ຈີນກັກບໍລິເວນເຂັ້ມປະຊາຊົນ 4 ແສນຄົນ ໃນຊຸມຊົນໃກ້ປັກກິ່ງ ຫລັງພົບກໍລະນີໂຄວິດ-19 ໃໝ່ 18 ຄົນ
ທາງການຈີນລັອກດາວບ້ານ, ຊຸມຊົນ ແລະ ຕຶກອາຄານທັງໝົດໃນເຂດອັນຊິນ ມົນທົນເຫີເປຍ ໃກ້ກັບນະຄອນຫລວງປັກກິ່ງ ເຊິ່ງມີປະຊາກອນອາໄສປະມານ 4 ແສນຄົນ ຫລັງພົບຜູ້ຕິດໂຄວິດ-19 ໃໝ່ 18 ຄົນ.
ປະກາດຂອງເຈົ້າໜ້າທີ່ທີ່ອອກໃນວັນທີ 28 ມິຖຸນາ ລະບຸວ່າ: ມາດຕະການລັອກດາວດັ່ງກ່າວຈະອະນຸຍາດໃຫ້ແຕ່ລະຄອບຄົວສົ່ງສະມາຊິກອອກນອກເຮືອນໄດ້ພຽງວັນລະ 1 ຄົນ ເພື່ອໄປຊື້ອາຫານ ຫລື ສິນຄ້າອຸປະໂພກ-ບໍລິໂພກ. ນອກຈາກນີ້ ຍັງຫ້າມປະຊາຊົນໃນພື້ນທີ່ຂັບລົດຢູ່ຖະໜົນນຳອີກ.
ຈີນກຳລັງຜະເຊີນຄວາມສ່ຽງການລະບາດຂອງໂຄວິດ-19 ຮອບທີ 2 ຫລັງພົບກຸ່ມກ້ອນຜູ້ຕິດເຊື້ອ ໃໝ່ທີ່ເຊື່ອມໂຍງກັບຕະຫລາດຂາຍສົ່ງອາຫານຊິນຟາຕີ້ໃນນະຄອນຫລວງປັກກິ່ງ ເຊິ່ງຫລ້າສຸດເຊື້ອໄດ້ແຜ່ ກະຈາຍໄປມົນທົນທີ່ຢູ່ໃກ້ຄຽງເຊັ່ນ: ມົນທົນຫລຽວໜິງ ແລະ ເຫີເປຍ. ຂະນະທີ່ເຂດອັນຊິນໃນມົນທົນເຫີ ເປຍ ຕັ້ງຢູ່ທາງໃຕ້ຂອງນະຄອນຫລວງປັກກິ່ງປະມານ 150 ກິໂລແມັດ.
ກ່ອນໜ້ານີ້ ທາງການໄດ້ປະກາດລັອກດາວຊຸມຊົນທີ່ຢູ່ອາໄສອ້ອມຕະຫລາດຊິນຟາຕີ້ປະມານ 11 ແຫ່ງ ໂດຍຫ້າມປະຊາຊົນເຂົ້າ ຫລື ອອກນອກເຂດຄວບຄຸມ, ພ້ອມກຳນົດໃຫ້ທຸກຄົນຕ້ອງກວດອຸນຫະພູມ ແລະ ລາຍງານສຸຂະພາບຕໍ່ທາງການທຸກວັນ. ຂະນະທີ່ເຈົ້າໜ້າທີ່ຈະຈັດຫາອາຫານ ແລະ ເຄື່ອງໃຊ້ຈຳເປັນໃຫ້ຮອດເຮືອນ.
ລັດຖະບານທ້ອງຖິ່ນລາຍງານໃນວັນທີ 28 ມິຖຸນາວ່າ: ມີປະຊາຊົນໃນປັກກິ່ງປະມານ 8 ລ້ານຄົນ ທີ່ໄດ້ຮັບການກວດຫາເຊື້ອໄວຣັສໂຄໂຣນາແລ້ວ ໂດຍໄດ້ຂະຫຍາຍຂອບເຂດການກວດຈາກ 4 ໝື່ນຄົນ ເປັນ 4,5 ແສນຄົນຕໍ່ວັນ.
