ປັກກິ່ງພົບຜູ້ຕິດເຊື້ອໂຄວິດ-19 ເພີ່ມຕໍ່ເນື່ອງ
ນະຄອນຫລວງປັກກິ່ງຂອງຈີນຍັງພົບຜູ້ຕິດເຊື້ອໄວຣັສໂຄໂຣນາ 2019 ເພີ່ມຂຶ້ນທຸກວັນ, ຂະນະທີ່ອົງການອະນາໄມໂລກສະແດງຄວາມກັງວົນວ່າ: ໄວຣັສຈະກັບມາລະບາດອີກ.
ໃນວັນທີ 16 ມິຖຸນານີ້ ຈີນມີລາຍງານຜູ້ຕິດເຊື້ອຢູ່ນະຄອນຫລວງປັກກິ່ງອີກ 27 ຄົນຈາກກຸ່ມກ້ອນທີ່ກ່ຽວຂ້ອງກັບຕະຫລາດຂາຍສົ່ງອາຫານໃຫຍ່ທີ່ສຸດໃນເມືອງຫລວງ ເຮັດໃຫ້ປັດຈຸບັນນີ້ ນະຄອນຫລວງປັກກິ່ງມີຜູ້ຕິດເຊື້ອ 106 ຄົນໃນໄລຍະ 5 ວັນຜ່ານມາ. ຂະນະທີ່ມີການປິດຊຸມຊົນຫລາຍກວ່າ 20 ແຫ່ງໃນເມືອງ ແລະ ເລັ່ງທົດສອບຫາເຊື້ອປະຊາຊົນຫລາຍໝື່ນຄົນ. ນອກຈາກນີ້ ສະຖານທີ່ຫລິ້ນກິລາໃນຮົ່ມ ແລະ ສະຖານບັນເທີຕ່າງໆ ຖືກສັ່ງປິດເຊັ່ນກັນ, ສ່ວນຢູ່ເມືອງອື່ນໆໃນປະເທດເຕືອນວ່າ: ອາດສັ່ງກັກຕົວຜູ້ທີ່ມາຈາກນະຄອນຫລວງປັກກິ່ງ.
ຂະນະດຽວກັນ, ຈີນໄດ້ວິເຄາະຂໍ້ມູນພັນທຸກຳໄວຣັສທີ່ພົບໃນຜູ້ຕິດເຊື້ອຢູ່ນະຄອນຫລວງປັກກິ່ງສຳເລັດຮຽບຮ້ອຍແລ້ວ ແລະ ກຳລັງແກະຮອຍຫາຕົ້ນກຳເນີດຂອງໄວຣັສ. ຜູ້ຊ່ຽວຊານດ້ານລະບາດວິທະຍາຂອງສູນຄວບຄຸມ ແລະ ປ້ອງກັນພະຍາດຂອງຈີນເປີດເຜີຍກັບສຳນັກຂ່າວ CGTN ວ່າ: ແຫລ່ງກຳເນີດຂອງໄວຣັສໃນນະຄອນຫລວງປັກກິ່ງມາຈາກພາຍນອກປະເທດຈີນ ໂດຍເປັນສາຍພັນແບບທີ່ພົບຢູ່ທະວີບເອີຣົບ, ແຕ່ຍັງບໍ່ໄດ້ໝາຍຄວາມວ່າ: ໄວຣັສທີ່ພົບນີ້ມາຈາກເອີຣົບ ອາດຈະມາຈາກອາເມລິກາ ຫລື ຣັດເຊຍກໍໄດ້.
ສ່ວນທ່ານ ທີໂດຣສ ກີບຣີເຢຊຸສ ຜູ້ອຳນວຍການອົງການອະນາໄມໂລກ ເຕືອນໃຫ້ປະເທດຕ່າງໆ ລະມັດລະວັງການລະບາດຊ້ຳອີກ ເຖິງວ່າຢູ່ຫລາຍປະເທດສາມາດຄວບຄຸມການລະບາດໄດ້ແລ້ວກ່ອນໜ້ານີ້ ກຳລັງພົບຜູ້ຕິດເຊື້ອໂຄວິດ-19 ເພີ່ມຂຶ້ນຕໍ່ເນື່ອງ. ເມື່ອຖາມເຖິງຄວາມປອດໄພໃນການເດີນທາງທາງອາກາດ ເນື່ອງຈາກມີການເປີດຊາຍແດນທົ່ວເອີຣົບແລ້ວ, ເຈົ້າໜ້າທີ່ລະດັບສູງຂອງ WHO ຕອບວ່າ: ບໍ່ມີບ່ອນໃດທີ່ບໍ່ມີຄວາມສ່ຽງຢ່າງສິ້ນເຊີງ.
