ຜົນສຳເລັດກອງປະຊຸມຄົບຄະນະ ບໍລິຫານງານສູນກາງພັກ ຄັ້ງທີ 10 ສະໄໝທີ X

ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ X ໄດ້ຈັດຂຶ້ນໃນວັນທີ 8-12 ມິຖຸນານີ້ ທີ່ສໍານັກງານສູນກາງພັກ, ພາຍໃຕ້ການເປັນປະທານຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ຊຶ່ງກອງປະຊຸມ ໄດ້ລົງເລິກປຶກສາຫາລື ແລະ ປະກອບຄໍາເຫັນຕໍ່ເອກະສານສຳຄັນຂອງຊາດທີ່ເປັນຍຸດທະສາດຂອງພັກ  ຊຶ່ງຈະນຳເຂົ້າຮັບຮອງເອົາຢູ່ກອງປະຊຸມໃຫຍ່ ຄັ້ງທີ XI ຂອງພັກໃນຕໍ່ໜ້າດັ່ງນີ້:

1. ການຈັດຕັ້ງປະຕິບັດມະຕິກອງປະຊຸມຄົບຄະນະ ຄັ້ງທີ 7, 8, 9 ຂອງຄະນະບໍລິຫານງານສູນກາງພັກສະໄໝທີ X, ຕິດພັນກັບຄວາມຄືບໜ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ງົບປະມານ, ເງິນຕາປະຈຳໄຕມາດທີ I ປີ 2020. ກອງປະຊຸມໄດ້ສຸມໃສ່ຕີລາຄາຄືນຜົນສຳເລັດ, ຂໍ້ຫຍຸ້ງຍາກໃນການຈັດຕັ້ງປະຕິບັດມະຕິກອງປະຊຸມຄົບຄະນະ ຄັ້ງທີ 7, 8, 9 ຂອງຄະນະບໍລິຫານງານສູນກາງພັກສະໄໝທີ X ໃນຊຸມປີຜ່ານມາ. ພ້ອມດຽວກັນ, ກອງປະຊຸມໄດ້ເປັນເອກະພາບຕໍ່ບັນດາມາດຕະການກະຕຸ້ນ ແລະ ຍູ້ແຮງການເຕີບໂຕຂອງເສດຖະກິດ-ສັງຄົມ ໂດຍສະເພາະຄວາມພະຍາຍາມປັບປຸງສະພາບແວດລ້ອມຂອງການລົງທຶນ ກໍຄືການເຄື່ອນໄຫວທຸລະກິດ ແລະ ການບໍລິການ, ການແບ່ງຂັ້ນຄຸ້ມຄອງການແບ່ງສິດຄວາມຮັບຜິດຊອບ ແລະ ການປະສານງານລະຫວ່າງສູນກາງ ແລະ ທ້ອງຖິ່ນ, ການແກ້ໄຂໜີ້ສິນ, ການປັບປຸງໂຄງສ້າງຂອງລັດວິສາຫະກິດຈຳນວນໜຶ່ງ ລວມທັງການແກ້ໄຂການຮົ່ວໄຫລຂອງງົບປະມານ, ການປະຕິບັດລາຍຈ່າຍບໍລິຫານ ກໍຄືການລົງທຶນຂອງລັດຢ່າງມີຈຸດສຸມ ແນໃສ່ສ້າງການຫັນປ່ຽນທີ່ແທ້ຈິງໃນຊຸມປີຕໍ່ໜ້ານີ້.
2. ຮ່າງລາຍງານການເມືອງ ກອງປະຊູມໃຫຍ່ ຄັ້ງທີ XI ຂອງພັກ, ກອງປະຊຸມໄດ້ປະກອບຄວາມເຫັນຢ່າງກົງໄປກົງມາ ແລະ ລົງເລິກເນັ້ນໜັກໃສ່ບັນຫາທີ່ເປັນທັດສະນະພື້ນຖານ, ເປັນຫລັກການນຳພາຂອງພັກ ກໍຄືເດັດດ່ຽວຍຶດໝັ້ນອຸດົມການສັງຄົມນິຍົມຂອງພັກ ແລະ ລັກສະນະນຳໜ້າຂອງພັກ; ການສ້າງຄວາມສາມັກຄີພາຍໃນພັກ ແລະ ສ້າງຄວາມສາມັກຄີຂອງທົ່ວປວງຊົນລາວທັງຊາດ ແລະ ບັນຫາອື່ນໆ ທີ່ພົວພັນເຖິງການສ້າງພື້ນຖານອັນໜັກແໜ້ນໃຫ້ແກ່ການພັດທະນາເສດຖະກິດ-ສັງຄົມ, ການປັບປຸງຍົກລະດັບ, ສ້າງຄວາມຢູ່ດີກິນດີໃຫ້ແກ່ປະຊາຊົນລາວບັນດາເຜົ່າ, ການສ້າງຄວາມສະເໝີພາບ ແລະ ຄວາມຍຸຕິທໍາໃນສັງຄົມ.
3. ຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9, ກອງປະຊຸມໄດ້ສຸມໃສ່ຄົ້ນຄວ້າ, ປຶກສາຫາລື ແລະ ຊອກໃຫ້ເຫັນໝົດທ່າແຮງບົ່ມຊ້ອນຂອງຊາດ ເພື່ອແກ້ໄຂຄວາມທຸກຍາກຂອງປະຊາຊົນ, ແກ້ໄຂຄວາມຫຍຸ້ງຍາກຂອງເສດຖະກິດ-ການເງິນ ເພື່ອສ້າງບາດກ້າວບຸກທະລຸທີ່ໜັກແໜ້ນ, ໃຫ້ແກ່ການພັດທະນາເສດຖະກິດແຫ່ງຊາດໃນຊຸມປີຕໍ່ໜ້າຕາມທິດຮັບປະກັນຄຸນນະພາບ, ມີຈຸດສຸມ, ຍືນຍົງ ແລະ ສີຂຽວ, ໃນນັ້ນ ໄດ້ວາງຄາດໝາຍໃຫຍ່ການສ້າງປະຖົມປັດໄຈໃຫ້ແກ່ການຫັນເປັນອຸດສາຫະກໍາ ແລະ ທັນສະໄໝຮອດປີ 2025 ຕ້ອງໃຫ້ສໍາເລັດໂດຍພື້ນຖານ; ສູ້ຊົນບຸກບືນຢ່າງແຂງແຮງເຮັດໃຫ້ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ມີດ້ານຫັນປ່ຽນໃນການພັດທະນາ, ມີຄວາມໝັ້ນທ່ຽງ ແລະ ຍືນຍົງ.
4. ກອງປະຊຸມໄດ້ສຸມໃສ່ຄົ້ນຄວ້າ, ປຶກສາຫາລືຕໍ່ການປັບປຸງຮ່າງກົດລະບຽບຂອງພັກປະຊາຊົນ ປະຕິວັດລາວ ສະໄໝທີ X ເພື່ອປັບປຸງ-ດັດແປງໃຫ້ສອດຄ່ອງກັບສະພາບການໃນໄລຍະໃໝ່ ແນໃສ່ເຮັດໃຫ້ກົດລະບຽບຂອງພັກປະຊາຊົນປະຕິວັດລາວ ສະໄໝທີ XI ຄົບຖ້ວນ, ຊັດເຈນ, ຮັດກຸມ ແລະ ສົມບູນຍິ່ງຂຶ້ນ ເພື່ອເຮັດໃຫ້ພັກມີຄວາມປອດໄສ-ເຂັ້ມແຂງ ແລະ ໜັກແໜ້ນ.

ນອກຈາກນີ້, ກອງປະຊຸມຍັງໄດ້ປຶກສາຫາລືກ່ຽວກັບການປັບປຸງກົງຈັກບໍລິຫານລັດໃຫ້ມີຄວາມເໝາະສົມ, ສອດຄ່ອງ ແລະ ສາມາດປະຕິບັດພາລະບົດບາດໃນການຄຸ້ມຄອງລັດ, ຄຸ້ມຄອງສັງຄົມ, ເຮັດໃຫ້ແນວທາງປ່ຽນແປງໃໝ່ຂອງພັກ ກໍຄືການພັດທະນາເສດຖະກິດ-ສັງຄົມແຕ່ລະໄລຍະໄດ້ມີບາດກ້າວຂະຫຍາຍຕົວດ້ວຍຈັງວະທີ່ຕໍ່ເນື່ອງ.

ໃນກອງປະຊຸມ ສະຫາຍ ເລຂາທິການໃຫຍ່ຄະນະບໍລິຫານງານສູນກາງພັກ ຍັງໄດ້ເນັ້ນໃຫ້ທົ່ວພັກ, ທົ່ວປວງຊົນຈົ່ງສືບຕໍ່ເສີມຂະຫຍາຍມູນເຊື້ອຄວາມສາມັກຄີໃຫ້ເປັນປຶກແຜ່ນ, ສືບຕໍ່ສ້າງຂະບວນການຮອບດ້ານໃຫ້ແຂງແຮງ ເພື່ອສ້າງຜົນງານຄໍ່ານັບຮັບຕ້ອນກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ ແລະ ວັນສ້າງຕັ້ງ ສປປ ລາວ ຄົບຮອບ 45 ປີ (1975-2020) ຢ່າງເປັນຂະບວນພົດຟື້ນ ແລະ ມີຜົນສຳເລັດທີ່ເປັນຮູບປະທຳ.