ປັກກິ່ງຍົກລະດັບມາດຕະການຕອບສະໜອງ ໂຄວິດ-19 ຫ້າມປະຊາຊົນໃນພື້ນທີ່ສ່ຽງເດີນທາງ ອອກຈາກເມືອງຫລວງ ຍົກເລີກ 1.200 ຖ້ຽວບິນ
ປັກກິ່ງຍົກລະດັບມາດຕະການຕອບສະໜອງສະຖານະການສຸກເສີນໂຄວິດ-19 ຈາກລະດັບ 3 ເປັນລະດັບ 2 ໃນຄືນວັນທີ 16 ມິຖຸນາ, ພ້ອມກັບມາຄວບຄຸມຊຸມຊົນທີ່ມີຄວາມສ່ຽງຢ່າງເຂັ້ມງວດ ໂດຍກຳນົດໃຫ້ປະຊາຊົນຕ້ອງວັດແທກອຸນຫະພູມ, ລົງທະບຽນ ແລະ ສະແກນໂຄ໊ດສຸຂະພາບກ່ອນເຂົ້າຊຸມຊົນ ຫລັງເກີດການລະບາດຮອບໃໝ່ຈາກກຸ່ມກ້ອນຕະຫລາດຂາຍສົ່ງອາຫານຊິນຟາຕີ້ໃນເຂດເຟິງໄຖ ທາງໃຕ້ຂອງເມືອງຫລວງ.
ທາງການຈີນລາຍງານວ່າມີຜູ້ຕິດເຊື້ອໃໝ່ໃນ 4 ວັນຫລັງສຸດຈຳນວນ 36, 36, 27 ແລະ 31 ຄົນ ຕາມລຳດັບ ໂດຍມີສັນຍານວ່າການລະບາດຄັ້ງໃໝ່ມີຈຸດເລີ່ມຕົ້ນຈາກຕະຫລາດຊິນຟາຕີ້ທີ່ມີຂະໜາດໃຫຍ່ເກືອບເທົ່າສະໜາມບານເຕະ 160 ສະໜາມລວມກັນ ແລະ ໃຫຍ່ກວ່າຕະຫລາດອູ່ຮັທີ່ຄົ້ນພົບການລະບາດຂອງໄວຣັສໂຄໂຣນາ 2019 ຄັ້ງທຳອິດເຖິງ 20 ເທົ່າ.
ນອກເໜືອຈາກມາດຕະການຄວບຄຸມຄົນເຂົ້າຊຸມຊົນແລ້ວ, ທາງການຍັງຫ້າມລົດ ແລະ ປະຊາຊົນຈາກພາຍນອກເຂົ້າເຂດຊຸມຊົນໃນພື້ນທີ່ສ່ຽງສູງ ແລະ ສ່ຽງປານກາງ ລວມທັງຫ້າມຄົນໃນຊຸມຊົນອອກຈາກພື້ນທີ່ນຳອີກ ເພື່ອປ້ອງກັນການລະບາດໃນວົງກວ້າງ.
ນອກຈາກນີ້ ຍັງຫ້າມການເດີນທາງເປັນກຸ່ມຈາກມົນທົນອື່ນເຂົ້າປັກກິ່ງ ແລະ ໂຈະການໃຫ້ບໍລິການລົດເມຮັບສົ່ງລະຫວ່າງມົນທົນຢູ່ສະໜາມບິນນາໆຊາດຕ້າຊິງ ແລະ ສະໜາມບິນນາໆຊາດປັກກິ່ງນຳອີກ.
ສ່ວນຖ້ຽວບິນຂາເຂົ້າ ແລະ ຂາອອກຈາກປັກກິ່ງກໍຖືກຍົກເລີກເຊັ່ນກັນ ຫລັງປັກກິ່ງຍົກລະດັບມາດຕະການຕໍ່ສູ້ກັບໂຄວິດ-19 ເປັນຂັ້ນ 2 ໂດຍ People’s Daily ລາຍງານວ່າ: ໃນຕອນເຊົ້າວັນທີ 17 ມິຖຸນາ ມີຖ້ຽວບິນຢ່າງໜ້ອຍ 1.255 ຖ້ຽວທີ່ຖືກຍົກເລີກ ຫລື ຄິດເປັນເກືອບ 70% ຂອງຖ້ຽວບິນຂາເຂົ້າ ແລະ ຂາອອກທັງໝົດຢູ່ສະໜາມບິນຫລັກຂອງປັກກິ່ງ.
ສ່ວນໂຮງຮຽນສ່ວນຫລາຍຢູ່ປັກກິ່ງທີ່ກັບມາເປີດການຮຽນການສອນແລ້ວກໍຖືກສັ່ງໃຫ້ປິດອີກເທື່ອໜຶ່ງ ໂດຍໃຫ້ນັກຮຽນຮຽນຜ່ານລະບົບອອນລາຍແທນ.
ທ່ານ ເສິນເປ່ຍ ຮອງເລຂາທິການລັດຖະບານປັກກິ່ງ ລະບຸວ່າ: ສະຖານະການຢູ່ເມືອງຫລວງຍັງເຄັ່ງຕຶງ. ດັ່ງນັ້ນ ປະຊາຊົນໃນພື້ນທີ່ສ່ຽງສູງ ແລະ ສ່ຽງປານກາງ ລວມທັງປະຊາຊົນທີ່ເຮັດວຽກ ຫລື ເຄີຍເດີນທາງໄປຕະຫລາດຊິນຟາຕີ້ຈະຖືກຫ້າມບໍ່ໃຫ້ເດີນທາງອອກຈາກປັກກິ່ງ.
ໂດຍມາດຕະການສຸກເສີນລະດັບ 2 ນີ້ຍັງກຳນົດໃຫ້ສະຖານທີ່ສາທາລະນະເຊັ່ນ: ຫ້ອງສະໝຸດ, ພິພິທະພັນ, ສູນສະແດງສິນລະປະ ແລະ ສວນສາທາລະນະ ຕ້ອງຈຳກັດເວລາເຂົ້າອອກ ແລະ ຈຳນວນຄົນບໍ່ໃຫ້ເກີນ 30%.
ທ່ານ ເສິນເປ່ຍ ຍັງແນະນຳໃຫ້ປະຊາຊົນໃສ່ຜ້າອັດປາກ-ດັງຕະຫລອດເວລາເມື່ອຢູ່ໃນສະຖານທີ່ປິດ ແລະ ສົ່ງເສີມໃຫ້ປະຊາຊົນເຮັດວຽກຢູ່ເຮືອນ ໂດຍຢູ່ໂຮງງານຕ່າງໆຍັງບໍ່ຖືກສັ່ງໃຫ້ໂຈະການຜະລິດ.
