ນິວຊີແລນພົບຜູ້ຕິດເຊື້ອໂຄວິດ-19 ໃໝ່ ຢຸດສະຕິຖິປອດເຊື້ອດົນ 24 ວັນ
ທາງການນິວຊີແລນຢືນຢັນພົບຜູ້ຕິດເຊື້ອໄວຣັສໂຄໂຣນາສາຍພັນໃໝ່ 2 ຄົນໃໝ່ ທີ່ເດີນທາງມາຈາກສະຫະຣາຊະອານາຈັກ ເປັນການຢຸດສະຖິຕິບໍ່ພົບຜູ້ຕິດເຊື້ອໃນປະເທດມາ 24 ວັນ.
ຜູ້ຕິດເຊື້ອທັງສອງຄົນເປັນຜູ້ຍິງໃນຄອບຄົວດຽວກັນ ທີ່ເດີນທາງເຂົ້ານິວຊີແລນໂດຍໄດ້ຮັບອະນຸຍາດເປັນກໍລະນີພິເສດ ເພື່ອຮ່ວມພິທີສົບຂອງພີ່ນ້ອງ.
ໃນອາທິດຜ່ານມາ, ນິວຊີແລນຫາກໍປະກາດຍົກເລີກການໃຊ້ຂໍ້ຈຳກັດເພື່ອຄວບຄຸມການລະບາດຂອງພະຍາດໂຄວິດ-19 ທັງໝົດ, ພ້ອມປະກາດວ່າ: ປະເທດໄດ້ປອດຈາກເຊື້ອໄວຣັສຊະນິດນີ້ແລ້ວ.
ເຖິງຢ່າງໃດກໍຕາມ, ນິວຊີແລນຍັງມີການໃຊ້ມາດຕະການຄວບຄຸມຢູ່ຊາຍແດນຢ່າງເຂັ້ມງວດ ໂດຍອະນຸຍາດໃຫ້ສະເພາະພົນລະເມືອງ ແລະ ຜູ້ປະຕິບັດງານສຳຄັນເດີນທາງເຂົ້າປະເທດໄດ້ເທົ່ານັ້ນ.
ປັດຈຸບັນຍັງບໍ່ຮູ້ແນ່ນອນວ່າ: ຜູ້ຍິງທັງສອງຄົນເປັນພົນລະເມືອງສະຫະຣາຊະອານາຈັກ, ນິວຊີແລນ ຫລື ປະເທດອື່ນ.
ຜູ້ຕິດເຊື້ອທັງສອງ ເຊິ່ງຜູ້ໜຶ່ງອາຍຸ 30 ປີ ແລະ ອີກຜູ້ໜຶ່ງອາຍຸ 40 ປີ ໄດ້ເດີນທາງມາຈາກສະຫະຣາຊະອານາຈັກ ຜ່ານນະຄອນຫລວງໂດຮາຂອງກາຕາ ແລະ ເມືອງບຣິສເບນຂອງອົດສະຕຣາລີ ກ່ອນຈະມາເຖິງນິວຊີແລນ ໃນວັນທີ 7 ມິຖຸນາ ແລະ ເຂົ້າຂະບວນການກັກກັນພະຍາດ.
ທັງສອງເຂົ້າພັກຢູ່ໂຮງແຮມທີ່ຈັດໄວ້ໃຫ້ຜູ້ເຂົ້າຮັບການກັກກັນພະຍາດໃນເມືອງໂອກແລນ, ຈາກນັ້ນວັນທີ 12 ມິຖຸນາ ໄດ້ສະໝັກຂໍຮັບສິດຍົກເວັ້ນ ເພື່ອໄປເບິ່ງໃຈພີ່ນ້ອງທີ່ກຳລັງຈະເສຍຊີວິດ (ເຊິ່ງໄດ້ເສຍຊີວິດລົງໃນຄືນດຽວກັນນັ້ນ).
ຜູ້ຍິງທັງສອງໄດ້ຮັບອະນຸຍາດໃຫ້ເດີນທາງໄປນະຄອນຫລວງເວວລິງຕັນໃນວັນທີ 13 ມິຖຸນາ ໂດຍໜຶ່ງໃນນັ້ນມີ “ອາການເລັກໜ້ອຍ” ແຕ່ຄິດວ່າເປັນອາການຈາກພະຍາດທີ່ເປັນມາຢູ່ກ່ອນແລ້ວ.
ຈາກນັ້ນພວກນາງໄດ້ເດີນທາງໄປນະຄອນຫລວງເວວລິງຕັນດ້ວຍລົດຍົນສ່ວນບຸກຄົນ ແລະ ບໍ່ໄດ້ໃຊ້ສະຖານທີ່ສາທາລະນະໃດໆຕະຫລອດການເດີນທາງ.
ຜູ້ຕິດເຊື້ອທັງສອງໄດ້ພັກຢູ່ກັບພີ່ນ້ອງຄົນໜຶ່ງໃນນະຄອນຫລວງເວວລິງຕັນ ເຊິ່ງປັດຈຸບັນພີ່ນ້ອງຄົນດັ່ງກ່າວໄດ້ເຂົ້າຂະບວນການກັກຕົນເອງແລ້ວ, ສ່ວນຜູ້ຍິງທັງສອງຄົນໄດ້ຮັບການກວດຫາເຊື້ອໂຄວິດ-19 ໃນວັນທີ 15 ມິຖຸນາ ແລະ ຜົນຢືນຢັນວ່າຕິດເຊື້ອໃນວັນ 16 ມິຖຸນາ.
ທ່ານ ໝໍ ບລູມຟິລ ລະບຸວ່າ: ຕໍ່ຈາກນີ້ເປັນຕົ້ນໄປ “ຜູ້ຈະໄດ້ຮັບການຍົກເວັ້ນໃຫ້ເດີນທາງເຂົ້ານິວຊີແລນດ້ວຍເຫດຜົນດ້ານມະນຸດສະທຳແບບນີ້ຈະຕ້ອງຜ່ານການກວດຫາເຊື້ອ ແລະ ມີຜົນເປັນລົບ” ກ່ອນຈຶ່ງໄດ້ຮັບການປ່ອຍຕົວ.
ນັບແຕ່ວັນທີ 8 ມິຖຸນາຜ່ານມາ, ຜູ້ເດີນທາງເຂົ້າປະເທດນິວຊີແລນທຸກຄົນຈະຕ້ອງເຂົ້າຮັບການກວດຫາເຊື້ອໂຄວິດ-19 ແລະ ຕ້ອງເຂົ້າສູ່ຂະບວການກັກຕົນເອງ ຫລື ກັກກັນພະຍາດ.
ຂະນະທີ່ໃນວັນດຽວກັນນັ້ນ, ລັດຖະບານນິວຊີແລນໄດ້ປະກາດຍົກເລີກຂໍ້ຈຳກັດຕ່າງໆເກືອບທັງໝົດທີ່ເຄີຍປະກາດໃຊ້ ເພື່ອຄວບຄຸມການລະບາດຂອງໂຄວິດ-19 ຫລັງຈາກບໍ່ພົບຜູ້ຕິດເຊື້ອຕິດຕໍ່ກັນ 2 ອາທິດ ເຮັດໃຫ້ນິວຊີແລນເປັນພຽງບໍ່ເທົ່າໃດປະເທດໃນໂລກທີ່ສາມາດກັບສູ່ສະພາບປົກກະຕິໄດ້ສຳເລັດ ຫລັງເກີດການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່.
ການພົບຜູ້ຕິດເຊື້ອເພີ່ມ 2 ຄົນ ເຮັດໃຫ້ນິວຊີແລນມີຜູ້ຕິດເຊື້ອໂຄວິດ-19 ທີ່ໄດ້ຮັບການຢືນຢັນ ຈຳນວນ 1.506 ຄົນ ແລະ ມີຜູ້ເສຍຊີວິດຈາກພະຍາດນີ້ 22 ຄົນ ນັບແຕ່ເກີດການລະບາດໃນປະເທດເມື່ອທ້າຍເດືອນກຸມພາ. ນິວຊີແລນເປັນປະເທດທີ່ໄດ້ຮັບການຍໍຍ້ອງໃນເລື່ອງການແກ້ໄຂວິກິດນີ້ຢ່າງເຫັນຜົນ.
ຂະນະທີ່ທ່ານ ນາງ ອາເດິນ ໄດ້ຮັບຄຳຍ້ອງຍໍວ່າເປັນນັກສື່ສານທີ່ດີ ດ້ວຍການອະທິບາຍເລື່ອງນີ້ຕໍ່ປະຊາຊົນຢ່າງຈະແຈ້ງ ເຮັດໃຫ້ປະສົບຜົນສຳເລັດເປັນປະເທດທີ່ມີອັດຕາຜູ້ຕິດເຊື້ອຕໍ່ປະຊາກອນຕໍ່າທີ່ສຸດໃນໂລກປະເທດໜຶ່ງ.
ສ່ວນສະຖານະການການແຜ່ລະບາດທົ່ວໂລກປັດຈຸບັນມີຜູ້ຕິດເຊື້ອສະສົມຫລາຍກວ່າ 8 ລ້ານຄົນ ແລະ ມີຜູ້ເສຍຊີວິດແລ້ວຢ່າງໜ້ອຍ 436.918 ຄົນ. ຂະນະທີ່ສະຫະຣາຊະອານາຈັກມີຜູ້ຕິດເຊື້ອສະສົມຢ່າງໜ້ອຍ 298.315 ຄົນ ແລະ ເສຍຊີວິດແລ້ວ 41.821 ຄົນ.
