ໂຢໂຄວິດ ນັກເທັນນິສມື 1 ຂອງໂລກຕິດເຊື້ອໂຄວິດ-19ຈາກລາຍການທີ່ຕົນເອງເປັນເຈົ້າພາບ

ອີງຕາມການລາຍງານຂອງສຳນັກຂ່າວຕ່າງປະເທດໃຫ້ຮູ້ວ່າ: ໂນວັກ ໂຢໂຄວິດນັກເທັນນິສມື 1 ຂອງໂລກຊາວເຊີເບຍ ເປັນນັກເທັນນິສຄົນຫຼ້າສຸດທີ່ຕິດເຊື້ອໂຄວິດ-19 ຫຼັງຈາກເຂົ້າຮ່ວມການແຂ່ງຂັນລາຍການ ອາເດີຍນທົ່ວ ທີ່ຕົນເອງນັ້ນເປັນເຈົ້າພາບຈັດການແຂ່ງຂັນລາຍການດັ່ງກ່າວໃນຕົ້ນເດືອນມິຖຸນາທີ່ຜ່ານມາ ທີ່ປະເທດເຊີເບຍແລະໂຄເອເຊຍ, ໂດຍລາຍການດັ່ງກ່າວບໍ່ໄດ້ປະຕິບັດຕາມກະຊວງສາທາລະນະສຸກໄດ້ວາງອອກ,ບໍ່ໄດ້ເວັ້ນໄລຍະຫ່າງ ແລະ ເປີດໃຫ້ເຂົ້າຊົມເປັນປົກກະຕິ.

ກ່ອນໜ້ານີ້ມີນັກເທັນນິສຫຼາຍຄົນຕິດເຊື້ອໂຄວິດ-19 ຈາກລາຍການດັ່ງກ່າວເຊັ່ນ: ກິກໍ ດິມິຕ໋ອບ,ບໍນາ ໂຄຣິສ,ວິກເຕີ ທອຍສະກີ້ ແລະ ຫຼ້າສຸດແມ່ນໂນວັກ ໂຢໂຄວິດ, ພາຍຫຼັງ ໂຢໂຄວິດ ໄດ້ຮູ້ວ່າຕົນຕິດເຊື້ອໂຄວິດ-19 ກໍໄດ້ອອກມາຖະແຫຼງການວ່າ: ຫຼັງຈາກຈົບລາຍການດັ່ງກ່າວຕົນເອງກັບຄອບຄົວໄດ້ເຂົ້າໄປກວດຫາເຊື້ອໄວຣັສທັນທີ່ເຊິ່ງຜົນປາກົດວ່າຕົນເອງແລະພັນລະຍາແມ່ນມີຜົນກວດເປັນບວກ ແຕ່ລູກໆນັ້ນແມ່ນບໍ່ພົບເຊື້ອ, ຂ້ອຍເອງຮູ້ສຶກເສຍໃຈຢ່າງສຸດຊື້ງຕໍ່ຜູ້ທີ່ຕິດເຊື້ອໂຄວິດ-19 ແລະ ໃຫ້ທຸກຄົນນັ້ນປອດໄພສະບາຍດີ ຫຼັງຈາກນີ້ຕົນເອງຈະໄດ້ກັກຕົວ 14 ວັນ,ພ້ອມກວດຫາເຊື້ອທຸກໆ 5 ວັນ