ຫລາຍບໍລິສັດເດີນໜ້າຖອນໂຄສະນາ Facebook ‘ຢຸດຄວາມກຽດຊັງເພື່ອກຳໄລ’
ຜູ້ສ້າງໂຄງການ “ຢຸດຄວາມກຽດຊັງເພື່ອກຳໄລ” (#StopHateforProfit) ກຽມຍົກລະດັບການປຸກລະດົມຫວັງເພີ່ມແຮງກົດດັນຕໍ່ເຟສບຸກ (Facebook) ໃຫ້ເອົາຂໍ້ຄວາມສ້າງຄວາມກຽດຊັງອອກ.
ຈິມ ສະເຕເຍີ ປະທານຄະນະເຈົ້າໜ້າທີ່ບໍລິຫານຄອມມອນເຊນ ມີເດຍ ຜູ້ຮ່ວມສ້າງໂຄງການ ຢຸດຄວາມກຽດຊັງເພື່ອກຳໄລ (#StopHateforProfit) ກ່າວຕໍ່ສຳນັກຂ່າວຣອຍເຕີວ່າ: ຄະນະຜູ້ຈັດກຽມຮຽກຮ້ອງບໍລິສັດໃນເອີຣົບໃຫ້ຮ່ວມປຸກລະດົມໂຄງການນີ້.
ນັບແຕ່ #StopHateforProfit ເປີດຕົວມາເມື່ອບໍ່ດົນມານີ້ ມີບໍລິສັດເຂົ້າຮ່ວມແລ້ວຫລາຍກວ່າ 160 ບໍລິສັດ ລວມທັງ ຢູນິລີເວີ, ເວີໄຣຊອນ ແລະ ເບນແອນເຈີຣີ ທີ່ປະກາດວ່າ: ຈະຢຸດການໂຄສະນາໃນເຟສບຸກ ສື່ສັງຄົມອອນລາຍໃຫຍ່ທີ່ສຸດຂອງໂລກໃນເດືອນກໍລະກົດນີ້.
ໂຄງການ “ຢຸດຄວາມກຽດຊັງເພື່ອກຳໄລ” ສ້າງຕັ້ງໂດຍອົງການຟຣີເພຣສ ຄອມມອນເຊນ ກຸ່ມນັກສິດທິມະນຸດເຊັ່ນ: ຄັລເລີອອຟເຊນ ແລະ ແອນໄທດີເຟເມຊັນລີກ ຫລັງເຫດການຂອງ ຈອດ ຟລອຍ ທີ່ຖືກຕຳຫລວດມິນນິແອໂພລິສ ປະຕິບັດໜ້າທີ່ເກີນກວ່າເຫດ.
ຄວາມຄຽດແຄ້ນຈາກການເສຍຊີວິດຂອງ ຟລອຍ ສົ່ງຜົນສະເທືອນໃນກຸ່ມທຸລະກິດໄປທົ່ວໂລກ. ຕົວຢ່າງ: ຢູນິລີເວີເຖິງກັບຕ້ອງປ່ຽນຊື່ຜະລິດຕະພັນເຮັດໃຫ້ຜິວຂາວທີ່ນິຍົມໃນອິນເດຍທີ່ໃສ່ຊື່ວ່າ: ແຟຣແອນເລິບລີ.
ໃນວັນທີ 28 ມິຖຸນາຜ່ານມາ, ເຟສບຸກມີປະຕິກິລິຍາຕໍ່ແຮງກົດດັນທີ່ເພີ່ມຂຶ້ນ ກ່າວວ່າ: ບໍລິສັດຮູ້ວ່າຕ້ອງເຮັດແນວໃດໃນເລື່ອງນີ້ ແລະ ກຳລັງຮ່ວມກັບກຸ່ມສິດທິມະນຸດ ແລະ ຜູ້ຊ່ຽວຊານຕ່າງໆ ໃນການພັດທະນາເຄື່ອງມືທີ່ຈະມາຮັບມືຕໍ່ຄຳເວົ້າສ້າງຄວາມກຽດຊັງ (hate speech) ບໍລິສັດໄດ້ລົງທຶນໃຊ້ເອໄອ ຊ່ວຍກວດຈັບຂໍ້ຄວາມດັ່ງກ່າວໄດ້ສູງເຖິງ 90% ກ່ອນຈະມີຜູ້ໃຊ້ເຟສບຸກລາຍງານເຂົ້າມາ.
ເຖິງຢ່າງໃດກໍຕາມ, ການຂະຫຍາຍໂຄງການຢູ່ອາເມລິກາອາດສົ່ງຜົນກະທົບຕໍ່ລາຍໄດ້ຈາກການໂຄສະນາຂອງບໍລິສັດຫລາຍຂຶ້ນ, ແຕ່ບໍ່ຄ່ອຍມີຜົນກະທົບທາງການເງິນໃນພາບລວມຫລາຍ.
ຣິຊາດ ກຣີນຟິລ ຈາກບໍລິສັດສື່ ແລະ ເຕັກໂນໂລຊີ “ໄລເຊດ ພາດເນີ” ຍົກຕົວຢ່າງ ຢູນິລີເວີ ທີ່ປະກາດວ່າຈະຢຸດໂຄສະນາໃນເຟສບຸກຢູ່ອາເມລິກາໝົດປີ ແຕ່ນັ້ນເປັນພຽງ 10% ຂອງຈຳນວນເງິນໂຄສະນາທີ່ຢູນິລີເວີລົງທຶນກັບເຟສບຸກໝົດປີປະມານ 250 ລ້ານໂດລາ. ໃນປີຜ່ານມາ ເຟສບຸກມີລາຍໄດ້ຈາກການໂຄສະນາເກືອບ 70.000 ລ້ານໂດລາ ໂດຍ 1 ໃນ 4 ຂອງລາຍໄດ້ດັ່ງກ່າວມາຈາກບໍລິສັດໃຫຍ່ໆເຊັ່ນ: ຢູນິລີເວີ, ແຕ່ຂ່າວຕ່າງໆກ່ຽວກັບນະໂຍບາຍ hate speech ຂອງເຟສບຸກໄດ້ກະທົບຕໍ່ພາບພົດ ແລະ ລາຄາຫຸ້ນໃນຕະຫລາດ. ໃນວັນທີ 26 ມິຖຸນາ ລາຄາຫຸ້ນເຟສບຸກຫລຸດລົງຫລາຍກວ່າ 8,3% ເທົ່າກັບວ່າ: ມູນຄ່າຕະຫລາດຫາຍໄປ 5.600 ລ້ານໂດລາ.
ບັນດາບໍລິສັດລາຍໃຫຍ່ທີ່ຮ່ວມຖອນໂຄສະນາຈາກ Facebook ນອກຈາກ Unilever ແລ້ວກໍມີ Coca-Cola, Honda, Starbuck, Hershey Co., Diageo Plc, PepsiCo, Verizon Communications Inc ແລະ Ben & Jerry’s Homemade Inc.
