ການສ້ອມແປງຂົວນ້ຳພະນາຍກຳນົດໃຫ້ສຳເລັດພາຍໃນ 45 ວັນ
ຫົວໜ້າຫ້ອງການໂຍທາທິການ ແລະ ຂົນສົ່ງ (ຍທຂ) ເມືອງທຸລະຄົມ ແຂວງວຽງຈັນໃຫ້ຮູ້ວ່າ: ຂົວນໍ້າພະນາຍ, ເປັນຂົວຫລັກໃນການໄປມາຫາສູ່ກັນລະຫວ່າງ ປະຊາຊົນບ້ານເກິນ, ກໍຄືຜູ້ສັນຈອນໄປມາໃນເສັ້ນທາງເລກສິບ ອອກໄປທ່າລາດ, ກໍຄືຂົວຂ້າມນໍ້າງື່ມ ລະຫ່ວາງເມືອງທຸລະຄົມ ແລະ ເມືອງວຽງຄຳແຂວງວຽງຈັນ, ແຕ່ເມື່ອວັນທີ 2 ມິຖຸນາຜ່ານມາ ຂົວດັ່ງກ່າວ ໄດ້ຫັກພັງລົງມາຍ້ອນລົດບັນທຸກຊີມັງເກີນນໍ້າໜັກ ແລະ ໄດ້ເຮັດໃຫ້ ການຄົມມະນາຄົມ ບົນເສັ້ນທາງດັ່ງກ່າວຕ້ອງຢຸດສະຫງັກ ແລະສ້າງຄວາມ ຫຍຸ້ງຍາກລຳບາກແກ່ການສັນຈອນໄປ ມາຂອງປະຊາຊົນໃນເຂດບ້ານດັ່ງກ່າວ ຈຳເປັນຕ້ອງໄດ້ໃຊ້ທາງເວັ້ນທີ່ມີໄລຍະທາງໄກສົມຄວນ.
ຊຶ່ງນັບແຕ່ມື້ເກີດເຫດ ຈົນເຖິງວັນທີ 8 ມິຖຸນາ ທາງເມືອງຈິ່ງໄດ້ລົງໄປເຮັດບົດບັນທຶກ ກັບຜູ້ກໍ່ເຫດ ງຄວາມເສຍຫາຍດັ່ງກ່າວ ແລະ ໄດ້ຍອມຮັບຜິດຊອບຕໍ່ຄວາມເສຍຫາຍທັງໝົດ. ໂດຍໄດ້ຕົກລົງສ້ອມແປງຂົວຄືນໃໝ່ໃຫ້ສຳເລັດພາຍໃນໄລຍະເວລາ 45 ວັນ ນັບແຕ່ມື້ລົງລາຍເຊັນນີ້ເປັນຕົ້ນໄປ.
ຈົນຮອດວັນທີ 15 ມິຖຸນາ ຜູ້ກະທຳຜິດຈິ່ງເລີ່ມແກ້ໄຂນຳເອົາເສດຂົວຫັກ ແລະ ລົດບັນທຸກຄັນດັ່ງກ່າວຂຶ້ນມາຈາກບ່ອນເກີດເຫດ ເປັນທີ່ຮຽບຮ້ອຍແລ້ວ ແລະ ກໍໄດ້ເລີ່ມລົງມືສ້ອມແປງເພື່ອໃຫ້ສຳເລັດຕາມຄາດຫມາຍ, ແກ້ໄຂບັນຫາການ ສັນຈອນ ໃນເສັ້ນທາງສາຍນີ້ໄດ້ສະດວກສະບາຍ.
ສ່ວນຄວາມຄືບໜ້າໃນແຕ່ລະຂັ້ນຕອນຕ່າງໆນັ້ນ ສຳນັກຂ່າວໜັງສືພິມລາວພັດທະນາຈະລາຍງານເປັນໄລຍະໆ. 
