ກຳປູເຈຍຈູດທຳລາຍຢາເສບຕິດ ໃນວັນສາກົນຕ້ານຢາເສບຕິດ
ກຳປູເຈຍຈູດທຳລາຍຢາເສບຕິດ 477,7 ກິໂລ ເນື່ອງໃນວັນສາກົນຕ້ານຢາເສບຕິດ ໃນວັນທີ 26 ມິຖຸນານີ້.
ຮອງນາຍົກລັດຖະມົນຕີ ແກ ກິມຍານ ເຊິ່ງເປັນປະທານໜ່ວຍງານຕໍ່ຕ້ານຢາເສບຕິດແຫ່ງຊາດ ໄດ້ຈູດທຳລາຍຢາເສບຕິດໃນພິທີທີ່ຈັດຂຶ້ນຢູ່ເກາະເພັດ ນະຄອນຫລວງພະນົມເປັນ. ຢາເສບຕິດທີ່ຖືກນຳມາທຳລາຍຄັ້ງນີ້ມີທັງຢາບ້າ, ຢາມ້າ, ຢາອີ, ເຮໂຣອິນ, ຄີຕາມິນ ແລະ ຢາເສບຕິດອື່ນໆ ໂດຍຢາເສບຕິດທີ່ຖືກທຳລາຍເປັນຢາເສບຕິດທີ່ຢຶດມາໄດ້ໃນປີຜ່ານມາ ລະຫວ່າງການປາບປາມຢູ່ນະຄອນຫລວງພະນົມເປັນ, ແຂວງກັນດາລ, ກຳປົງສະປື ແລະ ແຂວງຕາແກ້ວ.
ຮອງນາຍົກລັດຖະມົນຕີກຳປູເຈຍ ກ່າວວ່າ: ນັບແຕ່ເດືອນມັງກອນຫາເດືອນພຶດສະພາຜ່ານມາ ທາງການກຳປູເຈຍສາມາດຈັບກຸມຜູ້ຕ້ອງສົງໄສທີ່ກ່ຽວຂ້ອງກັບຢາເສບຕິດໄດ້ 8.927 ຄົນໃນ 4.510 ຄະດີ ເຊິ່ງການຈູດທຳລາຍຢາເສບຕິດຄັ້ງນີ້ ຖືເປັນການສົ່ງຂໍ້ຄວາມໄປຫາອາຊະຍາກອນວ່າ: ລັດຖະບານກຳປູເຈຍມີຄວາມມຸ່ງໝັ້ນຈະປາບປາມຢາເສບຕິດທຸກປະເພດ ແລະ ຈະບໍ່ພຽງແຕ່ຢຶດຢາເສບຕິດເພື່ອທຳລາຍເທົ່ານັ້ນ ແຕ່ຍັງຈະຢຶດຊັບສິນຂອງອາຊະຍາກອນເຫລົ່ານັ້ນນຳອີກ.
