ເຢຍລະມັນກັບມາລັອກດາວບາງເມືອງ ຫລັງໂຄວິດ-19 ລະບາດໜັກອີກຮອບ
ລັດຖະບານລັດນອດໄຣ-ເວສຟາເລິນໃນເຢຍລະມັນ ປະກາດກັບມາລັອກດາວພື້ນທີ່ 2 ເມືອງ ຫລັງພົບຜູ້ຕິດເຊື້ອໂຄວິດ-19 ໃໝ່ເພີ່ມຂຶ້ນຈົນໜ້າກັງວົນ ເຊິ່ງຖືເປັນຄັ້ງທຳອິດທີ່ມີການລັອກດາວຢູ່ເຢຍລະມັນອີກ ຫລັງລັດຖະບານເລີ່ມຫລຸດຜ່ອນມາດຕະການເຂັ້ມງວດທົ່ວປະເທດນັບແຕ່ເດືອນພຶດສະພາ.
ໂດຍໜຶ່ງໃນພື້ນທີ່ທີ່ຖືກລັອກດາວຄືເມືອງກືເທີສໂລ ເຊິ່ງເປັນທີ່ຕັ້ງໂຮງງານບັນຈຸຊີ້ນສັດຂອງບໍລິສັດ Tonnies Group ເຊິ່ງພະນັກງານ 1.500 ກວ່າຄົນ ໃນນັ້ນມີຜົນກວດເຊື້ອເປັນບວກ.
ທ່ານ ອາຣມິນ ລາສເຊດ ເຈົ້າຄອງລັດນອດໄຣ-ເວສຟາເລິນ ລະບຸວ່າ: ເມືອງກືເທີສໂລຈະວາງມາດຕະການປ້ອງກັນການລະບາດທີ່ເຂັ້ມງວດຢ່າງໜ້ອຍໄປຈົນຮອດວັນທີ 30 ມິຖຸນາ, ສ່ວນເມືອງວາເຣນເດິທີ່ຢູ່ຕິດກັນຈະກັບມາລັອກດາວເຊັ່ນກັນ.
ທ່ານ ຄາລ-ໂຢເຊບ ລໍມັນ ລັດຖະມົນຕີສາທາລະນະສຸກລັດນອດໄຣ-ເວສຟາເລິນ ກ່າວວ່າ: ມາດຕະການລັອກດາວເພີ່ມຕື່ມເປັນສິ່ງຈຳເປັນ ເພື່ອປົກປ້ອງຊີວິດຂອງປະຊາຊົນ.
ຜົນຈາກມາດຕະການດັ່ງກ່າວເຮັດໃຫ້ຕ້ອງປິດຮ້ານບັນເທີງ, ພິພິຕະພັນ, ໂຮງຮູບເງົາ ແລະ ບ່ອນອອກກຳລັງກາຍທັງໝົດ, ສ່ວນຮ້ານອາຫານສາມາດຂາຍອາຫານແບບໃຫ້ຊື້ເມືອເຮືອນເທົ່ານັ້ນ. ນອກຈາກນີ້ ຍັງກັບມາເຂັ້ມງວດເລື່ອງການເວັ້ນໄລຍະຫ່າງທາງສັງຄົມ (Social Distancing), ສ່ວນໂຮງຮຽນ ແລະ ສະຖານລ້ຽງເດັກຢູ່ເມືອງກືເທີສໂລໄດ້ປິດໄປກ່ອນໜ້ານີ້ແລ້ວ. ຂະນະທີ່ໂຮງຮຽນຢູ່ວາເຣນດອບຈະປິດຕາມມາໃນວັນທີ 25 ມິຖຸນານີ້.
ການລະບາດຄັ້ງໃຫຍ່ຢູ່ເມືອງດັ່ງກ່າວສ້າງຄວາມກັງວົນຈະເກີດການລະບາດຮອບ 2 ຢູ່ເຢຍລະມັນ ໂດຍສະຖານະການຫລ້າສຸດ ເຈົ້າໜ້າທີ່ຢືນຢັນວ່າພົບຜູ້ຕິດເຊື້ອຢູ່ໂຮງງານບັນຈຸຊີ້ນສັດຂອງ Tonnies ແລ້ວຈຳນວນ 1.533 ຄົນ.
ໂຮງງານດັ່ງກ່າວຍັງຖືກຕັ້ງຄຳຖາມກ່ຽວກັບສະພາບການເປັນຢູ່ຂອງແຮງງານຕ່າງປະເທດ, ເຖິງວ່າເຢຍລະມັນຈະເປັນໜຶ່ງໃນປະເທດທີ່ໄດ້ຮັບການຍົກຍ້ອງເລື່ອງປະສິດທິພາບຂອງການສະກັດກັ້ນການລະບາດຂອງໂຄວິດ-19, ແຕ່ໃນໄລຍະເດືອນຜ່ານມາ ພົບກໍລະນີການລະບາດຂອງໄວຣັສຈາກໂຮງງານຂ້າສັດຫລາຍແຫ່ງ ເຊິ່ງສ້າງຄວາມກັງວົນກ່ຽວກັບຄວາມປອດໄພໃນອາຫານ, ຫລັງຈາກກ່ອນໜ້ານີ້ ມີການກວດພົບເຊື້ອຢູ່ຄຽງຊອຍປາ ໃນຕະຫລາດຊິນຟາຕີ້ ນະຄອນຫລວງປັກກິ່ງ ເຊິ່ງຕະຫລາດແຫ່ງນັ້ນໄດ້ກາຍເປັນກຸ່ມກ້ອນການລະບາດແຫ່ງໃໝ່ຢູ່ຈີນ.
