ອງການແຜ່ລະບາດຂອງເຊື້ອໄວຣັສໂຄໂຣນາ 2019 ຜ່ານທາງອາກາດ ໂດຍຢືນຢັນວ່າມີຄວາມເປັນໄປໄດ້ ແຕ່ຍັງບໍ່ມີຫລັກຖານສະໜັບສະໜູນທີ່ຈະແຈ້ງ ແລະ ໜ້າເຊື່ອຖື.
