‘ອາເມລິກາ’ ຜ່ານຮ່າງກົດໝາຍຂວ້ຳບາດ ‘ທະນາຄານຈີນ’

ສໍານັກຂ່າວກຽວໂດ ລາຍງານວ່າ: ສະພາຜູ້ແທນລາຊະດອນອາເມລິກາ ໄດ້ຜ່ານຮ່າງກົດໝາຍລົງໂທດທະນາຄານຂອງຈີນທີ່ເຮັດທຸລະກິດກັບເຈົ້າໜ້າທີ່ທີ່ມີສ່ວນກ່ຽວຂ້ອງກັບກົດໝາຍຄວາມໝັ້ນຄົງ ໃນຮົງກົງ.

ເນື້ອໃນກົດໝາຍສະບັບນີ້ກໍານົດໃຫ້ອາເມລິກາ ສາມາດດຳເນີນມາດຕະການຂວ້ຳບາດຕໍ່ທະນາຄານຂອງຈີນທີ່ເຮັດທຸລະກຳໃດໆກັບບຸກຄົນ, ບໍລິສັດ ຫລື ເຈົ້າໜ້າທີ່ລັດຖະບານຈີນ ເຊິ່ງການຂວ້ຳບາດນັ້ນອາດໝາຍເຖິງຫ້າມເຮັດທຸລະກິດກັບອາເມລິກາ ແລະ ປະເທດພັນທະມິດ ຕະຫລອດຈົນຈຳກັດການເຂົ້າເຖິງການຊື້ຂາຍສະກຸນເງິນໂດລາສະຫະລັດ.

ຮ່າງກົດໝາຍດັ່ງກ່າວ ຄືກັບມາດຕະການທີ່ວຸດທິສະພາອາເມລິກາຫາກໍອະນຸມັດໃນອາທິດຜ່ານມາ ໂດຍຈະຕ້ອງລໍຖ້າໃຫ້ວຸດທິສະພາຜ່ານຮ່າງກົດໝາຍໃໝ່ນີ້ ກ່ອນຈະສົ່ງຕໍ່ໃຫ້ປະທານາທິບໍດີ ໂດນັລ ທຣຳ ລົງນາມຕໍ່ໄປ.