WHO ຮຽກຮ້ອງຜູ້ນຳປະເທດ ເນັ້ນຄຳໝັ້ນ ໃຫ້ທົ່ວໂລກເຂົ້າເຖິງ ‘ວັກແຊງໂຄວິດ’
“ອົງການອະນາໄມໂລກ” ຮຽກຮ້ອງຜູ້ນຳແຕ່ລະປະເທດ ສະແດງເຈດຕະນາໃຫ້ທົ່ວໂລກສາມາດເຂົ້າເຖິງ “ວັກແຊງຕ້ານໂຄວິດ-19”.
ທ່ານ ດຣ. ທີໂດຣສ ອັດຮານອມ ກີບຣີເຢຊຸສ ຜູ້ອຳນວຍການໃຫຍ່ອົງການອະນາໄມໂລກ (WHO) ກ່າວວ່າ: ວັກແຊງປ້ອງກັນໂຄວິດ-19 ທີ່ຈະມີການຜະລິດໃນອະນາຄົດ ຄວນຖືເປັນສິນຄ້າທີ່ປະເທດຕ່າງໆທົ່ວໂລກສາມາດເຂົ້າເຖິງ ເພື່ອຮັບປະກັນວ່າທຸກຄົນສາມາດໄດ້ຮັບວັກແຊງທີ່ຈະສາມາດຊ່ວຍຊີວິດມະນຸດ.
“ຜູ້ນຳຂອງໂລກຫລາຍທ່ານໄດ້ສົ່ງເສີມແນວຄິດທີ່ວ່າ ຈະມີການຜະລິດວັກແຊງເປັນສິນຄ້າສາທາລະນະລະດັບໂລກ ເຊິ່ງແນວຄິດນີ້ຄວນໄດ້ຮັບການສົ່ງເສີມຢ່າງຕໍ່ເນື່ອງ ແລະ ຜູ້ນຳຫລາຍຂຶ້ນຄວນມີແນວຄິດດັ່ງກ່າວ ໂດຍພວກເຮົາຈຳເປັນຕ້ອງມີການສະແດງເຈດຕະນາຄວາມມຸ້ງໝັ້ນທາງການເມືອງທົ່ວໂລກ ແລະ ເປັນມະຕິລະດັບໂລກ ກ່ອນຈະຜະລິດວັກແຊງສຳເລັດ” ຜູ້ອຳນວຍການໃຫຍ່ WHO ກ່າວ.
ເຖິງຢ່າງໃດກໍຕາມ, ທ່ານ ດຣ. ທີໂດຣສ ກ່າວອີກວ່າ: ຫລັງມີຄວາມກັງວົນວ່າ: ບາງປະເທດເຊັ່ນ: ອາເມລິກາ ອາດກັກຕຸນວັກແຊງ ຫລື ຢາຕ້ານໂຄວິດ-19 ທີ່ຜະລິດໄດ້ ເພື່ອນຳໄປຕໍ່ສູ້ກັບໂຄວິດ-19 ໃນປະເທດ ຈົນເຮັດໃຫ້ປະເທດທຸກຂາກບໍ່ສາມາດເຂົ້າເຖິງວັກແຊງ ແລະ ຢາດັ່ງກ່າວ.
