ກູບາປະນາມທ່ານ ທຣຳ ທີ່ຈະຍົກເລີກຫລຸດຜ່ອນ ຄວາມເຄັ່ງຕຶງສະໄໝທ່ານ ໂອບາມາ
ຮາວານາ 17 ມິຖຸນາ: ລັດຖະບານກູບາປະນາມປະທານາທິບໍດີ ໂດນັນ ທຣຳ ທີ່ຈະອອກມາດຕະການໃໝ່ເຂັ້ມງວດການປິດລ້ອມກູບາ ອັນເປັນການຍົກເລີກມາດຕະການຫລຸດຜ່ອນຄວາມເຄັ່ງຕຶງລະຫວ່າງສອງປະເທດສະໄໝປະທານາທິບໍດີ ບາຣັກ ໂອບາມາ, ແຕ່ຍັງພ້ອມຈະສືບຕໍ່ການເຈລະຈາຢ່າງໃຫ້ກຽດກັນຕໍ່ໄປ.
ລາຍການຂ່າວພາກຄໍ່າຂອງສະຖານີໂທລະພາບກູບາອ່ານຖະແຫລງການລັດຖະບານວ່າ: ທ່ານ ທຣຳ ກຳລັງໃຊ້ວິທີການຂົ່ມຂູ່ແບບໃນອະດີດທີ່ທຳຮ້າຍຊາວກູບາ ແລະ ຂັດຂວາງການພັດທະນາທາງເສດຖະກິດຂອງກູບາ, ແຕ່ຈະບໍ່ສາມາດເຮັດໃຫ້ການປະຕິວັດກູບາອ່ອນແອລົງໄດ້, ລັດຖະບານກູບາຂໍປະນາມມາດຕະການໃໝ່ທີ່ຈະເຂັ້ມງວດການປິດລ້ອມ ເຊິ່ງຈະຫລົ້ມເຫລວ, ພ້ອມກັບກ່າວຫາທ່ານ ທຣຳ ວ່າໃຊ້ເລື່ອງນີ້ເພື່ອປະໂຫຍດທາງການເມືອງ. ອາເມລິກາບໍ່ຢູ່ໃນຈຸດທີ່ຈະສອນເລື່ອງສິດທິມະນຸດກັບປະເທດອື່ນ ເພາະອາເມລິກາມີທັງເລື່ອງຕຳຫລວດໃຊ້ອຳນາດໂດຍບໍ່ຖືກຕ້ອງ, ການກໍ່ອາຊະຍາກຳດ້ວຍປືນ, ການເລືອກປະຕິບັດດ້ານສີຜິວ, ການຂາດເຂີນບໍລິການສາທາລະນະສຸກ, ຄວາມບໍ່ເທົ່າທຽມທາງເພດໃນເລື່ອງລາຍຮັບ ແລະ ການທໍລະມານນັກໂທດຢູ່ຄຸກກວຍຕານາໂມ. ເຖິງຢ່າງໃດກໍດີ, ທັງສອງປະເທດໄດ້ພິສູດໃຫ້ເຫັນຕະຫລອດສອງປີຜ່ານມາວ່າ ສາມາດຮ່ວມມື ແລະ ຢູ່ຮ່ວມກັນຢ່າງສະຫງົບ ໂດຍການເຄົາລົບໃນຄວາມແຕກຕ່າງ, ກູບາພ້ອມປານີປານອມ ແລະ ຊາວກູບາພ້ອມຕັດສິນໃຈເລື່ອງການປ່ຽນແປງທີ່ຈຳເປັນຕໍ່ປະເທດ.
ກູບາອອກຖະແຫລງການດັ່ງກ່າວ ພາຍຫລັງທ່ານ ທຣຳ ປະກາດໃນວັນດຽວກັນລະຫວ່າງກ່າວສູນທອນພົດຢູ່ໄມແອມີວ່າ: ກຳລັງຍົກເລີກຂໍ້ຕົກລົງກັບກູບາທີ່ບໍ່ດີ ແລະ ຊີ້ນຳໄປຢ່າງຜິດໆ ໂດຍໄດ້ສັ່ງເຂັ້ມງວດກັບຊາວອາເມລິກາທີ່ເດີນທາງໄປກູບາ ແລະ ຈຳກັດການເຮັດທຸລະກິດກັບກອງທັບກູບາ, ເປັນການຕັດສິນໃຈໄປຕາມສະຖານະການດ້ານສິດທິມະນຸດຢູ່ກູບາ ແລະ ຮຽກຮ້ອງໃຫ້ກູບາປ່ອຍຕົວນັກໂທດທາງການເມືອງ, ຈັດການເລືອກຕັ້ງທີ່ເສລີ ແລະ ເປັນທຳ.
