ຖອດບົດຮຽນ ‘ໂຮງຂ້າສັດ’ ຕ່າງປະເທດ ເປັນຫຍັງເປັນແຫລ່ງແຜ່ໂຄວິດຊັ້ນດີ ?
ຂະນະທີ່ພາບລວມຂອງເອີຣົບເລີ່ມມີຈຳນວນຜູ້ຕິດເຊື້ອໂຄວິດ-19 ໃໝ່ຫລຸດລົງແລ້ວ ແຕ່ພັດຍົງພົບການລະບາດເພີ່ມຂຶ້ນແບບ “ກຸ່ມກ້ອນ” ກຸ່ມນ້ອຍໆຢູ່ສະຖານທີ່ດຽວກັນຄື “ໂຮງຂ້າສັດ” ໃນປະເທດໃຫຍ່ເຊັ່ນ: ເຢຍລະມັນ ແລະ ສະຫະຣາຊະອານາຈັກ ຈຶ່ງໜ້າສົນໃຈວ່າ: ເປັນຫຍັງ ສະຖານທີ່ແບບນີ້ຈຶ່ງແຜ່ເຊື້ອວ່ອງໄວ ?
ຢູ່ສະຫະຣາຊະອານາຈັກ ຫລາຍຝ່າຍອາດເລີ່ມເຫັນສັນຍານຂອງຈຸດເລີ່ມຕົ້ນການແຜ່ລະບາດໂຄວິດ-19 ແບບກຸ່ມກ້ອນ 3-4 ກຸ່ມຢູ່ໂຮງຂ້າສັດໃນອັງກິດ ແລະ ເວລ ໃນອາທິດຜ່ານມາ ລວມທັງຢູ່ອາເມລິກາໃນທ້າຍອາທິດຜ່ານມາ.
ກະຊວງສາທາລະນະສຸກອັງກິດ ຖະແຫລງໃນວັນທີ 18 ມິຖຸນາວ່າ: ພົບການລະບາດຂອງໂຄວິດຢູ່ໂຮງງານແປຮູບຊີ້ນ “ໂຄເບີ” ໃນເມືອງເຄລັກຮີຕັນ ເຂດໃກ້ຄຽງເວລຍອກເຊຍ.
ໂຮງງານແປຮູບຊີ້ນແຫ່ງນີ້ ເຊິ່ງເປັນຂອງບໍລິສັດ “Asda” ຜູ້ຄ້າສົ່ງລາຍໃຫຍ່ ສັ່ງປິດກິດຈະການທັນທີ ຫລັງພົບວ່າພະນັກງານປະມານ 150 ຄົນມີຜົນກວດໂຄວິດ “ເປັນບວກ” ເຊິ່ງໝາຍເຖິງຕິດເຊື້ອ. ຂະນະທີ່ໂຮງງານແປຮູບຊີ້ນໄກ່ຂອງບໍລິສັດ “2 Sisters” ຜູ້ຜະລິດອາຫານຢູ່ເກາະແອງເກິລຊີ ທາງເໜືອຂອງເວລ ໄດ້ຂໍໃຫ້ພະນັກງານກັກຕົນເອງເປັນເວລາ 2 ອາທິດ ຫລັງພົບຜູ້ຕິດເຊື້ອໂຄວິດ 58 ຄົນໃນພະນັກງານທັງໝົດ 560 ຄົນ.
ນອກຈາກນັ້ນ ຢູ່ເມືອງເຣັກແຮມ ທາງເໜືອສຸດຂອງເວລ ພະນັກງານ 38 ຄົນຈາກທັງໝົດ 1.500 ຄົນຢູ່ໂຮງງານຂອງບໍລິສັດ Rowan Foods ມີຜົນກວດໂຄວິດເປັນບວກເຊັ່ນກັນ, ແຕ່ທາງການເຊື່ອວ່າ: ການລະບາດຢູ່ໂຮງງານແຫ່ງນີ້ອາດເປັນການຕິດເຊື້ອໃນພື້ນທີ່ໃກ້ຄຽງຫລາຍກວ່າຮັບເຊື້ອພາຍໃນໂຮງງານ.
ເຖິງຢ່າງໃດກໍຕາມ, ການລະບາດລັກສະນະນີ້ຢູ່ໂຮງຂ້າສັດໃນສະຫະຣາຊະອານາຈັກບໍ່ແມ່ນເລື່ອງແປກ ເພາະໃນອາທິດດຽວກັນ ມີໂຮງງານຂ້າສັດແຫ່ງໜຶ່ງຢູ່ເຢຍລະມັນພົບພະນັກງານຕິດເຊື້ອໄວຣັສມໍລະນະເຖິງ 650 ຄົນ ແລະ ມີການລະບາດແບບກຸ່ມກ້ອນລັກສະນະດຽວກັນອີກ 2 ກໍລະນີຢູ່ຝຣັ່ງ ແລະ ກໍລະນີຫລ້າສຸດຢູ່ອາເມລິກາ ສົ່ງຜົນໃຫ້ຈີນໂຈະການນຳເຂົ້າຊີ້ນໄກ່ຈາກອາເມລິກາແລ້ວ.
ໃນວັນທີ 21 ມິຖຸນາ, ສຳນັກງານບໍລິຫານກາງດ້ານພາສີ-ອາກອນຈີນ ປະກາດໂຈະການນຳເຂົ້າຊີ້ນໄກ່ແຊ່ແຂງຈາກບໍລິສັດ Tyson Foods ໜຶ່ງໃນຜູ້ຜະລິດອາຫານລາຍໃຫຍ່ທີ່ສຸດຂອງໂລກ ເຊິ່ງມີສຳນັກງານໃຫຍ່ຢູ່ເມືອງສະປຣິງເດລ ລັດອາຄັນຊໍ ທາງຕອນໃຕ້ຂອງອາເມລິກາ “ເປັນການຊົ່ວຄາວ”.
ຄຳສັ່ງໂຈະການນຳເຂົ້າດັ່ງກ່າວມີຂຶ້ນຫລັງທາງການຈີນໄດ້ຮັບລາຍງານວ່າ: ພະນັກງານຈຳນວນຫລາຍຂອງ Tyson Foods ຢູ່ໂຮງງານໃນເມືອງສະປຣິງເດລຕິດເຊື້ອໄວຣັສໂຄໂຣນາສາຍພັນໃໝ່ ຕົ້ນຕໍພະຍາດໂຄວິດ-19, ສ່ວນສິນຄ້າຂອງ Tyson Foods ທີ່ຖືກສົ່ງມາຮອດຈີນກ່ອນໜ້ານີ້ ໄດ້ເຂົ້າສູ່ຂະບວນການຢຶດໄວ້ທັງໝົດແລ້ວ.
ນອກເໜືອຈາກກໍລະນີກຸ່ມກ້ອນຢູ່ໂຮງຂ້າສັດແລ້ວ ເຫດການລັກສະນະນີ້ຍັງປາກົດໃຫ້ເຫັນຢູ່ຕະຫລາດ “ຊິນຟາຕີ້” ສູນຂາຍສົ່ງອາຫານແຫ່ງໃຫຍ່ທີ່ສຸດໃນນະຄອນຫລວງປັກກິ່ງຂອງຈີນ, ຮ້ານບັນເທີງຢູ່ ສ.ເກົາຫລີ ແລະ ຫໍພັກແຮງງານຕ່າງປະເທດຢູ່ສິງກະໂປ.
ການແຜ່ລະບາດຂອງໄວຣັສພາຍໃນໂຮງງານແປຮູບຊີ້ນຖືເປັນເຫດການທີ່ພົບເຫັນໄດ້ທົ່ວໄປໃນໄລຍະພະຍາດໂຄວິດ-19. ຜົນວິໄຈຂອງວິທະຍາໄລສຸຂະພາບ ແລະ ວິທະຍາສາດເຂດຮ້ອນ ຈາກມະຫາວິທະຍາໄລລອນດອນ (LSHTM) ຊີ້ວ່າ: ໂຮງງານແປຮູບຊີ້ນເປັນແຫລ່ງແຜ່ລະບາດໃນທ້ອງຖິ່ນຂະໜາດໃຫຍ່ທີ່ສຸດ ຮອງຈາກເຮືອ ແລະ ຫໍພັກແຮງງານ.
ການວິໄຈດັ່ງກ່າວຍົກຕົວຢ່າງໂຮງງານແປຮູບຊີ້ນປາແຫ່ງໜຶ່ງຢູ່ການາ ທີ່ພົບຜູ້ຕິດເຊື້ອໂຄວິດເຖິງ 534 ຄົນ ແລະ ໂຮງງານແປຮູບຊີ້ນແຫ່ງໜຶ່ງຢູ່ເມືອງຊູຟໍ ລັດເຊົາດາໂກຕາ ຂອງອາເມລິກາ ທີ່ພົບຜູ້ຕິດເຊື້ອ 518 ຄົນ.
ລາຍງານຂອງສູນຄວບຄຸມ ແລະ ປ້ອງກັນພະຍາດແຫ່ງອາເມລິກາ (CDC) ໃນເດືອນຜ່ານມາ ຄາດຄະເນວ່າ: ພະນັກງານປະມານ 5.000 ຄົນທີ່ເຮັດວຽກຢູ່ໂຮງງານແປຮູບຊີ້ນທົ່ວອາເມລິກາ ມີຜົນກວດໂຄວິດເປັນບວກ ແລະ ບົດວິເຄາະສະບັບໜຶ່ງຕີລາຄາວ່າ: ປະມານເຄິ່ງໜຶ່ງຂອງຈຳນວນຜູ້ຕິດເຊື້ອໂຄວິດຢູ່ອາເມລິກາ ອາດສາມາດສືບສວນຫາຕົ້ນຕໍການລະບາດຢ້ອນໄປຮອດໂຮງງານເຫລົ່ານີ້.
ຈາກການສອບສວນພະຍາດຂອງ CDC ພົບວ່າ: ມີຫລາຍປັດໄຈທີ່ເຮັດໃຫ້ໂຮງຂ້າສັດ ຫລື ໂຮງງານແປຮູບຊີ້ນ ເປັນແຫລ່ງແຜ່ເຊື້ອຊັ້ນດີສຳລັບໄວຣັສໂຄໂຣນາສາຍພັນໃໝ່.
ປັດໄຈທຳອິດຄື ຈາກລັກສະນະການເຮັດວຽກຢູ່ໂຮງງານ ເຮັດໃຫ້ເປັນເລື່ອງຍາກສຳລັບພະນັກງານໃນການເວັ້ນໄລຍະຫ່າງທາງສັງຄົມ (Social Distancing) ໂດຍສະເພາະຖ້າພວກເຂົາເຮັດວຽກໃນສາຍການຜະລິດ ແລະ ການຮັກສາໄລຍະຫ່າງທາງສັງຄົມເຮັດໄດ້ຍາກໃນຫ້ອງພັກທ່ຽງຂອງພະນັກງານ, ບາງໂຮງງານຈຶ່ງຕັ້ງພື້ນທີ່ພັກທ່ຽງນອກອາຄານໂຮງງານແທນ.
ອີກປັດໄຈໜຶ່ງຄື ຈາກຄວາມຈຳເປັນໃນການຕ້ອງເຮັດວຽກຢ່າງວ່ອງໄວ ແລະ ຄວາມສະດວກດ້ານຮ່າງກາຍ ຈຶ່ງເປັນເລື່ອງຍາກສຳລັບພະນັກງານທີ່ຈະໃສ່ຜ້າອັດປາກ-ດັງຕະຫລອດເວລາເຮັດວຽກ, ຜູ້ຊ່ຽວຊານຂອງ CDC ພົບວ່າ: ພະນັກງານມັກອັດພຽງປາກ ແຕ່ບໍ່ອັດດັງຕົນເອງ ແລະ ມັກຈັບຜ້າອັດປາກ-ດັງເລື້ອຍໆ.
ສາສະດາຈານ ເຈມ ວູດ ນັກວິໄຈດ້ານການຕິດເຊື້ອ ແລະ ການຄວບຄຸມພະຍາດ ຈາກມະຫາວິທະຍາໄລເຄມບຣິດ ຢູ່ອັງກິດ ບອກວ່າ: ຄວາມໄວຂອງລະບົບສາຍການຜະລິດຢູ່ໂຮງງານແປຮູບຊີ້ນ ເຮັດໃຫ້ເປັນສະຖານທີ່ທີ່ເອື້ອອຳນວຍຕໍ່ການລະບາດຂອງໄວຣັສຫລາຍກວ່າ.
ນອກຈາກນີ້ ການວິໄຈຂອງວິທະຍາໄລສຸຂະພາບ ແລະ ວິທະຍາສາດເຂດຮ້ອນ ຈາກມະຫາວິທະຍາໄລລອນດອນ ສັນນິຖານວ່າ: ສະພາບແວດລ້ອມທີ່ມີສຽງດັງຢູ່ໂຮງຂ້າສັດ ອາດເຮັດໃຫ້ພະນັກງານຕ້ອງຢືນໃກ້ກັນໃນເວລາເວົ້າ ຫລື ຮ້ອງໃສ່ກັນ ເຊິ່ງສາມາດເພີ່ມການແຜ່ກະຈາຍສານຄັດຫລັ່ງໄດ້.
ຂະນະທີ່ທ່ານ ຄາລຳ ເຊມເປິລ ສາສະດາຈານດ້ານສຸຂະພາບເດັກ ແລະ ວິທະຍາການລະບາດຈາກມະຫາວິທະຍາໄລລິເວີພູລ ບອກວ່າ: ປັດໄຈໃຫຍ່ທີ່ສຸດທີ່ເອື້ອອຳນວຍຕໍ່ການແຜ່ກະຈາຍເຊື້ອໂຄວິດຢູ່ສະຖານທີ່ແບບນີ້ຄື ສະພາບແວດລ້ອມພາຍໃນໂຮງງານ, ໂຮງງານລັກສະນະນີ້ມັກມີອາກາດໜາວຈາກແອຂະໜາດໃຫຍ່ ແລະ ປິດຈົນແສງແດດເຂົ້າບໍ່ຮອດ.
ທ່ານ ເຊມເປິລ ລະບຸວ່າ: ມາຮອດປັດຈຸບັນຍັງບໍ່ພົບການລະບາດຢູ່ໂຮງງານສຳລັບຜັກ-ໝາກໄມ້ ຫລື ສິນຄ້າອື່ນໆ. ດັ່ງນັ້ນ ອຸນຫະພູມອາດຈະເປັນປັດໄຈສຳຄັນ.
