ພິດໂຄວິດເຮັດໃຫ້ ບໍລິສັດໄນກີ້ (Nike) ຂາດທຶນເລັ່ງປົດພະນັກງານອອກ
ໃນວັນທີ 28 ມິຖຸນານີ້, ສຳນັກຂ່າວ ຣອຍເຕີ ລາຍງານວ່າ: ບໍລິສັດແບຣນກິລາຍັກໃຫຍ່ລະດັບໂລກດັ່ງ Nike ກຳລັງເລັ່ງປົດພະນັກງານຈຳນວນຫລາຍພັນຄົນ, ເນື່ອງຈາກຊ່ອງທາງການຂາຍຍ່ອຍແບບເກົ່າໆຄ່ອຍໆຫລຸດລົງ ເຊິ່ງເປັນຜົນກະທົບຈາກການລະບາດໃຫຍ່ຂອງພະຍາດໂຄວິດ-19 ເຮັດໃຫ້ຮ້ານຄ້າ ແລະ ຫ້າງຮ້ານສັບພະສິນຄ້າຕ້ອງປິດບໍລິການລົງຊົ່ວຄາວສົ່ງຜົນໃຫ້ລູກຄ້າສ່ວນຫລາຍຫັນມາເລືອກຊື້ສິນຄ້າຜ່ານທາງລະບົບອອນລາຍຫລາຍຂຶ້ນແທນ.
ໂດຍທາງປະທານບໍລິຫານຂອງ Nike ເຜີຍຕໍ່ນັກວິເຄາະວ່າ: ພວກເຂົາໄດ້ຕັດສິນໃຈຕັ້ງເປົ້າໝາຍໃຫ້ຍອດຂາຍຈາກຊ່ອງທາງອອນລາຍ ຫລື ດິຈີຕ໋ອນເປັນ 50% ຂອງທຸລະກິດໂດຍລວມ, ເຊິ່ງເພີ່ມຂຶ້ນຈາກ 30% ໃນໄຕມາດຜ່ານມາ.
ແນວໃດກໍຕາມ, ແຜນການປົດພະນັກງານເກີດຂຶ້ນຫລັງຈາກ Nike ພົບວ່າຜົນປະກອບການຂາດທຶນຫລາຍເຖິງ 790 ລ້ານໂດລາສະຫະລັດ ເຊິ່ງຖືເປັນການຂາດທຶນລາຍໄຕມາດເປັນຄັ້ງທຳອິດໃນຮອບ 2 ປີ, ຂະນະດຽວກັນທາງ Nike ຍັງບໍ່ສາມາດໃຫ້ຄຳຕອບໄດ້ຢ່າງຊັດເຈນວ່າຈະດຳເນີນການປົດພະນັກງານພາກສ່ວນໃດອອກແດ່ ແລະ ຄາດວ່າການປົດພະນັກງານຈະເກີດຂຶ້ນໃນຊ່ວງທ້າຍເດືອນກໍລະກົດນີ້.
