ເອກກະສານລັບຮົ່ວໄຫຼເປັນໄພຕໍ່ຄວາມໝັ້ນຄົງຂອງຊາດ
ເອກກະສານລັບຮົ່ວໄຫຼເປັນໄພຕໍ່ຄວາມໝັ້ນຄົງຂອງຊາດ
ໂດຍ: ລູກເມືອງພວນ
ເອກກະສານທາງການ ຫຼື ເອກກະສານລັບຮົ່ວໄຫຼ ເປັນໄພຄຸກຄາມຕໍ່ຄວາມໝັ້ນຄົງຂອງຊາດ ຫຼື ເຮັດໃຫ້ເສຍຊື່ສຽງຂອງອົງກອນ. ດັ່ງນັ້ນ, ການປົກປັກຮັກສາເອກກະສານຈຶ່ງມີຄວາມສຳຄັນບໍ່ໜ້ອຍຕໍ່ຊະຕາກຳຂອງປະເທດໜຶ່ງ ຫຼື ບົດບາດຂອງອົງກອນໜຶ່ງ.
ດັ່ງທີ່ພວກເຮົາຮູ້ນຳກັນແລ້ວວ່າ ເອກກະສານມີຫຼາຍປະເພດ ແລະ ມີຄວາມສຳຄັນແຕກຕ່າງກັນອອກໄປ. ມີບາງເອກກະສານສຳຄັນທີ່ສຸດ ແຕ່ບໍ່ປິດລັບ, ມີບາງເອກກະສານທັງສຳຄັນ ແລະ ທັງເປັນຄວາມລັບ ຊຶ່ງບໍ່ມີໃຜຈະຮູ້ໄດ້ນອກຈາກເຈົ້າໜ້າທີ່ກ່ຽວຂ້ອງ ແລະ ການນຳຂັ້ນສູງສຸດໃນລັດຖະບານຮັບຮູ້ເທົ່ານັ້ນ, ມີບາງເອກກະສານກໍສາມາດນຳເອົາອອກເຜີຍແຜ່ໃຫ້ສັງຄົມຮັບຮູ້ທົ່ວກັນ, ມີບາງຂໍ້ມູນຂ່າວສານ ຫຼື ບາງເອກກະສານກໍເປັນທາງການ ແລະ ບໍ່ເປັນທາງການ, ເປັນເອກກະສານສຳລັບພາຍໃນ ແລະ ສຳລັບທົ່ວໄປ… ຍ້ອນເຫດຜົນດັ່ງກ່າວ ໃນອົງກອນ, ສຳນັກງານອົງການຕ່າງໆ ທັງພາກລັດ ແລະ ເອກກະຊົນຈຶ່ງມີໜ່ວຍງານໜຶ່ງ, ພະແນກໜຶ່ງ ຫຼື ການຈັດຕັ້ງໃດໜຶ່ງເຮັດໜ້າທີ່ເກັບມ້ຽນເອກກະສານຂອງຕົນ ຊຶ່ງເຄີຍເອີ້ນໂດຍລວມວ່າ: “ພາກສ່ວນສຳເນົາເອກກະສານ”, ຊຶ່ງຜູ້ທີ່ເຮັດວຽກງານເກັບມ້ຽນ ແລະ ຮັກສາເອກກະສານ ຈະຕ້ອງໄດ້ຮັບການຝຶກອົບຮົມ ຫຼື ຮຽນວຽກງານນີ້ອອກມາໂດຍສະເພາະ ຖ້າຫາກເວົ້າໃຫ້ຖືກຕາມຫຼັກການ.
ເອກກະສານຮົ່ວໄຫຼ ເປັນບັນຫາທີ່ພວກເຮົາເຄີຍພົບເຫັນຢູ່ເປັນປະຈຳ ແລະ ມັກເກີດຂຶ້ນຢູ່ສະເໝີ, ບໍ່ສະເພາະແຕ່ປະເທດລາວ ຊາດອື່ນໆກໍມີເຊັ່ນດຽວກັນ.
ການເຈາະເອົາ ຫຼື ລັກເອົາຂໍ້ມູນລັບ ແລະ ເອກກະສານລັບຂອງທາງການອອກມາເຜີຍແຜ່ແມ່ນເປັນເລື່ອງທີ່ງ່າຍດາຍສຳລັບນັກ IT ໃນຍຸກປັດຈຸບັນ ແລະ ອີກສ່ວນໜຶ່ງກໍແມ່ນຍ້ອນພະນັກງານເຮັດວຽກງານເກັບມ້ຽນເອກກະສານ ຂາດຄວາມຮູ້ ຄວາມເຂົ້າໃນໃນຄວາມສຳຄັນຂອງເອກກະສານ ຫຼື ອາດມີຈຸດປະສົງຈົງໃຈດ້ວຍເຫດຜົນຢ່າງໃດຢ່າງໜຶ່ງ ຫຼື ບໍ່ໄດ້ຜ່ານການສຶກສາຮໍ່າຮຽນ, ບໍ່ໄດ້ຜ່ານການຝຶກອົບຮົມ ຈຶ່ງເຮັດໃຫ້ເອກກະສານຮົ່ວໄຫຼ.
ເພື່ອຮັບປະກັນໃຫ້ເອກກະສານທີ່ອອກໄປຖືກຕ້ອງແມ່ນຢໍາ ບໍ່ໃຫ້ພວກຄົນບໍ່ດີ ສວຍໂອກາດ ຈັບເອົາໄປຕີຄວາມໝາຍ, ໃສ່ຮ້າຍປ້າຍສີ, ບິດເບືອນແນວທາງ-ນະໂຍບາຍຂອງພັກ-ລັດຖະບານ ຫຼື ເອົາໄປຂະຫຍາຍຄວາມທີ່ຜິດເຂວ, ສ້າງຄວາມປັ່ນປ່ວນ, ຢ້ານກົວ ຕື່ນຕົກໃຈ ຫຼື ສ້າງກະແສສັງຄົມຕໍ່ຕ້ານ…ພວກເຮົາຕ້ອງມີມາດຕະການທີ່ເຂັ້ມງວດ ແລະ ຮັດກຸ່ມກວ່າເກົ່າ, ຕ້ອງມີລະບົບຈັດການເອກກະສານໃຫ້ດີ ມີຄວາມແມ່ນຢຳສູງ ນັບທັງຜູ້ທີ່ເຮັດວຽກງານອັນນີ້ກໍຕ້ອງແມ່ນຜູ້ທີ່ມີທັດສະນະຫຼັກໝັນການເມືອງສູງອີກດ້ວຍ.
ໃນຫວ່າງມໍ່ໆ ມານີ້, ສື່ມວນຊົນພວກເຮົາເຫັນເອກກະສານອອກມາສູ່ສັງຄົມຢ່າງຫຼວງຫຼາຍ, ແຕ່ເອກກະສານເຫຼົ່ານັ້ນ ບໍ່ຮູ້ວ່າເປັນທາງການ ຫຼື ບໍ່ເປັນທາງການ. ຂໍຍົກຕົວຢ່າງບາງອັນຄື: ໃນປີ 2019 ໄດ້ມີເອກກະສານຮົ່ວໄຫຼອອກມາວ່າ ລັດຖະບານຈະມີການປັບປຸງຊັບຊ້ອນຍົກຍ້າຍຫຼາຍຕຳແໜ່ງໃນຂັ້ນລັດຖະບານ ຫຼື ສອງສາມມື້ຫຼັງມານີ້ກໍມີເອກກະສານໜັງສືສະເໜີຂອງລັດຖະບານເຖິງກະຊວງພະລັງງານ ແລະ ບໍ່ແຮ່ ແລະ ບໍລິສັດລັດວິສາຫະກິດໄຟຟ້າລາວ ເພື່ອຄົ້ນຄວ້າລາຄາໄຟຟ້ານະໂບາຍຕໍ່ຄົວເຮືອນ; ຂໍ້ຕົກລົງແຕ່ງຕັ້ງຜູ້ອຳນວຍການບໍລິສັດລັດວິສາຫະກິດໄຟຟ້າລາວ ຊຶ່ງອອກສູ່ສັງຄົມນັ້ນ ແມ່ນເປັນທາງການແທ້ບໍ ຫຼື ບໍ່ແມ່ນທາງການ? ອັນໄດ້ເຮັດໃຫ້ສື່ມວນຊົນ ແລະ ສັງຄົມສົງໄສ ລັ່ງເລໃຈ ແລະ ສັບສົນ. ຖ້າສື່ມວນຊົນຈະເອົາອອກຂ່າວເປັນທາງການກໍບໍ່ກ້າ, ຖ້າບໍ່ເອົາອອກຊໍ້າພັດເວົ້າວ່າສື່ມວນຊົນອອກຂ່າວບໍ່ທັນເຫດການ, ຊັກຊ້າ ບໍ່ທັນກິນ…
ເພື່ອຫຼີກລ່ຽງບັນຫາດັ່ງກ່າວ, ຜູ້ຂຽນຂໍແລກປ່ຽນທັດສະນະສ່ວນຕົວແນວນີ້ດີບໍ?
- ຖ້າຈະສົ່ງໃຫ້ພາກສ່ວນກ່ຽວຂ້ອງຈາກອົງການໜຶ່ງໄປຫາອົງການໜຶ່ງ ກໍຂໍໃຫ້ສົ່ງເຖິງພາກສ່ວນນັ້ນໂດຍກົງ ບໍ່ຕ້ອງອອກໃຫ້ສັງຄົມທົ່ວໄປຮັບຮູ້ນຳ.
- ຖ້າຢາກໃຫ້ສັງຄົມໃນວົງກວ້າງຮູ້ນຳກໍຕ້ອງມີກາຈໍ້າວ່າ:“ເອກະສານ
ທາງການ”, ແຕ່ເອກກະສານດັ່ງກ່າວ ຕ້ອງໃສ່ຊື່ສຳນັກງານອົງການ, ມີເລກທີ, ມີວັນທີ-ເດືອນ-ປີ, ມີລາຍເຊັນພ້ອມກາຊື່ ແລະ ມີກາຈໍ້າຂອງສຳນັກງານອົງການທີ່ເປັນກາສີແດງວົງມົນມີຮວງເຂົ້າ ຖືກຕ້ອງຕາມຮູບແບບເອກກະສານທາງການທຸກປະການ. ທັງນີ້ເພື່ອບໍ່ໃຫ້ສື່ມວນຊົນ ແລະ ສັງຄົມສັບສົນ.
- ອົງການ ຫຼື ພາກສ່ວນກ່ຽວຂ້ອງເອກກະສານ ຕ້ອງແນະນຳໃຫ້ພະນັກງານຈັດການເອກກະສານຮູ້ອັນໃດຄວນ, ອັນໃດບໍ່ຄວນ ແລະ ເຜີຍແຜ່ຢູ່ໃນລະດັບໃດ, ກວ້າງແຄບສໍ່າໃດ, ຈຸດປະສົງເຜີຍແຜ່ເອກກະສານແມ່ນແນວໃດ…
- ເອກກະສານທີ່ສົ່ງໃຫ້ສະເພາະພາກສ່ວນ ກໍຄວນມີກາຈໍ້າວ່າ: ດ່ວນ,ບໍ່ລັບ, ເອກກະສານລັບ, ເອກກະສານສຳຄັນ, ເອກກະສານທົ່ວໄປ ສາມາດເຜີຍແຜ່ຕໍ່ສັງຄົມໄດ້…
ທັງໝົດນີ້ ເປັນພຽງທັດສະນະສ່ວນຕົວເທົ່ານັ້ນ, ຈຶ່ງຂໍແລກປ່ຽນກັບຜູ້ອ່ານ ແລະ ອົງການຈັດຕັ້ງ ພັກ-ລັດ ທຸກຖ້ວນໜ້າທີ່ມີຄວາມຮູ້ ຫຼື ເຮັດກັບເລື່ອງນີ້ໂດຍກົງ.
