WHO ປະກາດເຕືອນ ສະຖານະການໂຄວິດ-19 ອາດຮຸນແຮງອີກ ຫລັງລະບາດເຖິງ 6 ເດືອນ
ວັນທີ 30 ມິຖຸນາ, ອົງການອະນາໄມໂລກ (WHO) ປະກາດເຕືອນວ່າ: ສະຖານະການໂຄວິດ-19 ອາດຮ້າຍແຮງອີກ ຫລັງການແຜ່ລະບາດຜ່ານມາເຖິງ 6 ເດືອນ ມີຜູ້ຕິດເຊື້ອສະສົມຫລາຍກວ່າ 10 ລ້ານຄົນ, ປິ່ນປົວຫາຍດີປະມານເຄິ່ງໜຶ່ງຂອງຜູ້ຕິດເຊື້ອທັງໝົດ, ເສຍຊີວິດແລ້ວຫລາຍກວ່າ 5 ແສນຄົນທົ່ວໂລກ. ຊີ້ພົນລະເມືອງໂລກຈະຕິດໂຄວິດ-19 ເພີ່ມຂຶ້ນອີກ ຖ້າລັດຖະບານດຳເນີນນະໂຍບາຍ ແລະ ມາດຕະການຮັບມືບໍ່ກົງຈຸດ ແລະ ບໍ່ມີປະສິດທິພາບ.
ທ່ານ ດຣ. ທີໂດຣສ ອັດຮານອມ ກີບຣີເຢຊຸສ ຜູ້ອຳນວຍການໃຫຍ່ອົງການອະນາໄມໂລກ ຍັງແນະນຳໃຫ້ທາງການເດີນໜ້າກວດຫາເຊື້ອ, ຕິດຕາມກຸ່ມສ່ຽງ, ແຍກຕົວ ແລະ ກັກຕົວເພື່ອຫລຸດໂອກາດການຕິດເຊື້ອ, ຄາດວ່າສະຖານະການການແຜ່ລະບາດຢູ່ອາຊີໃຕ້ ແລະ ອາຟຣິກາຈະຍັງບໍ່ຮອດຈຸດສູງສຸດຈົນກວ່າຈະຮອດທ້າຍເດືອນກໍລະກົດ.
ການຂາດຄວາມເປັນອັນໜຶ່ງອັນດຽວກັນພາຍໃນປະເທດ, ຂາດຄວາມສາມັກຄີໃນລະດັບໂລກ, ແບ່ງພັກແບ່ງພວກ ຈະຍິ່ງຊ່ວຍເຮັດໃຫ້ໂຣກລະບາດແຜ່ກະຈາຍໄດ້ຫລາຍຂຶ້ນ, ສະຖານະການທີ່ຮຸນແຮງທີ່ສຸດຍັງມາບໍ່ຮອດ.
ໂດຍຜູ້ອຳນວຍການໃຫຍ່ອົງການອະນາໄມໂລກກ່າວຍ້ອງຍໍເຢຍລະມັນ, ສ.ເກົາຫລີ ແລະ ຍີ່ປຸ່ນ. ພ້ອມໃຫ້ບັນດາປະເທດເບິ່ງປະເທດເຫລົ່ານີ້ເປັນຕົວຢ່າງໃນການຮັບມືໂຄວິດ-19 ທີ່ທັງກວດຫາເຊື້ອທາງບຸກ ແລະ ຕິດຕາມກຸ່ມສ່ຽງຢ່າງຈິງຈັງ, ຕັດສິນໃຈແກ້ໄຂບັນຫາຢ່າງຮີບດ່ວນຖ້າພົບກໍລະນີໃໝ່.
ຫລາຍເມືອງໃນຫລາຍປະເທດເລີ່ມທະຍອຍກັບມາໃຊ້ມາດຕະການລັອກດາວ ແລະ ເຂັ້ມງວດທາງສັງຄົມອີກເທື່ອໜຶ່ງ ຫລັງຈາກພົບການລະບາດຮອບໃໝ່. ທາງການນະຄອນຫລວງບຣາຊິເລຍ ຂອງເບຣຊິນ ປະກາດສະຖານະການສຸກເສີນ. ຂະນະທີ່ເຈົ້າເມືອງເລສເຕີໃນສະຫະຣາຊະອານາຈັກປະກາດລັອກດາວ, ຮ້ານບັນເທີງ ແລະ ຮ້ານອາຫານຈະຍັງປິດໃຫ້ບໍລິການອີກຢ່າງໜ້ອຍ 2 ອາທິດ.
