ອົດສະຕຣາລີເສຍຊີວິດເພາະໂຄວິດ-19 ຄົນທຳອິດໃນຮອບ 1 ເດືອນ ຄາດອາດປິດຊາຍແດນປະເທດຮອດຕົ້ນປີໜ້າ
ວັນທີ 24 ມິຖຸນາ ທາງການອົດສະຕຣາລີຢືນຢັນພົບຜູ້ເສຍຊີວິດເພາະໂຄວິດ-19 ຄົນທຳອິດໃນຮອບ 1 ເດືອນ ພົບຜູ້ຕິດເຊື້ອເພີ່ມອີກ 29 ຄົນ ສົ່ງຜົນໃຫ້ຈຳນວນຜູ້ຕິດເຊື້ອສະສົມມີທັງໝົດ 7.521 ຄົນ, ປິ່ນປົວຫາຍດີແລ້ວຫລາຍກວ່າ 90% ຂອງຜູ້ຕິດເຊື້ອທັງໝົດທົ່ວປະເທດ. ຂະນະທີ່ ຈຳນວນຜູ້ເສຍຊີວິດມີ 103 ຄົນ ນັບແຕ່ພົບຜູ້ເສຍຊີວິດຄົນທຳອິດໃນວັນທີ 1 ມີນາຜ່ານມາ.
ທາງການລະບຸວ່າ: ລັດວິກຕໍເຣຍເປັນສູນກາງການແຜ່ລະບາດທີ່ສຳຄັນພາຍໃນປະເທດ ຜູ້ຕິດເຊື້ອຢູ່ລັດວິກຕໍເຣຍເກືອບ 1.900 ຄົນ ລວມທັງຜູ້ຕິດເຊື້ອໃໝ່ທີ່ເພີ່ມຂຶ້ນຢ່າງຕໍ່ເນື່ອງ ເຮັດໃຫ້ຫລາຍຝ່າຍກັງວົນເຖິງການແຜ່ລະບາດຂອງໂຄວິດ-19 ຮອບທີ 2 ອາດຈະເກີດຂຶ້ນ ຈົນທາງການປະກາດຂະຫຍາຍໄລຍະເວລາສະຖານະການສຸກເສີນອອກໄປອີກຢ່າງໜ້ອຍ 1 ເດືອນ ແລະ ປະກາດໃຊ້ມາດຕະການເຂັ້ມງວດທາງສັງຄົມເພື່ອຮັບມືໂຄວິດ-19 ອີກ. ພ້ອມຈຳກັດການຊື້ສິນຄ້າອຸປະໂພກ-ບໍລິໂພກໃນໄລຍະນີ້ ເພື່ອຫລຸດການກັກຕຸນສິນຄ້າຈຳນວນຫລາຍ.
ທ່ານ ໄຊມອນ ເບີມິງແຮມ ລັດຖະມົນຕີການຄ້າ, ການທ່ອງທ່ຽວ ແລະ ການລົງທຶນຂອງອົດສະຕຣາລີ ເປີດເຜີຍວ່າ: ທາງການອາດປິດຊາຍແດນປະເທດໄປຈົນຮອດຕົ້ນປີໜ້າ ເພາະເປັນໜຶ່ງໃນມາດຕະການສຳຄັນທີ່ຊ່ວຍໃຫ້ອົດສະຕຣາລີແກ້ໄຂສະຖານະການການແຜ່ລະບາດຂອງໂຄວິດ-19 ພາຍໃນປະເທດໄດ້. ຂະນະທີ່ລະບຽງການທ່ອງທ່ຽວກັບປະເທດໃກ້ຄຽງ ຄືນິວຊີແລນຍັງຢູ່ໃນຂັ້ນຕອນການເຈລະຈາ ຫລັງອົດສະຕຣາລີຍັງພົບຜູ້ຕິດເຊື້ອໃໝ່ຢ່າງຕໍ່ເນື່ອງ.
