ຂ່າວຮ້າຍກັບ ທຣຳ ກ່ອນການເລືອກຕັ້ງ

ແຫຼ່ງຂ່າວຈຳນວນໜຶ່ງເປີດເຜີຍວ່າ: ມີນາຍທະຫານລະດັບສູງຂອງສະຫະລັດອາເມລິກາຄົນໜຶ່ງ ກຳລັງຈະຂໍລາອອກຈາກໜ້າທີ່ຕຳແໜ່ງ ພາຍຫຼັງມີຫາງສຽງວິພາກວິຈານ ແລະ ຄັດຄ້ານ ຍ້ອນໄດ້ຖ່າຍຮູບກັບ ທຣຳ ຢູ່ໃນສະຖານທີ່ປະທ້ວງແຫ່ງໜຶ່ງໃນ ວໍຊິງຕັນ.

ນີ້ຄືຂ່າວຮ້າຍຂອງປະທານາທິບໍດີ ທຣຳ ໃນຂະນະທີ່ເຂົາກຳລັງລົ້ມລຸກຄຸກຄາມກັບການເສຍບົດບາດກ່ອນການເລືອກຕັ້ງ ແລະ ຫາງສຽງວິພາກວິຈານກ່ຽວກັບວິກິດການການລະບາດຂອງພະຍາດໂຄວິດ-19 ແລະ ຂະບວນການຕ້ານການຈຳແນກເຊື້ອຊາດ-ຜິວພັນ ທີ່ກຳລັງລຸກລາມບານປາຍຢູ່ໃນຂະນະນີ້ ພາຍຫຼັງການຕາຍຂອງຊາວສີຜິວ George Floyd ຈາກການກົດໜີບຄໍຂອງເຈົ້າໜ້າທີ່ຕຳຫຼວດໃນເດືອນພຶດສະພາຜ່ານມາ.

ສຳນັກສານ NBC ໃຫ້ຮູ້ວ່າ: ນາຍທະຫານລະດັບສູງ ທ່ານ  Mark Milley ປະທານສະພາທີ່ປຶກສາການທະຫານຂອງສະຫະລັດ ໄດ້ຄຸ້ມກັນປະທານາທິບໍດີ ທຣຳ ໄປໂບດ St. John ແລະ ສະໜາມຫຼວງ Lafayette ໃນນະຄອນວໍຊິງຕັນ, ໃນວັນ 1 ມີຖຸນາຜ່ານມາ.

ຫຼາຍຄົນໄດ້ກ່າວຫາວ່າ ທຣຳ ສວຍໂອກາດການໄປປະເມີນຜົນການເສຍຫາຍຂອງ ໂບດ ແລະ ສະໜາມຫຼວງຈາກຂະບວນການປະທ້ວງຂອງປະຊາຊົນ ມາເປັນການໄປ ຖ່າຍພາບແທນ.

ຫຼາຍຄົນກ່າວປະນາມວ່າ: ທ່ານ Milley ໄດ້ໃສ່ຊຸດທະຫານເຕັມຮູບແບບຄືກັນກັບອອກສະໜາມຮົບໄປກັບ ທຣຳ, ອັນນັ້ນ ສະແດງວ່າເຂົາສະໜັບສະໜູນ ທຣຳ ໃຫ້ລະດົມກຳລັງທະຫານໄປປາບປາມຂະບວນການປະທ້ວງຂອງປະຊາຊົນ.

ນາຍທະຫານ 3 ຄົນ ເປີດເຜີຍວ່າ: ທ່ານ Milley ໄດ້ໃຊ້ເວລາອ່ານຄຳຕຳນິວິຈານທ່ານຈາກສັງຄົມ ພາຍຫຼັງທີ່ທ່ານໄດ້ໄປກັບ ທຣຳ ກັບຄືນມາ ແລະ ທ່ານໄດ້ຕິດຕໍ່ກັບບັນດາທີ່ປຶກສາຂອງທຳນຽບ 5 ແຈ ກ່ຽວກັບເລື່ອງລາວທີ່ເກີດຂຶ້ນ ນັບທັງຄວາມອາດສາມາດລາອອກຈາກໜ້າທີ່ຕຳແໜ່ງອີກດ້ວຍ.

ໃນວະລະກອງປະຊຸມໃຫ່ຍສະພາປ້ອງກັນຊາດໃນວັນທີ 11 ມີຖຸນານີ້ ທ່ານ Milley ໄດ້ອອກມາຂໍໂທດກັບເຫດການທີ່ເກີດຂຶ້ນ, ທ່ານໄດ້ກ່າວຄວາມກິນແໜງແຄງໃຈ ແລະ ເສຍໃຈຕໍ່ເຫດການດັ່ງກ່າວ ເພາະຖືກກ່າວຫາວ່າ ທະຫານໄປຫຍຸ້ງກ່ຽວກັບການເມືອງພາຍໃນປະເທດ.

ຂ່າວ: ລູກເມືອງພວນ(ແຫຼ່ງຂ່າວ vietnamnet)