ໂຄງການກໍ່ສ້າງທາງລົດໄຟ ລາວ-ຈີນ ຄືບໜ້າ 89% ວາງລາງແລ້ວເກືອບ 50 ກິໂລແມັດ
ທ່ານ ຈັນຕຸລາ ພະນະລາສີ ຫົວໜ້າຄະນະຄຸ້ມຄອງໂຄງການກໍ່ສ້າງທາງລົດໄຟ ລາວ-ຈີນ ເປີດເຜີຍວ່າ: ຮອດທ້າຍເດືອນພຶດສະພາ 2020, ການປະຕິບັດໂຄງການກໍ່ສ້າງທາງລົດໄຟ ລາວ-ຈີນ ມີຄວາມຄືບໜ້າດີ ສາມາດບັນລຸ 89,43% ຂອງວຽກງານກໍ່ສ້າງພື້ນຖານໂຄງລ່າງ ທາງລົດໄຟ; ໃນນີ້, ໄດ້ຊີເຈາະໄດ້ 75 ອຸໂມງ, ຍາວ 223.600 ແມັດ ເຈາະທະລຸແລ້ວ 65 ອຸໂມງ, ກໍ່ສ້າງຂົວທັງໝົດ 164 ແຫ່ງ, ສ້າງເສົາຂົວສໍາເລັດ 1.959 ເສົາ ເທົ່າກັບ 98,10% ຂອງການອອກແບບທັງໝົດ, ສໍາເລັດການວາງຂາງຂົວ 746 ຊ່ວງເສົາ ກວມເອົາ 36,60%; ສ່ວນການວາງລາງແມ່ນເລີ່ມແຕ່ບ້ານຫ້ວຍນໍ້າເຢັນ ເມືອງນາຊາຍທອງ ນະຄອນ ຫລວງວຽງຈັນ ຫາ ແຂວງຫລວງພະບາງ ສໍາເລັດ 49,7 ກິໂລແມັດ ຂອງຄວາມຍາວທັງໝົດ 409 ກິໂລແມັດ.
ສໍາລັບຄວາມຄືບໜ້າການຈັດຕັ້ງປະຕິບັດ ໂຄງການກໍ່ສ້າງທາງລົດໄຟ ລາວ-ຈີນໄລຍະ 2 ແຕ່ສະຖານີໂດຍສານ ນະຄອນຫລວງວຽງຕັນ ຫາສະຖານີສິນຄ້າວຽງຈັນໃຕ້ ທີ່ທ່ານາແລ້ງ ແມ່ນສໍາເລັດການປັກຫລັກຂອບເຂດສະຖານີໂດຍສານ ໃນເນື້ອທີ່ 150 ເຮັກຕາ, ສໍາເລັດການປັກຫລັກຂອບເຂດສະຫງວນທາງລົດໄຟ ຄວາມຍາວ 17 ກິໂລແມັດ, ສໍາເລັດການປັກຫລັກຂອບເຂດສະຖານີສິນຄ້າວຽງຈັນໃຕ້ 2 ຈຸດ ໃນຈໍານວນ 3 ຈຸດ; ສ່ວນການມອບພື້ນທີ່ເພື່ອການກໍ່ສ້າງຂອງໂຄງການ ແມ່ນປະຕິບັດໄດ້ 100% ໃນ 409 ກິໂລແມັດ. ໂດຍລວມການຈັດຕັ້ງປະຕິບັດວຽກງານຕ່າງໆຂອງການກໍ່ສ້າງທາງລົດໄຟ ລາວ-ຈີນ ໄດ້ດໍາເນີນໄປຢ່າງຄ່ອງແຄ້ວວ່ອງໄວ, ຮັບປະກັນຄຸນນະພາບ, ສາມາດສໍາເລັດຕາມກຳນົດເວລາ ແລະ ເຮັດໃຫ້ໂຄງການນີ້ ກາຍເປັນໂຄງການປອດໃສຂາວ ສະອາດຢ່າງແທ້ຈິງ.
ຜົນສຳເລັດດັ່ງກ່າວ ໄດ້ຮັບການລາຍງານຕໍ່ກອງປະຊຸມຄົບຄະນະຄັ້ງທີ 8 ຂອງຄະນະຊີ້ນໍາໂຄງ ການກໍ່ສ້າງທາງລົດໄຟ ລາວ-ຈີນ ຈັດຂຶ້ນ ໃນວັນທີ 22 ມິຖຸນາ 2020 ທີ່ ແຂວງຫລວງພະບາງ, ພາຍໃຕ້ການເປັນປະທານຂອງ ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ, ຫົວໜ້າຄະນະ ຊີ້ນໍາໂຄງການກໍ່ສ້າງທາງລົດໄຟ ລາວ-ຈີນ, ມີລັດຖະມົນຕີ-ຮອງລັດຖະມົນຕີ, ຮອງເຈົ້າຄອງນະຄອນຫລວງ-ຮອງເຈົ້າ ແຂວງ ທີ່ກ່ຽວຂ້ອງ, ຕາງໜ້າອົງການຈັດຕັ້ງມະຫາຊົນຂັ້ນສູນກາງ ແລະ ພະນັກງານ ທີ່ກ່ຽວຂ້ອງເຂົ້າຮ່ວມ.
ໂອກາດນີ້, ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ, ຮອງຫົວໜ້າຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ(ຜູ້ປະຈໍການ) ຍັງໄດ້ຍົກໃຫ້ເຫັນຜົນສໍາເລັດຫລາຍດ້ານ ເປັນຕົ້ນການປັບປຸງໂຄງຮ່າງການຈັດຕັ້ງຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ ຄືນໃຫມ່, ການແບ່ງຄວາມຮັບຜິດຊອບໃຫ້ແຕ່ລະພາກສ່ວນ, ທັງສາມາດໄກ່ເກ່ຍສິ່ງກີດຂວາງທີ່ຍັງຄ້າງຄາໃນ 11 ຈຸດ, ແກ້ໄຂບັນຫາຫຍຸ້ງຍາກຂອງບັນດາບໍລິສັດຮັບເໝົາລູກຊ່ວງ ແລະ ບໍລິສັດແມ່, ສໍາເລັດການປຶກສາປາລື ແລະ ຍົກຍ້າຍສະຖານີວຽງຈັນໃຕ້ ແລະ ມອບພື້ນທີ່ໃຫ້ແກ່ການກໍ່ສ້າງສະຖານີຕ່າງໆ, ບັນລຸຄາດໝາຍການສະໜອງແຮງງານລາວເຂົ້າໃນໂຄງການ ແລະ ການນໍາໃຊ້ວັດສະດຸ, ພາຫະນະຂອງລາວເຂົ້າໃນໂຄງການ, ການຕິດຕາມ, ກວດກາການປະຕິບັດສັນຍາຂອງໂຄງການ ແລະ ວຽກງານອື່ນໆອີກ.
ນອກນີ້, ຄະນະ ຊີ້ນໍາໂຄງການກໍ່ສ້າງທາງລົດໄຟລາວ-ຈີນ ຍັງໄດ້ປຶກສາຫາລືເພື່ອຜ່ານຮູບແບບລົດໄຟ EMU ເພື່ອນໍາໃຊ້ເຂົ້າໃນການຂົນສົ່ງໂດຍສານ ໂຄງການທາງລົດໄຟລາວ-ຈີນ ໃນອະນາຄົດ ເຊິ່ງການອອກແບບເບື້ອງຕົ້ນ ແມ່ນນໍາໃຊ້ເຕັກນິກລວມສູນທີ່ຊໍານິຊໍານານ ແລະ ເຊື່ອຖືໄດ້ໃນການຂັບເຄື່ອນດ້ວຍໄຟຟ້າ; ມີການປະສົມປະສານສົມທົບກັບວັດທະນະທໍາລາວ, ສາກົນ ແລະ ປັດໃຈຄວາມທັນສະໄຫມ ເພື່ອຄົ້ນຄວ້າ ແລະ ດໍາເນີນການຜະລິດ.
