ຄະນະກຳມະການເລືອກຕັ້ງມຽນມາ ກຽມຈັດການເລືອກຕັ້ງຄັ້ງໃຫຍ່ 8 ພະຈິກນີ້
ເຖິງວ່າໂຄວິດ-19 ຈະຍັງແຜ່ລະບາດໃນຫລາຍພື້ນທີ່ທົ່ວໂລກ, ແຕ່ຫລາຍປະເທດຍັງຕັດສິນໃຈເດີນໜ້າຈັດການເລືອກຕັ້ງ ເພື່ອຂັບເຄື່ອນການເມືອງຂອງປະເທດຕົນ ໂດຍຄະນະກຳມະການການເລືອກຕັ້ງມຽນມາ (UEC) ປະກາດກຽມຈັດການເລືອກຕັ້ງທົ່ວໄປຂຶ້ນໃນວັນທີ 8 ພະຈິກນີ້.
ໂດຍຈັດການເລືອກຕັ້ງຂຶ້ນໃນທຸກລະດັບ ທັງລະດັບປະເທດ, ລະດັບລັດ ແລະ ລະດັບທ້ອງຖິ່ນ ມີໂກຕ້າທັງໝົດ 1.171 ບ່ອນນັ່ງທົ່ວປະເທດ ເຊິ່ງແບ່ງເປັນສະມາຊິກສະພາຜູ້ແທນລາຊະດອນ (Phithu Hluttaw) 330 ບ່ອນນັ່ງ ແລະ ສະມາຊິກວຸດທິສະພາ (Amyotha Hluttaw) 168 ບ່ອນນັ່ງ. ຂະນະທີ່ໃນລະດັບລັດ ແລະ ລະດັບທ້ອງຖິ່ນມີ 664 ບ່ອນນັ່ງ ແລະ ແບ່ງສັດສ່ວນໃຫ້ກຸ່ມຊາດພັນອື່ນໆໃນມຽນມາອີກ 29 ບ່ອນນັ່ງ ເຊິ່ງພັກສັນນິບາດແຫ່ງຊາດເພື່ອປະຊາທິປະໄຕ (NLD) ຂອງທ່ານ ນາງ ອອງ ຊານ ຊູຈີ ໄດ້ຮັບໄຊຊະນະໃນການເລືອກຕັ້ງຄັ້ງຜ່ານມາໃນປີ 2015 ຢ່າງຫລວງຫລາຍ ຂຶ້ນບໍລິຫານປະເທດເປັນລັດຖະບານພົນລະເຮືອນຄັ້ງທຳອິດໃນຮອບກວ່າເຄິ່ງສະຕະວັດຂອງມຽນມາ.
ຜົນການເລືອກຕັ້ງທົ່ວໄປໃນຄັ້ງນີ້ຈະເປັນຕົວຊີ້ວັດຄວາມເພິ່ງພໍໃຈຂອງຜົນງານການບໍລິຫານປະເທດຂອງທ່ານ ນາງ ອອງ ຊານ ຊູຈີ ຕະຫລອດ 5 ປີຜ່ານມາ. ຫລາຍຝ່າຍຄາດຄະເນວ່າ: ພັກ NLD ຈະສາມາດສ້າງຜົນງານໄດ້ດີອີກ ໃນການເລືອກຕັ້ງຄັ້ງນີ້, ແຕ່ການຈະຄອງສຽງສ່ວນຫລາຍໃນລັດຖະສະພາຢ່າງຕໍ່ເນື່ອງນັ້ນອາດບໍ່ງ່າຍອີກຕໍ່ໄປ ຫລັງລັດຖະບານນາງ ອອງ ຊານ ຊູຈີ ຜະເຊີນແຮງສຽດທານຈາກປັດໄຈພາຍນອກ ແລະ ພາຍໃນຢ່າງໜັກ ທັງສຽງທັດທານຈາກປະຊາຄົມໂລກຈາກກໍລະນີກວາດລ້າງຊາວໂຣຮີນຈາທີ່ເປັນການລະເມີດສິດທິມະນຸດຈົນເກີດການລີ້ໄພຄັ້ງໃຫຍ່ ລວມທັງຄວາມຂັດແຍ່ງດ້ານຄວາມໝັ້ນຄົງໃນລັດຍະໄຂ່ ແລະ ຜົນກະທົບຈາກວິກິດພະຍາດລະບາດທີ່ກຳລັງຜະເຊີນຢູ່ໃນປັດຈຸບັນ.
ຖ້າພັກ NLD ຂອງນາງ ອອງ ຊານ ຊູຈີ ຊະນະການເລືອກຕັ້ງໃນຄັ້ງນີ້ ຈະເປັນໄຊຊະນະຄັ້ງທີ 2 ຂອງລັດຖະບານພົນລະເຮືອນທີ່ຈະກ້າວຂຶ້ນບໍລິຫານປະເທດ ຫລັງມຽນມາຖືກປົກຄອງພາຍໃຕ້ລັດຖະບານທະຫານນັບແຕ່ການເຂົ້າຍຶດອຳນາດຂອງ ນາຍພົນ ເນວິນ ຜູ້ນຳກອງທັບ (Tatmadaw) ທີ່ກ້າວຂຶ້ນມາບໍລິຫານປະເທດໃນປີ 1962.
