ອິຕາລີຍຶດຢາບ້າຈຳນວນຫລາຍທີ່ສຸດໃນໂລກໜັກ 14 ໂຕນ ຄາດກຸ່ມ IS ເປັນຜູ້ຜະລິດ
ວັນທີ 1 ກໍລະກົດ, ທາງການອິຕາລີຍຶດສານເສບຕິດແອມເຟຕາມີນ ຫລື ຢາບ້າ ຈຳນວນຫລາຍທີ່ສຸດໃນໂລກ 84 ລ້ານເມັດ ນ້ຳໜັກ 14 ໂຕນ ມູນຄ່າຫລາຍກວ່າ 1.000 ລ້ານເອີໂຣ ທີ່ເຊື່ອງຢູ່ນຳເຈ້ຍທີ່ໃຊ້ໃນອຸດສາຫະກຳໃນຕູ້ຄອນເທນເນີຢູ່ທ່າກຳປັ່ນ Salerno ທາງຕາເວັນຕົກສຽງໃຕ້ຂອງອິຕາລີ ກ່ອນຈະກະຈາຍໄປປະເທດຕ່າງໆທົ່ວເອີຣົບ.
ເຈົ້າໜ້າທີ່ຕຳຫລວດ Guardia di Finanza ທີ່ຕິດຕາມຄະດີການລັກລອບຄ້າຢາເສບຕິດຂອງແກ້ງມາເຟຍ Camorra ນີ້ມາໂດຍຕະຫລອດລະບຸວ່າ: ຢາບ້າຈຳນວນດັ່ງກ່າວມີຈຳນວນຫລາຍທີ່ສຸດໃນໂລກ ທັງມູນຄ່າ ແລະ ປະລິມານ ໂດຍນຳເຂົ້າຈາກປະເທດເຂດຕາເວັນອອກກາງ ມີໂລໂກ້ “Captagon” ເຊິ່ງເປັນຍີ່ຫໍ້ຢາທີ່ເຄີຍໃຊ້ປິ່ນປົວພະຍາດສະມາທິສັ້ນ ກ່ອນທາງການຫລາຍປະເທດຈະຫ້າມການໃຊ້ຢາດັ່ງກ່າວ ເນື່ອງຈາກມີລິດເຮັດໃຫ້ເສບຕິດ.
ຢາດັ່ງກ່າວເປັນທີ່ນິຍົມຫລາຍໃນກຸ່ມໄວໜຸ່ມທີ່ມີຖານະຢູ່ຕາເວັນອອກກາງ, ປັດຈຸບັນຊິຣີຖືເປັນປະເທດທີ່ຜະລິດ ແລະ ສົ່ງອອກຢາ Captagon ປອມລາຍໃຫຍ່ທີ່ສຸດໃນໂລກ ແລະ ຄາດວ່າ: ກຸ່ມລັດອິສລາມ ຫລື ກຸ່ມ IS ອາດມີສ່ວນພົວພັນການຜະລິດຢາເສບຕິດຈຳນວນຫລາຍທີ່ສຸດໃນໂລກທີ່ຍຶດໄດ້ໃນຄັ້ງນີ້ ເຊິ່ງເຄີຍມີລາຍງານວ່າ: ສະມາຊິກຂອງກຸ່ມ IS ເຄີຍໃຊ້ຢາຊະນິດນີ້ເພື່ອເພີ່ມພະລັງໃຫ້ຮ່າງກາຍຮູ້ສຶກແຂງແຮງ ແລະ ໃຊ້ເປັນໜຶ່ງໃນຊ່ອງທາງຫາລາຍໄດ້ເຂົ້າກຸ່ມ.
