2 ບໍລິສັດຫລັກຊັບຄໍ້າປະກັນອອກຈໍາໜ່າຍຮຸ້ນ ໃຫ້ບໍລິສັດ ເອເນໂກ້ໄດນາມິກ ມະຫາຊົນ

ບໍລິສັດ ຫລັກຊັບລ້ານຊ້າງ ມະຫາຊົນ ແລະ ບໍລິສັດຫລັກຊັບ ທຄຕລ-ກທ ຈໍາກັດ ໄດ້ຮັບສິດເປັນຜູ້ຄໍ້າປະກັນການອອກຈໍາໜ່າຍຮຸ້ນໃຫ້ແກ່ບໍລິສັດ ເອເນໂກ້ ໄດນາມິກ ມະຫາຊົນ, ພາຍຫລັງທີ່ໄດ້ສໍາເລັດການນໍາສະເໜີຂໍ້ມູນ (Road Show) ເມື່ອທ້າຍປີ 2019 ຜ່ານມາ.

ຄະນະກໍາມະການຄຸ້ມຄອງຫລັກຊັບ (ສຄຄຊ) ໃຫ້ຮູ້ວ່າ: ບໍລິສັດ ເອເນໂກ້ ໄດນາມິກ ມະຫາຊົນ ດໍາເນີນທຸລະກິດນໍາເຂົ້າ ແລະ ຈໍາໜ່າຍນໍ້າມັນເຊື້ອໄຟ ໄດ້ຍື່ນເອກະສານເພື່ອຂໍອະນຸຍາດອອກຈໍາໜ່າຍຮຸ້ນຕໍ່ ສຄຄຊ ແລະ ຕະຫລາດຫລັກຊັບລາວເມື່ອເດືອນກໍລະກົດ 2019 ເພື່ອກຽມຄວາມພ້ອມສະເໜີຂາຍຮຸ້ນໃຫ້ແກ່ມວນຊົນຄັ້ງທໍາອິດ (IPO) ແລະ ມາຮອດທ້າຍປີ 2019 ໄດ້ສໍາເລັດການນໍາສະເໜີຂໍ້ມູນໃຫ້ແກ່ຜູ້ຖືຫຸ້ນ ແລະ ໄດ້ເຊັນສັນຍາກັບບໍລິສັດຫລັກຊັບ ລ້ານຊ້າງ ມະຫາຊົນ ແລະ ບໍລິສັດຫລັກຊັບ ທຄຕລ-ກທ ຈໍາກັດ ໃຫ້ເປັນຜູ້ຄໍ້າປະກັນການອອກຈໍາໜ່າຍຮຸ້ນໃຫ້ແກ່ມວນຊົນ.

ທ່ານ ສົມຫວັງ ຄຸຣຸລັດ ຜູ້ອໍານວຍການໃຫຍ່ບໍລິສັດ ເອເນໂກ້ ໄດນາມິກ ມະຫາຊົນ ກ່າວວ່າ: ບໍລິສັດຂອງຕົນສ້າງຕັ້ງຂຶ້ນໃນປີ 2015 ມີສໍານັກງານໃຫຍ່ຢູ່ເມືອງປາກງື່ມ ນະຄອນຫລວງວຽງຈັນ ດໍາເນີນທຸລະກິດນໍາເຂົ້າ-ຈໍາໜ່າຍນໍ້າມັນເຊື້ອໄຟ, ສະຖານີບໍລິການປໍ້ານໍ້າມັນ ແລະ ປໍ້າຕົວແທນ, ທຸລະກິດໃຫ້ເຊົ່າສາງນໍ້າມັນຢູ່ຈໍາປາສັກ, ສະຫວັນນະເຂດ ແລະ ອັດຕະປື ດ້ວຍທຶນຈົດທະບຽນທັງໝົດ 155 ຕື້ກີບ, ພາຍຫລັງອອກຈໍາໜ່າຍຮຸ້ນ IPO ເຮັດໃຫ້ມີທຶນຈົດທະບຽນເພີ່ມຂຶ້ນເປັນ 193 ຕື້ກີບ ແລະ ສະເພາະຮຸ້ນທີ່ສະເໜີຂາຍຄັ້ງນີ້ມີຈໍານວນ 96.875.000 ຮຸ້ນ, ໃນລາຄາບໍ່ເກີນ 500 ກີບຕໍ່ຮຸ້ນ ເຊິ່ງມີນະໂຍບາຍປັນຜົນບໍ່ຕໍ່າກວ່າ 50% ຂອງກໍາໄລສຸດທິຫລັງຈາກຫັກເຂົ້າຄັງສໍາຮອງ. ສ່ວນເງິນທີ່ໄດ້ຈາກການລະດົມທຶນແມ່ນຈະໃຊ້ເປັນທຶນໝູນວຽນກິດຈະການ ແລະ ຂະຫຍາຍທຸລະກິດໂຮງງານຜະລິດນໍ້າມັນກາຊວນ.

ທ່ານ ອານຸກອນ ສຸທຳມະວົງ ຜູ້ອໍານວຍການໃຫຍ່ບໍລິສັດ ຫລັກຊັບລ້ານຊ້າງ ມະຫາຊົນ ໃນຖານະທີ່ປຶກສາທາງດ້ານການເງິນ ແລະ ຜູ້ຄໍ້າປະກັນການອອກຈໍາໜ່າຍຫຸ້ນ ໃຫ້ຮູ້ວ່າ: ພາຍຫລັງສໍາເລັດການເຊັນສັນຍາແລ້ວ ທັງສອງບໍລິສັດພວກເຮົາຈະດໍາເນີນການຈັດຈໍາໜ່າຍຮຸ້ນ ເຊິ່ງຄາດວ່າຈະເປີດໃຫ້ມວນຊົນໄດ້ຈອງປະມານທ້າຍເດືອນກໍລະກົດ 2020 ນີ້.

ພິທີເຊັນສັນຍາດັ່ງກ່າວໄດ້ຈັດຂຶ້ນໃນວັນທີ 22 ມິຖຸນາ 2020 ທີ່ຕະຫລາດຫລັກຊັບລາວ, ໂດຍມີທ່ານ ວຽງຄຳ ວັນສີລາລົມ ຮອງຫົວໜ້າ ສຄຄຊ, ມີບັນດາຜູ້ຕາງໜ້າຈາກຕະຫລາດຫລັກຊັບລາວ ແລະ ພະນັກງານສອງຝ່າຍເຂົ້າຮ່ວມ.