ໃບບິນຄ່າກະແສໄຟຟ້າເດືອນ ພຶດສະພາ 2020 ພຸ່ງຂຶ້ນເຖິງ 90 ລ້ານດົງຫົວໜ້າພະແນກການຕະຫຼາດຕົກຕຳແໜ່ງ
ວັນທີ 22 ມີຖຸນານີ້, ບໍລິສັດໄຟຟ້າ ແຂວງກວາງນິງ (ຫວຽດນາມ) ໄດ້ຮຽກຮ້ອງໃຫ້ໜ່ວຍບໍລິການໄຟຟ້າ ເວິນໂດນ ປົດຫົວໜ້າພະແນກການຕະຫຼາດອອກຈາກຕຳແໜ່ງ ອັນເນື່ອງມາຈາກມີສ່ວນພົວພັນເຖິງໃບບິນຄ່າກະແສໄຟຟ້າຂອງຄອບຄົວໜຶ່ງໃນເດືອນພຶດສະພາຜ່ານມາພຸ່ງຂຶ້ນສູງຜິດປົກກະຕິເຖິງ 90 ລ້ານດົງ.
ວັນທີ 21 ມີຖຸນາ ແມ່ເຖົ້າ ດ່າວຖິກ້າຍ ຢູ່ຕາແສງ ຮ່າລ໊ອງ ເມືອງເວິນໂດນ ແຂວງກວາງນິງ ໄດ້ຮ້ອງຟ້ອງຂຶ້ນຫາສູນບໍລິການເບິ່ງແຍງລູກຄ້າຂອງບໍລິສັດ ໄຟຟ້າພາກເໜືອ ກ່ຽວກັບກະແສໄຟຟ້າໃນເດືອນມີຖຸນາໃນຄົວເຮືອນຂອງຕົນເພີ່ມຂຶ້້ນຜິດປົກກະຕິຈົນເຖິງ 90 ລ້ານດົງ.
ພາຍຫຼັງໄດ້ຮັບຄຳຮ້ອງຂໍຄວາມເປັນທຳຂອງແມ່ເຖົ້າ, ໜ່ວຍບໍລິການໄຟຟ້າ ເວິນໂດນ ກໍໄດ້ແຕ່ງຕັ້ງພະນັກງານລົງໄປສົມທົບກັບຄອບຄົວດັ່ງກ່າວ ເພື່ອກວດກາເບິ່ງກົງເຕີນັບໄຟ. ຜົນການກວດກາໃຫ້ເຫັນວ່າ ຕົງເຕີຍັງເຄື່ອນໄຫວປົກກະຕິດີ ບໍ່ມີຂໍ້ຜິດພາດ. ໃນຂະນະທີ່ກວດການັ້ນຕົວເລກໃນກົງເຕີຊີ້ບອກຢູ່ທີ່ຕົວເລກ 1.893 kwh ແລະ ຕົວເລກສູດທ້າຍຂອງເດືອນພຶດສະພາແມ່ນ 1.649 kwh.ປະລິມານໄຟທີ່ໃຊ້ຄິດໄລ່ເຖິງວັນທີ 22 ມີຖຸນາຢູ່ທີ່ 244 kwh( ລວມ 38 ວັນ).
ການກຳນົດຢູ່ໃນໃບບິນຂອງເດືອນມີຖຸນາແມ່ນ 31 ວັນ ນັບແຕ່ວັນທີ 15/5 – 15/6. ສະນັ້ນການຊົມໃຊ້ໄຟຕົວຈິງໃນເດືອນມີຖຸນາຂອງຄອບຄົວດັ່ງກ່າວຢູ່ທີ່ 200 ຫົວໜ່ວຍ, ຄິດໄລ່ເປັນເງິນຕົກຢູ່ທີ່ 370.000 ດົ່ງເທົ່ານັ້ນ.
ພາຍຫຼັງມີການກວດກາລະອຽດແລ້ວ, ບໍລິສັດໄຟຟ້າ ກວາງນິງ ຢືນຢັນວ່າ: ມັນແມ່ນຄວາມຜິດພາດຂອງ ໜ່ວຍບໍລິການໄຟຟ້າ ເວີນໂດນ ໃນການຈົດນັບກະແສໄຟຟ້າໃນກົງເຕີ. ໃນທີ່ສຸດໜ່ວຍບໍລິການໄຟຟ້າ ເວີນໂດນ ໄດ້ ລົບລ້າງໃນບິນດັ່ງກ່າວ ແລະ ອອກໃບບິນໃໝ່ໃຫ້ແມ່ເຖົ້າ.
ຕໍ່ສະຖານະການດັ່ງກ່າວ ບໍລິສັດໄຟຟ້າ ເວີນໂດນ ໄດ້ສົ່ງຈົດໝາຍຂໍໂທດຄອບຄົວດັ່ງກ່າວ ແລະ ໄດ້ປົດຫົວໜ້າພະແນກການຕະຫຼາດອອກຈາກໜ້າທີ່ວຽກງານ.
ຈາກຕົວຢ່າງຂ້າງເທິງນີ້, ຜູ້ຂຽນເຫັນວ່າ ບໍລີສັດໄຟຟ້າລາວຄວນເອົາເປັນບົດຮຽນ, ຕ້ອງເຂັ້ມງວດຕໍ່ພະນັກງານຈົດນັບກະແສໄຟຟ້າໃນກົງເຕີຂອງແຕ່ລະຄົວເຮືອນ. ຖ້າເຫັນພະນັກງານຄົນໃດມີພຶດຕິກຳສໍ້ໂກງກໍຄວນລົງໂທດຢ່າງສະສົມ ຄືບ້ານເພີ່ນເມືອງທ່ານເຮັດກັນ. ບໍ່ຄວນປ່ອຍປະໃຫ້ພວກຫາກິນແບບນີ້ເຫຼືອຢູ່ໃນແຜ່ນດິນລາວ.
ຂ່າວ: ລູກເມືອງພວນ
