ກຸ່ມຫັດຖະກຳຈັກສານຫວາຍບ້ານແບ່ງດ່ານ ເມືອງລະຄອນເພັງ ສ້າງລາຍຮັບ ຫລາຍກວ່າ 1ລ້ານກີບ/ຄົນ/ເດືອນ

ກຸ່ມຫັດຖະກຳຈັກສານຫວາຍ ບ້ານແບ່ງດ່ານ ເມືອງລະຄອນເພັງ ແຂວງສາລະວັນ ສາມາດສ້າງອາຊີບ, ສ້າງລາຍຮັບ ໃຫ້ປະຊາຊົນພາຍໃນບ້ານແບ່ງດ່ານ ຫລາຍ​ກວ່າ 1 ລ້ານກີບ ຕໍ່ຄົນຕໍ່ເດືອນ, ຈາກການຜະລິດ ແລະ ຂາຍຜະລິດ​ຕະພັນ ຂັນ, ພາເຂົ້າ, ຕິບເຂົ້າ, ຕະຕ່າ ແລະ ອື່ນໆ ທີ່ເຮັດດ້ວຍຫວາຍ ແລະ ໄມ້ປ່ອງ. ປັດຈຸບັນ ກຸ່ມຫັດຖະກຳດັ່ງ​ກ່າວ, ມີ​ສະມາຊິກ​ທັງ​ໝົດ 30 ກວ່າ​ຄອບຄົວ.

ທ່ານ ໄຊຊະນະ ສີສະຫວັດ ຮອງເຈົ້າເມືອງລະຄອນເພັງ ແຂວງສາລະວັນ, ລາຍງານໃຫ້ຮູ້ເມື່ອບໍ່ດົນມານີ້ວ່າ: ກຸ່ມຫັດຖະກຳຈັກສານຫວາຍ ບ້ານແບ່ງດ່ານ ໄດ້ສ້າງຕັ້ງຂຶ້ນ ໃນປີ 1979 ​ໃນ​ເບື້ອງ​ຕົ້ນ, ໄດ້ມີເຖົ້າແກ່ ຈໍານວນໜຶ່ງ ໄດ້ໄປເຫັນເຄື່ອງຫັດຖະກຳຢູ່ບ່ອນອື່ນ ແລ້ວມີຄວາມສົນໃຈຄິດວ່າໃນບ້ານມີວັດຖຸດິບຫລາຍ ໂດຍສະເພາະຫວາຍ ແລະ ໄມ້ປ່ອງ. ຫລັງ​ຈາກນັ້ນ, ກໍໄດ້ພ້ອມກັນຜະລິດອອກຈຳໜ່າຍສູ່ຕະຫລາດ ​ແລະ ເຫັນວ່າໄດ້ຮັບການຕອບສະໜອງເປັນຢ່າງດີ ບໍ່ວ່າຈະເປັນທັງພາຍໃນແຂວງ ແລະ ຕ່າງແຂວງ ກໍໃຫ້ຄວາມນິຍົມ, ແຕ່ເຮັດແບບກະແຈກກະຈາຍ ບໍ່ໄດ້ເປັນກຸ່ມເປັນກ້ອນ, ມາຮອດປີ 1996 ອົງການປົກຄອງເມືອງ ຈຶ່ງຊຸກຍູ້ສ້າງຕັ້ງກຸ່ມດັ່ງກ່າວຂຶ້ນຢ່າງເປັນທາງການ, ສ່ວນຫວາຍ ທີ່ນໍາໃຊ້ເຂົ້າໃນການຜະລິດແມ່ນມີພາຍໃນບ້ານ ໂດຍອົງການປົກຄອງເມືອງ ໄດ້ມອບໃຫ້ຂະແໜງກ່ຽວຂ້ອງຂອງເມືອງ ຊ່ວຍຊອກຫາຕະຫລາດ ແລະ ຝຶກອົບຮົມທັກສະສີມື ​ໃຫ້ສະມາຊິກຂອງກຸ່ມໃຫ້ດີຂຶ້ນກ່ວາເກົ່າ. ສ່ວນຕະຫລາດຈໍາໜ່າຍຫລັກ ແມ່ນພາຍໃນແຂວງສາລະວັນ, ສົ່ງຂາຍຢູ່ນະ ຄອນຫລວງວຽງຈັນ ແລະ ແຂວງຈຳປາສັກ ຕື່ມ​ອີກ.

ທ່ານ ໄຊຊະນະ ສີສະຫວັດ ​ໃຫ້​ຮູ້​ອີກ​ວ່າ: ເພື່ອໃຫ້ກຸ່ມຫັດຖະກໍານີ້ມີຄວາມຍືນຍົງ ໃນຕໍ່ໜ້າ ອົງການປົກຄອງເມືອງ ຈະຊຸກຍູ້ໃຫ້ເກີດມີສວນກ້າ ແລະ ບ່ອນປູກຫວາຍຂອງກຸ່ມສະເພາະ ເພື່ອຮັບ ປະກັນໃຫ້ມີວັດຖຸດິບ ເຂົ້າໃນການຜະລິດພຽງພໍກັບຄວາມຕ້ອງການ. ພ້ອມນີ້, ຈະນໍາເອົາປະຊາຊົນຈາກຫລາຍບ້ານ ມາຖອດຖອນບົດຮຽນນໍາ ແນໃສ່ເພື່ອສ້າງກຸ່ມຫັດຖະກໍາຈັກສານ ໃຫ້ໄດ້ອີກຫລາຍກຸ່ມພາຍໃນເມືອງໃນຕໍ່ໜ້າ.